Izirayɛli nagoo ya jo pu saan teŋɛ pu ɲuŋɔ ni
8
Ayiwa, ba Samuwɛli ya pa ɲɛri nɔhɔlɛ tuun wemu ni wɛ, na wu nagoo pu teŋɛ na pye ɲuŋɔfɛɛ Izirayɛli ni. 2 Wu jashiimɛ wu mɛgɛ ki bye na Zhowɛli, shuun wo wu mɛgɛ di ɲɛ na Abiya. Bɛɛrisheba ni pʼa bi tiin, na kiiri wu kuun. 3 Ga Samuwɛli nagoo pu ya bi ɲaari Samuwɛli wo ɲaarigana li na wɛ. Naafuu lakuuŋɔ ki bye pu ni, a pʼi ganha na yaŋmuyɔ ŋmɔhɔni na zhuu sipyii mu, na pu kiiri wu kuun ni naŋmahara ni. 4 Lee wuu na Izirayɛli nɔhɔlɛɛ pu bɛɛri ya puyɛ pinnɛ, na shɛ Samuwɛli fɛni Arama ni, 5 na shɛ wu pye: «Li wii, mu ya lɛ, ma nagoo pʼi ya ɲaari mu wo ɲaarigana li na wɛ. Wee tuun wu ni saan wa teŋɛ wù ɲuŋɔ ni, wee di da wù kiiri wu kuun, ba shi wusama bɛɛri wa wɛ.»a 6 Sipyiire ti ma Samuwɛli pye na wu saan wa teŋɛ pee ɲuŋɔ ni, wee di da pu kiiri wu kuun, lee ya ta taan Samuwɛli ni wɛ. A Samuwɛli di Tɛhɛnɛ Baa Kilɛ ɲɛɛri lee wuu na. 7 A Tɛhɛnɛ Baa Kilɛ di Samuwɛli pye: «Yemu bɛɛri te sipyiire te wa yu ma mu ge, yi logo. Ta mu ya giin na mu pʼa yaha gɛ? Go nɛ pʼa yaha, kɔnhɔ nɛ ganha bu diin pu ɲuŋɔ ni sanha wɛ. 8 Lemu pʼa pye mu na ge, lee tuugo pʼa byi nɛ bɛ na, na co fo caŋa kemu nɛ pu yeege Misira fiige ki ni ge, fo na pa nɔ nimɛ na. Pʼa na yaha wà, na yasunyɔ lɔ, na ganha na yee pɛlɛ. 9 Ayiwa nimɛ, pu ɲɔmɛɛ co, ga saan wemu wʼa da ba diin pu ɲuŋɔ ni ge, wee saan wu wo fanha ki korogoo wa kiimu ge, mʼa pu funŋɔ to kee na, mʼa kee keree ki kaa jo ma waha pu mu xuuni.»10 Lee kadugo na, sipyiire temu tʼa saan wu shaa Samuwɛli mu ge, a wu shɛ Tɛhɛnɛ Baa Kilɛ wo jomɔ pu bɛɛri jo pu mu. 11 A wu pu pye: «Yi wo saan wu na ba lemu pyi yi na ge, lee li wa mɛ. Wu na ba yi jalaa coni na byi wu kashɛn wotoriyo ni shɔnyɔ paavɛɛ. Pii bɛ na ba fe wu wotoriyo yi ɲahagbaa na. 12 Wu na ba pii teŋɛ na pye namaa kabɔfoŋɔɔ nigin nigin (1.000) ɲuŋɔfɛɛ, ni kɛlɛɛ kaguro kaguro (50) ɲuŋɔfɛɛ. Pii na ba wu kɛrɛyɛ yi faani, na wu yalɔɔrɔ ti luu. Pii bɛ di wu kashɛn yagboyo ni wotoriyo yi yari. 13 Wu na ba yi pushaa pii co na pye nudanga sìnmɛ yaavɛɛ, pʼa pii pye wu sushɔhɔmɔɔ, na pii pye wu buuriyaalaa. 14 Wu na ba yee wo kɛrɛyɛ ye, ni yee wo ɛrɛzɛn tiire tɛyɛ ye, ni yee wo oliviye tiire tɛyɛ yi bɛɛri nijeye co, na kan wu kapyebyii pu mu. 15 Wu na ba yi shinma wu jagi we, ni yi ɛrɛzɛn nilɛ wu jagi wu shuu yalɔɔrɔ ti lɔduun wu ni na gaan wu fanha ki ɲuŋɔfɛɛ ni wu fanha ki wo kapyebyii pu mu. 16 Wu na ba yi kapyebyii namaa ni cèe pu coni, na yi lɛvɛɛ pu nijemɛɛ coni, na yi kafaya bɛ coni, yee na ba wu labye wu pyi. 17 Wu na ba yi yatɔɔyɔ yi jagi wu shuu, ali yiyɛ pyaa ki bɛ na ba bye wu buloo. 18 Yee caya yi na, saan wemu ɲaha yʼa da ba bulo ge, yi na ba sipyaa waa wee tuun wu ni Tɛhɛnɛ Baa Kilɛ mu wee saan wu ɲaha na. Ga Tɛhɛnɛ Baa Kilɛ di wa da ga ba yi ɲɔ shɔ wɛ.»
19 Ga lee bɛ na sipyiire ti ya ta sɔɔ na logo Samuwɛli ɲɔ na wɛ. A pʼi jo: «Ahayi, fo saan na teŋɛ wèe ɲuŋɔ ni. 20 Wù funŋɔ ki wa wù bye ba shi wusama ɲɛ wɛ. Wù wo saan wu da wù kiiri wu keree ki ɲaha shɔɔnri. Wu na ba wù ɲaha coni kashɛnyɛ ni, na bye wù ɲuŋɔfɔɔ.» 21 A Samuwɛli shiin di sipyiire ti wo jomɔ pu bɛɛri logo, na pu jo Tɛhɛnɛ Baa Kilɛ mu. 22 Lee funŋɔ ni a Tɛhɛnɛ Baa Kilɛ di Samuwɛli ɲɔ shɔ na: «Pu ɲɔmɛɛ co mʼa pu kan saan.»
Wee tuun wu ni, a Samuwɛli di yi jo Izirayɛli nagoo pu mu na: «Yi bɛɛri pu kuri shɛ yi kulogoo ki ni.»