Filisiti shɛɛn pʼa Izirayɛli nagoo kemɛ gbo
4
Ayiwa, a Samuwɛli di ganha na Tɛhɛnɛ Baa Kilɛ wo jomɔ pu yu Izirayɛli nagoo pu bɛɛri mu. Caŋa ka Izirayɛli nagoo pʼa pa shɛ Filisiti shɛɛn ɲuŋɔ círi kashɛn kaa na. A pʼi shɛ pu wo kashɛn keŋɛ ki sin Ebɛn-Ezɛri ni. A Filisiti shɛɛn di pu wogo ki sin Afɛki ni. 2 A Filisiti shɛɛn pʼi kashɛn ki gbegele Izirayɛli nagoo pu kaa na. A pʼi kashɛn ki ɲɔ co. A Filisiti shɛɛn di já Izirayɛli nagoo pu na na pu kashɛnŋmuu kabɔfoŋɔɔ shishɛɛrɛ (4.000) shishiin gbo kashɛn ki sige ki ni. 3 Ba sipyiire tʼa kuri pa pu kashɛn ki tasinŋɛ ki ni wɛ, a Izirayɛli nɔhɔlɛɛ pʼi jo na: «Ɲaha na Tɛhɛnɛ Baa Kilɛ dʼa wù le Filisiti shɛɛn pu keŋɛ ni pʼa kemɛ gbo mɛ niɲaa wɛ? Wù shɛ Silo ni wù shɛ Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi† wu lɔ, kɔnhɔ wu bye wù niŋɛ ni, wu wù shɔ wù pɛɛn pu na.» 4 Wee tuun wu ni, a pʼi sipyii pii tun kari pʼa shɛ Tɛhɛnɛ Baa Kilɛ, Kashɛn Keye yi Fɔɔ wu wo Kariɲɛɛgɛ Ɲɔmɛɛ li Keshi wu lɔ Silo kulo li ni, wee wemu wʼa tiin serubɛɛn pu niŋɛ ni ge. A Eli wo jalaa shuun we, Ofini ni Finiyasi, a pee di daha Kilɛ wo Kariɲɛɛgɛ Ɲɔmɛɛ li Keshi wu na.a5 Ba Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wʼa nɔ yɛ buguro ti na wɛ, a Izirayɛli nagoo pu bɛɛri di ganha xhuulo xuuni, a ɲiŋɛ kʼi jɛlɛ. 6 A kee mujoŋɔɔ kʼi nɔ Filisiti shɛɛn pu na, a pʼi jo: «Kii xuguŋɔɔ kii kʼa fòro Heburuu pu wo buguro ti na ge, kee di ɲɛ ɲaha wogoo wɛ?» A pʼi li cɛ na Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu wʼa nɔ Izirayɛli shɛɛn pu wo buguro ti na. 7 A Filisiti shɛɛn pʼi fya. Pu bi yu na: «Kilɛ ya nɔ kashɛn keŋɛ ki tasinŋɛ ki ni! Pati! Kapii lʼa wèe ta mɛ! Le ɲɔhɔ sanha bye ɲa wɛ! 8 Pati! Bɔɔngɔ ki wa wèe wogo! Jɔgɔ wu di da ba wèe shɔ pii kilɛlɛɛ baraga wuu pii na wɛ? Pee kilɛlɛɛ pu pʼa kawagaa tuuyo yi bɛɛri shan Misira shɛɛn pu ɲuŋɔ ni siwaga ki ni. 9 Yi yi logoo ki waha Filisiti shɛɛn, yʼi nara le yiyɛ ni, lee bɛ wɛ yi na ba bye Heburuu pu wo buloo ba pee ya pye mɛ yi wo buloo wɛ! Yi nara le yiyɛ ni, yʼi kashɛn ki ŋmɔ!» 10 Wee tuun wu ni a Filisiti shɛɛn pʼi kashɛn ki ŋmɔ, na se ta Izirayɛli nagoo pu na. A pʼi baa kari pu fàya buguloo pu ni. A gbuuro tʼi digi Izirayɛli nagoo pu na fo xuuni, a pu sɔrɔsii tɔdiiye fɛɛ kabɔfoŋɔɔ xhuu kɛlɛɛ taanri (30.000) di do. 11 A Filisiti shɛɛn pʼi Kilɛ wo Kariɲɛɛgɛ Ɲɔmɛɛ li Keshi wu co. A Eli jalaa shuun wu xhu, Ofini ni Finiyasi ni.
