<<    <     1 Samuwɛli     9     >    >> 
Sɔli ya kari di zhɛ wu to wu kafaya yi sha
9
Ayiwa, Bɛnzhamɛ wo tirige shɛn ná wa bye wà, wu mɛgɛ ki bye na Kishi, kashɛn naŋmere li bye lii. Wu to wu mɛgɛ ki bye na Abiyɛli, Abiyɛli wo to wu mɛgɛ di ɲɛ na Zerɔri, Zerɔri wo to wu mɛgɛ di bye na Bekorati, Bekorati wo to wu mɛgɛ di bye na Afiya. 2 Ja wa bye Kishi mu wu mɛgɛ ki bye na Sɔli, levɔɔ naɲisaana li bye Sɔli. Sipya bi wu xɔ saana ni Izirayɛli nagoo pu ni wɛ. Wu bi sii tɔnnɔ sipyiire ti bɛɛri na.
3 Caŋa ka, a Sɔli to wu kafazhaa pʼi ba biin. A Kishi di wu ja Sɔli pye: «Yìri, mʼa kapyebye nigin wa lɔ ma fara mayɛ na, yi shɛ kafazhaa pu sha.» 4 A Sɔli di Efirayimu faaboboyo koomɔ pu ɲaari, na Shalisha fiige ki bɛ ɲaari, wu ya kafazhaa pu ɲa wɛ. A wu Shalimu fiige ki ɲaari, wu ya yaaga ɲa wɛ, na Bɛnzhamɛ wo fiige ki ɲaari, wu ya yi ɲa wɛ. 5 Ba pʼa shɛ nɔ Sufu wo koomɔ pu ni wɛ, kapyebye wemu wu bye ni Sɔli ni ge, a Sɔli di wee pye: «Pa wù guri wʼà se puga, lee bɛ wɛ, nɛ to wu na ba dɛrɛ guri da wu funŋɔ shaa ni wèe kaa ni, na kafazhaa pu yaha.» 6 A kapyebye wu wu pye: «Kilɛ wo ná wa wà naha le kulo le ni, sipyigbɔ wu ɲɛ wii. Wu bu kaa bɛɛri jo, lʼa ba fa foro. Wù shɛ wu mu, la wa la ni wu na zhɛ koo le wù tàan.» 7 A Sɔli di wu kapyebye wu pye: «Wèe bu shɛ wu mu, wèe na shɛ ɲaha kan wu mu wɛ? Buuri wa nige wù bɔrɔyɔ yi ni wɛ, yaaga katii bɛ di wa wù mu, wù na já zhɛ kemu kan Kilɛ wo ná wu mu wɛ. Ɲaha kʼi wa wù mu wɛ?» 8 A kapyebye wu Sɔli pye: «Warifyɛn sikili taaga shishɛɛrɛ wogo ki wa nɛ mu, nɛ na zhɛ kee kan Kilɛ wo ná wu mu, wu na koo le wù tàan.» 9 Taashiinɛ li ni Izirayɛli fiige ki ni, sipya wemu ba da zhɛ Kilɛ yege, wʼa jo: «Wù shɛ ɲaɲa wu mu!» Bani we pʼa byi niɲaa «Kilɛ tudunmɔ» ge, wee pu bi byi taashiinɛ li ni na «ɲaɲa». 10 A Sɔli di wu kapyebye wu pye: «Ma fungɔngɔ kʼa ɲɔ! Pa wù shɛ!» A pʼi ganha na gaaŋi Kilɛ wo ná wu wo kulo li ni.
11 Ayiwa, na pu yaha pu na duri na se kulo li ni, a pʼi jíri fucɛɛgɛɛ kii na pee na se di zhɛ lɔhɔ ko, a pʼi pee yege na: «Ta naha ɲaɲa wu wa?» 12 A fucɛɛgɛɛ kʼi pu ɲɔ shɔ na: «Uun, wu wa yi ɲahagbaa li na, yi fyaala shɛ, bani wʼa pa kulo li ni niɲaa ma li kaɲuŋɔ pye saraga ka sipyiire tʼa wo saraya yi tawologo ki ni faaboboŋɔ ki fugba wu ni. 13 Yi bu shɛ jé kulo li ni, yi na zhɛ wu ta wà na wu ta wu sanha dugi kari faaboboŋɔ ki fugba wu ni di zhɛ li wɛ. Wu ya bu shɛ nɔ wɛ, sipyiire tʼa da lii wɛ, bani wee wʼa da ba duba wu pye saraga ki na, lee bu bye sipyiire ti ma na li. Yi dugi shɛ nimɛ, yi na zhɛ wu ta wà.»
