Izirayɛli nagoo pʼa kuri pa Kilɛ mu
7
Ayiwa, a Kiriyati-Yarimu kulo li shɛɛn di ba Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu lɔ. A pʼi gari ni wu ni ná wa kaban, wee mɛgɛ ki bye na Abinadabu. Wu puga bye faaboboŋɔ ka ɲuŋɔ ni. Ja wa bye Abinadabu mu wemu mɛgɛ ki ɲɛ na Eleyazari ge, a pʼi wee teŋɛ na pye Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu kasɛɛgɛ pyevɔɔ.2 Ayiwa, a Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu taatuunnɔ pye lee kulo li ni, fo na nɔ yee kɛlɛɛ shuun (20) na. Lee kadugo na, a Izirayɛli nagoo pu bɛɛri di ɲɔ kɔn na sipyaa suu Tɛhɛnɛ Baa Kilɛ fɛni, na wu mɛgɛ yiri. 3 Wee tuun wu ni a Samuwɛli di Izirayɛli nagoo pu bɛɛri pye: «Yi bu da yʼa kuri Tɛhɛnɛ Baa Kilɛ mu ni yi zɔlɔɔ pu bɛɛri ni, yi yapɛrɛɛ Ashera ni fiiye yisaya wo yasunyɔ yi bɛɛri yeege yiyɛ tɛ ni, yʼi nɔrɔ yaha Tɛhɛnɛ Baa Kilɛ na ni yi zɔlɔɔ pu bɛɛri ni, yʼi da labye pyi weeyɛ nigin mu, wu na yi shɔ Filisiti shɛɛn pu na.» 4 Wee tuun wu ni a Izirayɛli nagoo pʼi yapɛrɛɛ Baali ni Ashera yeege puyɛ tɛ ni, na ganha na labye pyi Tɛhɛnɛ Baa Kilɛ yɛ nigin pe wu mu. 5 Lee kadugo na, a Samuwɛli di jo: «Yi Izirayɛli nagoo pu bɛɛri yiri pinnɛ Misipa ni, di Tɛhɛnɛ Baa Kilɛ ɲɛɛri yi mu.» 6 Ayiwa, a Izirayɛli nagoo pu bɛɛri di shɛ puyɛ pinnɛ Misipa ni. A pʼi lɔhɔ yeege, na kee wo Tɛhɛnɛ Baa Kilɛ ɲaha tàan. A pʼi suun le kee caŋa na jo: «Wèe ya jurumu pye Tɛhɛnɛ Baa Kilɛ na.» A Samuwɛli di bye mu Izirayɛli nagoo pu wo ɲuŋɔfɔɔ Misipa ni.
7 Ba Filisiti shɛɛn ya logo na Izirayɛli nagoo ya puyɛ pinnɛ Misipa ni wɛ, a pu ni pu ɲuŋɔfɛɛ pʼi gari di zhɛ do pu na. Ba Izirayɛli nagoo pʼa yee logo wɛ, a pʼi fya Filisiti shɛɛn pu ɲaha na. 8 A pʼi Samuwɛli pye: «Ma ganha bu fɛhɛ mayɛ na wɛ, ga ta mujuu waa Tɛhɛnɛ Baa Kilɛ, wù Kilɛ wu mu, kɔnhɔ wu wù shɔ Filisiti shɛɛn pu na.» 9 Ayiwa, a Samuwɛli di dubyapige co kemu kʼa ŋmari ge, na kee niboŋɔ pye saraga nizogoŋɔ Tɛhɛnɛ Baa Kilɛ mu. Lee kadugo na, a wu mujuu wá Tɛhɛnɛ Baa Kilɛ mu, Izirayɛli wuu na, a Tɛhɛnɛ Baa Kilɛ di kee ɲɛrɛgɛ ki shɔ. 10 Tuun wemu ni Samuwɛli bi saraga nizogoŋɔ ki wo ge, a Filisiti shɛɛn pʼi nɔ wee tuun wuyɛ pyaa ni, na pʼi kashɛn kɔn Izirayɛli nagoo pu na. Ga a Tɛhɛnɛ Baa Kilɛ di sɛlɛnɛ nigbɔɔ taga pu fungɔnyɔ wuregi kee caŋa. A Filisiti shɛɛn pʼi baa Izirayɛli nagoo pu ɲaha na. 11 A Izirayɛli nagoo pʼi foro Misipa ni, na Filisiti shɛɛn pu niinɛ, na pu kpɔɔn ni ŋmɔpara ni, fo na shɛ nɔ Bɛti-Kari kabanugo. 12 Wee tuun wu ni a Samuwɛli di faakagereŋɛ ka lɔ, na kee sin Misipa ni Shɛn tɛ wu ni, na ki mɛgɛ le na Ebɛn-Ezɛri, lee kɔ́ri ɲɛ na dɛgɛ faakagereŋɛ. A wu jo: «Bani Tɛhɛnɛ Baa Kilɛ ya wèe ɲuŋɔ wolo, fo na pa nɔ naha.»
13 Lee funŋɔ ni a Filisiti shɛɛn pu ɲuŋɔ di sogi, a pʼi bye pu ya sɔɔ na shɛ do nige Izirayɛli nagoo pu na pu fiige ki ni wɛ. A Tɛhɛnɛ Baa Kilɛ di wu keŋɛ ki fanha ki digi Filisiti shɛɛn pu na Samuwɛli wo caŋa ɲii li bɛɛri funŋɔ ni. 14 Filisiti shɛɛn pʼa bi kulogoo kiimu shɔ Izirayɛli nagoo pu na, na co Ekurɔn na fo na shɛ nɔ Gati na ge, a kee bɛɛri di guri pye Izirayɛli wogoo, ki ni ki mahama kulogoo ki bɛɛri. A Izirayɛli nagoo pʼi ki shɔ Filisiti shɛɛn pu na. A ɲaɲiŋɛ di bye Izirayɛli ni Amɔri shi shɛɛn pu bɛ tɛ ni.
15 Ayiwa, a Samuwɛli di gori yaha Izirayɛli nagoo pu wo ɲuŋɔfɔɔ wu shi wu caŋa ɲɛhɛɛ ki bɛɛri ni. 16 Wʼa bi se na ma yee bɛɛri Bɛtɛli ni Giligali ni Misipa ni, na Izirayɛli nagoo pu wo kiiri wu kuun kee kulogoo ki bɛɛri ni. 17 Lee kadugo tàan wʼa guri pa Arama kulo li ni, bani wà wu puga di bi bye. Wʼa bi Izirayɛli nagoo pu kiiri wu kuun wake bɛ. Wee xuu wu ni bɛ wʼa bi saraya tawologo ka yereŋɛ Tɛhɛnɛ Baa Kilɛ mu.