Filisiti shɛɛn ya keshi wu yaha shɛ gan Izirayɛli nagoo pu mu
6
Yebyaa gbarashuun Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wʼa pye Filisiti shɛɛn pu ɲiŋɛ ki na. 2 Wee tuun wu ni a Filisiti shɛɛn pʼi pu wo saraya ɲaha shɔɔnrivɛɛ ni pu celɔbyii pu yiri, na pu pye: «Dii wèe dʼa yaa na Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu pye wɛ? Wèe na bye pyegana lemu na, na wu yaha kari wu tayirige ni ge, yi lee jo wù mu.» 3 A pʼi jo: «Yi bu jo yʼi Izirayɛli nagoo pu wo Kilɛ wu wo Kariɲɛɛgɛ Ɲɔmɛɛ li Keshi wu yaha kari, yi ganha da wu niwaga yaha gari wɛ. Ga yi yaaŋa saraga taha wu na yi shɛ gan. Lee bu bye yi na sicuumɔ ta, lemu na wʼa wu keŋɛ ki fanha ki digi yi na ge, yi na lee bɛ cɛ.» 4 A Filisiti shɛɛn pʼi jo: «Yaaŋa saraga kekɛ tuugo wèe dʼa yaa na wolo kan wu mu wɛ?» A saraya ɲaha shɔɔnrivɛɛ ni celɔbyii pʼi jo: «Yi sanni tɔɔrɔ ɲa, yʼi ti yàa ba nɔɔwaya kaguro ɲɛ wɛ, ni kanifɔyɔ kaguro, na saha ni Filisiti shɛɛn pu ɲuŋɔfɛɛ pu ɲɔ ki ni. Bani yee nɔɔwaya yʼa foro yee ni yi ɲuŋɔfɛɛ pu bɛɛri na. 5 Yi nɔɔwaya jaalaa yàa, yʼi kanifɔyɔ yi bɛ wo jaalaa yàa, yee yemu yʼa yi fiige ki kyɛɛgi ge, yʼi nɔɔrɔ taha Izirayɛli wo Kilɛ wu na. La wa la ni wu da wu keŋɛ ki fanha digi nige yi na wɛ, wʼi da ki digi nige yi kilɛlɛɛ pee ni yi fiige ki bɛ na wɛ. 6 Yi ganha bu yi ɲuwegee waha ba Misira shɛɛn ni Farawɔn ya pye wɛ. Ta we Kilɛ we ya wu keŋɛ ki fanha digi pu na, fo pʼa Izirayɛli nagoo pu yaha kari wɛ? 7 Ayiwa, yi wotori nivomɔ wa tɛ, yʼi nushaa shuun wa co nulɛgɛɛ ɲɛ piimu fɛni, pʼi sanha zhu taha ɲa wa katige ni pu ni-i ge. Yʼi nushaa pu pɔ wotori wu na, ga yʼi nulɛgɛɛ ki yaha kari kashɔ ki na. 8 Yʼi Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu lɔ le wotori wu ni. Yʼa yaŋmuyɔ yemu yàa ni sanni ni di ba daga yi wo piinŋɛ ki yàa ge, yʼi yee le keshire la ni yi yaha Kariɲɛɛgɛ Ɲɔmɛɛ li Keshi wu kabanugo. Lee kadugo na yʼi wu yaha kari. 9 Wu nigariwo, yi da wu wii, wu bu pu wo fiige ki koo li co na gaaŋi Bɛti-Shemɛshi kulo li yíri, wù na li cɛ na Tɛhɛnɛ Baa Kilɛ wʼa le kakuunɔ le bɛɛri pye wù na. Ga wu bye wʼi ya shɛ lee koo li ni wɛ, lee ya li shɛɛ na puyɛ ni pee kanhama nigbɔ pʼa nɔ wèe na, pu ya ta yìri Kilɛ yíri wɛ.» 10 Ayiwa, a pʼi li pye mu. A pʼi nushaa shuun wa co piimu ɲɛ ni nulɛgɛɛ ni, zhu di sanha daha ɲa wa katige ni-i ge. A pʼi shɛ nulɛgɛɛ ki pɔ kashɔ ki na. 11 A pʼi Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu le wotori wu