Sɔli ya Samuwɛli ɲuŋɔ círi
14 Ayiwa, a pʼi doro na jin kulo li ni, na shɛ jíri saha ni Samuwɛli ni wu na fòro na duri na se faaga ki fugba wu ni.
15 Lee bi Tɛhɛnɛ Baa Kilɛ ta wʼa Samuwɛli kaala yaha caŋa ɲii nigin a Sɔli di na nɔ. Tɛhɛnɛ Baa Kilɛ bi Samuwɛli pye na: 16 «Ɲiga nimɛtashiin nʼa da ba Bɛnzhamɛ fiige ki shɛn ná wa tun ma mu, mʼa ba sìnmɛ taga wu tìre, kɔnhɔ wu bye ɲuŋɔfɔɔ na sipyii pu ɲuŋɔ ni, Izirayɛli nagoo pee. Wu na ba na sipyii pu ɲuŋɔ wolo Filisiti shɛɛn pu keŋɛ ni. Nɛ na sipyii pu ɲaa wu ɲa, pu mɛkuguŋɔɔ kʼa pa fo na pa nɔ nɛ na.» 17 Ba Samuwɛli ya Sɔli ɲa wɛ, a Tɛhɛnɛ Baa Kilɛ di wu pye: «Ná wemu kaa nɛ jo mu mu ge, wee wu ɲɛ we, we wʼa da ba bye nɛ wo sipyii pu wo ɲuŋɔfɔɔ we.» 18 A Sɔli di fulo Samuwɛli na kulo li tajege ki ɲɔ na, na jo: «Nʼa ma ɲɛɛri, ɲaɲa wu puga ki sanha shɛ na na.» 19 A Samuwɛli di Sɔli pye: «Nɛ wu ɲɛ ɲaɲa we. Pinnɛ dugi ni na ni saraga ki tawologo ki ni fugba wu ni, yi na zhɛ binnɛ lii ni na ni niɲaa. Ɲiga ba mugi, lemu bɛɛri lʼa ma funŋɔ pɛn ge, nɛ na lee jo ma mu, lee kadugo na, na koo kan ma mu. 20 Ma kafazhaa pu pʼa piin niɲaa di ɲɛ pu caŋa taanri wogo ge, ma ganha ba ma funŋɔ shaa ni pee kaa ni wɛ. Pʼa ɲa. Yara bɛɛri li ɲɛ see yara Izirayɛli fiige ki ni ge, jɔgɔ mɛgɛ na li dʼa yaha wɛ? Ta mu ni ma to wu puga ki bɛɛri bɛ wɛ?» 21 A Sɔli di jo: «Ta nɛ ɲɛ mɛ Bɛnzhamɛ wo tirige ki shɛn wa wɛ? Izirayɛli gbaweye yi bɛɛri wo nifɛnhɛfɛnhɛnɛ li ɲɛ Bɛnzhamɛ wo gbawege ke, nɛ wo kpuun lʼi ɲɛ kee gbawege ki wo kpɔnhɔɔ ki bɛɛri wo nifɛnhɛfɛnhɛnɛ. Mu di yu ni nɛ ni le jogana le na ɲaha fɛni wɛ?»
22 A Samuwɛli di doro jé ni Sɔli ni wu kapyebye wu ni puga ki ni, na shɛ pu teŋɛ ɲahagbaa tatɛɛnyɛ yi ni sipyiyirilee pu ɲahagbaa na, pee bye namaa kɛlɛɛ taanri (30) shishiin. 23 A Samuwɛli di sushɔhɔmɔ wu pye: «Xaara temu nʼa kan ma mu, na ma pye jo ma ti yaha kabanugo na ge, pa ni ti ni.» 24 A sushɔhɔmɔ wu shii le ni li sogomɔ pu bɛɛri wolo na pa yereŋɛ Sɔli fɛɛ ni. A Samuwɛli di Sɔli pye: «Xaara temu tʼa bi yaha mu mɛgɛ na ge, tee ti wa te, ti yereŋɛ ma fɛɛ ni, ma da xhaa, bani ba nɛ sipyiire ti yiri wɛ, na le waa yaha mu mɛgɛ na.» A Sɔli di li mu lee ligana li na ni Samuwɛli ni kee caŋa ke.
25 Lee kadugo na, a pʼi yìri faaboboŋɔ ki fugba wu ni, na digi kanha ki ni. A Samuwɛli ni Sɔli di shɛ yɔgɔ puga ki kataŋa ki na.
Samuwɛli ya Sɔli tìre na pye saan
26 Ɲimuguro ti ɲisɔɔgɔ ki na, a pʼi ba sɔɔ yìri. Na kpɛɛngɛ ki ta ki sanha wo wɛ, a Samuwɛli di Sɔli yiri kataŋa ki na, na wu pye: «Yìri, nʼa da koo kan ma mu.» A Sɔli di digi na yìri kataŋa ki na, a pu shuun wu binnɛ foro, wu ni Samuwɛli ni. 27 Ba pʼa shɛ nɔ kulo li tɛhɛnɛ li na wɛ, a Samuwɛli di Sɔli pye: «Yi jo ma kapyebye wu mu na wu toro wù ɲaha na.» A kapyebye wu doro pu ɲaha na. A Samuwɛli di jo: «Mu wu yere naha jɛɛrɛ funŋɔ ni, Tɛhɛnɛ Baa Kilɛ ya jomɔ pemu jo ge, di pee jo ma mu.»