Kilɛ ya Filisiti shɛɛn pu kanha Kariɲɛɛgɛ Ɲɔmɛɛ li Keshi wu kaa na
5
Ayiwa, ba Filisiti shɛɛn pʼa Kilɛ wo Kariɲɛɛgɛ Ɲɔmɛɛ li Keshi wu co wɛ, na yìri ni wu ni Ebɛn-Ezɛri ni, na gari ni wu ni Ashidɔdi kulo li ni. 2 Yapɛrɛ la bye pu mu li mɛgɛ di ɲɛ na Dagɔn. A pʼi gari ni wu ni lee yapɛrɛ li wo pɛɛŋɛ puga ki ni, na shɛ wu yaha lee tàan. 3 Ɲimuguro ti na, a Ashidɔdi shɛɛn di ba soo yìri, na shɛ Dagɔn ta wʼa to na ɲaha ke buri ɲiŋɛ na Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu fɛɛ ni. A pʼi wu yirige, na wu yaha wu talɛgɛ ni. 4 Tee ɲimuguro ti bɛ na, ba pʼa sɔɔ yìri wɛ, na shɛ Dagɔn ta wʼa to na ɲaha ke buri ɲiŋɛ ki na Kilɛ wo Kariɲɛɛgɛ Ɲɔmɛɛ li Keshi wu fɛɛ ni. Dagɔn ɲuŋɔ ni wu keye ye di ɲɛ wu gbaha ki kuɲɔwii li ni, yi nigɔnyɔ. A wu ceefuu li yɛ nigin di gori. 5 Lee lʼa li pye, fo na pa nɔ niɲaa na, Dagɔn wo saraya ɲaha shɔɔnrivɛɛ pee, ni piimu bɛɛri pʼa jin wu puga ki ni Ashidɔdi kulo li ni ge, wee wa ya wu tɔɔgɔ shaan kuɲɔwii li ni wɛ.6 Lee kadugo na, a Tɛhɛnɛ Baa Kilɛ di wu keŋɛ ki fanha digi Ashidɔdi shɛɛn na, na kanhama nigbɔ shan pu ɲuŋɔ ni. A wu nɔɔwaya yeege Ashidɔdi ni wu mahama shɛɛn pu na. 7 Ba Ashidɔdi shɛɛn ya lee ɲa wɛ, na jo: «Izirayɛli nagoo pu wo Kilɛ wu Kariɲɛɛgɛ Ɲɔmɛɛ li Keshi wu da ga yaha naha nige wèe mu wɛ, bani wʼa wu keŋɛ ki fanha digi toro wèe na, na ki digi Dagɔn bɛ na, wèe wo kilɛ we.» 8 A pʼi Filisiti shɛɛn wo ɲuŋɔfɛɛ pu bɛɛri yiri na pa binnɛ puyɛ yíri, na jo: «Dii wèe dʼa yaa na Izirayɛli nagoo pu Kilɛ wu wo Kariɲɛɛgɛ Ɲɔmɛɛ li Keshi wu pye wɛ?» A ɲuŋɔfɛɛ pʼi jo: «Wù shɛ Izirayɛli nagoo pu Kilɛ wu wo Kariɲɛɛgɛ Ɲɔmɛɛ li Keshi wu yaha Gati kulo li ni.» A pʼi wu yaha kari wà. 9 Ga ba wʼa nɔ yɛ Gati kulo li ni wɛ, a Tɛhɛnɛ Baa Kilɛ di wu keŋɛ ki digi Gati shɛɛn pu na, fo na pu jaalaa yirige. A wu yama wá kulo li shɛɛn pu bɛɛri na, nɔhɔpiire fara sipyilɛyɛ na. A nɔɔwaya di foro pu na. 10 A pʼi Kilɛ wo Kariɲɛɛgɛ Ɲɔmɛɛ li Keshi wu yaha kari Ekurɔn kulo li ni. Ba Kilɛ wo Kariɲɛɛgɛ Ɲɔmɛɛ li Keshi wʼa jé Ekurɔn kulo li ni wɛ, a Ekurɔn shɛɛn pʼi ganha na sipyaa waa, na yu: «Pʼa Izirayɛli shɛɛn pu Kilɛ wu Kariɲɛɛgɛ Ɲɔmɛɛ li Keshi wu yaha pa naha wèe mu, kɔnhɔ pʼi ba wù gbo, wù ni wù sipyii pu ni!» 11 A pee bɛ di Filisiti shɛɛn ɲuŋɔfɛɛ pu yiri pinnɛ, na jo: «Yi Izirayɛli nagoo pu Kilɛ wu Kariɲɛɛgɛ Ɲɔmɛɛ li Keshi wu kuruŋɔ yi shɛ gan pu mu, kuu wemu ni wʼa yìri ge, yi wu kuruŋɔ shɛ wà, kɔnhɔ wu ganha bu ba wù ni wù kulo li shɛɛn pu bɛɛri gbo wɛ!» Lee bi Ekurɔn kulo li shɛɛn pu bɛɛri ta pu jaalaa ya yìri xɔ, bani Tɛhɛnɛ Baa Kilɛ bi wu keŋɛ ki digi pu na fo xuuni. 12 Piimu pu ɲɛ pee ya ta xu wɛ ge, a nɔɔwaya di foro pee na, a kulo li shɛɛn pu mɛkaaya yʼi ganha na nɔni fo fugba wu ni.