ni na fara keshipire li na lee lemu funŋɔ ni sanni nɔɔwaya ye ni kanifɔyɔ yi wo jaalaa pu ɲɛ ge. 12 A pee nushaa pʼi dii cibɛ Bɛti-Shemɛshi koo li ni, na mɛɛ suu na gaaŋi, pu ya waa kanige kelee kamɛnɛ cɛ wɛ. A Filisiti shɛɛn ɲuŋɔfɛɛ pʼi daha pu fɛni, fo na shɛ nɔ pu ni Bɛti-Shemɛshi kodɛhɛnɛ li na. 13 Lee bi Bɛti-Shemɛshi shɛɛn ta pu na alikama kuun fadaaŋa ki na. Ba pʼa pa pu ɲuyɔ yirige na Kariɲɛɛgɛ Ɲɔmɛɛ li Keshi wu ɲa wɛ, a lee di sii taan pu ni xuuni. 14 Ba wotori wʼa nɔ Bɛti-Shemɛshi shɛɛn Zhozuwe wo tɛgɛ ki ni wɛ, na yere wà. Lee bi faatabaaga ka ta wà. A pʼi wotori wu kɔrɔyɔ yi ja, na niiyɛ yi pye saraya nizogoyo Tɛhɛnɛ Baa Kilɛ mu. 15 Lee bi Levi wo tirige shɛɛn pu ta pʼa Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu tirige na fara keshipire le ni li funŋɔ yaŋmuyɔ sanni woyo yi na. A pʼi yi taha faatabaaga ki ɲuŋɔ ni. Kee caŋa kiyɛ pyaa a Bɛti-Shemɛshi shɛɛn di saraya nizogoyo ni ɲaɲiŋɛ saraya wolo kan Tɛhɛnɛ Baa Kilɛ mu. 16 Filisiti shɛɛn ɲuŋɔfɛɛ kaguro wu wi ge, a pee kunni di kii keree ki bɛɛri ɲa. Lee kadugo na, a pʼi guri kee canuŋɔ ke na pa Ekurɔn ni.17 Filisiti shɛɛn pʼa sanni wu taga nɔɔwaya jaalaa piimu yàa na kan Tɛhɛnɛ Baa Kilɛ mu pu wo yaaŋa saraga ki ge, pee jaalaa pu pu wa mɛ: Ashidɔdi kulo li wo jaa nigin, Gaza kulo li wo nigin, Ashikalɔn kulo li wo nigin, Gati kulo li wo nigin ni Ekurɔn kulo li wo nigin. 18 A pʼi sanni kanifɔyɔ bɛ yàa na bɛ ni Filisiti shɛɛn ɲuŋɔfɛɛ kaguro wu wo kulogoo ki ɲɔ ki ni, na co kashɛn ɲaha kɔn kɔn kulogoo ki na, fo na shɛ nɔ kashɛn ɲaha kɔn kɔn kasɔrɔyɔ baa wo kulogoo ki na. Faatabaaga kemu na pʼa bi Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu yaha Bɛti-Shemɛshi shɛɛn Zhozuwe wo tɛgɛ ki ni ge, kee faatabaaga ke wa wà niɲaa we bɛ ni.
19 A Tɛhɛnɛ Baa Kilɛ di bɔɔngɔ shan Bɛti-Shemɛshi shɛɛn ɲuŋɔ ni, bani pee bi Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu funŋɔ ki wii. A wu sipyii kɛlɛɛ gbarashuun (70) gbo sipyiire ti ni. A sipyiire tʼi pee ɲɛsinmɛ pu wo, bani kawaa nigbɔɔ Tɛhɛnɛ Baa Kilɛ bi shan pu ɲuŋɔ ni. 20 A Bɛti-Shemɛshi shɛɛn pʼi jo: «Jɔgɔ wʼi da já yere Tɛhɛnɛ Baa Kilɛ ɲaha tàan wɛ, we fɛfɛɛrɛ Kilɛ we? Wèe ma shɛ wu Kariɲɛɛgɛ Ɲɔmɛɛ li Keshi wu lɔ laha wuyɛ ɲuŋɔ ni, na shɛ wu yaha mii wɛ?» 21 A pʼi tuduro yaha shɛ jo Kiriyati-Yarimu shɛɛn mu na: «Filisiti shɛɛn pʼa Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu kuruŋɔ na pa. Yi pa yʼi ba wu lɔ yʼa se yiyɛ yíri.»