Saraya ɲaha shɔɔnrivɛɛ Eli wo xu keree
12 Ayiwa, a Bɛnzhamɛ wo tirige shɛn wa di yìri kashɛn sige ki ni, na baa kari Silo kulo li ni kee caŋa kiyɛ pyaa. Wu bi wu fàya yi shɛɛngi shɛɛngi, na gbazhɛnhɛ wo wu ɲuŋɔ ke ni. 13 Ba wee ya nɔ Silo kulo li ni wɛ, lee bi Eli ta wʼa tiin wu koro li ni, koo li ɲɔ ki na, na kashɛnŋmuu pu ɲaha wii, bani Kilɛ wo Kariɲɛɛgɛ Ɲɔmɛɛ li Keshi wu keree bi wu funŋɔ pɛn. Ba ná wʼa nɔ wɛ, na kashɛn ki keree paari, a kulo li bɛɛri di ɲɔ kɔn na sipyaa waa. 14 Ba Eli ya kee sipyaa ki logo wɛ, na yegeŋɛ pye na: «Pe tunmɔ nigbɔ pe wo ɲuŋɔ di ɲɛ lekɛ wɛ?» A ná wu togaaya lɔ fulo Eli na taapile ni, na kashɛn ki keree ɲaha jo wu mu. 15 Lee bi Eli shi wu ta yee kɛlɛɛ gbarashɛɛrɛ ni gbarataanri (98), wu bi ɲɛri xɔ fyɛn, wu bi ɲaa nige wɛ. 16 A ná wu Eli pye: «Kashɛn sige ki ni nɛ wʼa yìri na nɔni mɛ, nɛ tafɛrɛ wo wʼa yìri kashɛn sige ki ni niɲaa.» A Eli di wu pye: «Dii yi dʼa ta wɛ, na ja?» 17 A tudunmɔ wu Eli pye: «Izirayɛli nagoo pʼa paa Filisiti shɛɛn pu ɲaha na, a gbuuro tʼi digi sipyiire ti na fo xuuni, ali ma jalaa shuun wu bɛ ya xu, Ofini ni Finiyasi ni. A pʼi Kilɛ wo Kariɲɛɛgɛ Ɲɔmɛɛ li Keshi wu bɛ co!» 18 Ba ná wʼa ɲɔ le Kilɛ wo Kariɲɛɛgɛ Ɲɔmɛɛ li Keshi wu keree ni yɛ wɛ, a Eli di wolo to na caa wu koro li ni, kulo li tajege ki ɲɔ ki na, a wu katige kʼi gɛgi, a wu xhu, bani nabelɛgbɔhɔŋɔ ki bye kii. Yee kɛlɛɛ shishɛɛrɛ (40) wʼa bi ta ɲuŋɔfɛɛrɛ ti ni Izirayɛli nagoo pu ɲuŋɔ ni.
19 Ayiwa, lee bi Eli ja shɔ wu ta ni tidugumɔ ni, Finiyasi wo shɔ we. Wu tigiduun wu bi nɔ xɔ bɛ. Ba wee ya Kilɛ wo Kariɲɛɛgɛ Ɲɔmɛɛ li Keshi wu jo wu logo, na wu pelɛgɛ ke ni wu poo wu bɛ wo xhu wu logo wɛ, a wu leele, bani yama pʼa yìri, a yacɛrɛ lʼi digi. 20 Na wu yaha wu na taxuyo shaa, cèe piimu pu ɲɛ ni wu ni ge, a pee di jo: «Ma ganha bu fya wɛ, funana mʼa se!» Ga wu ya ta pu ɲɔ shɔ wɛ, wu ya ta kasɛɛgɛ yaha bɛ pu jomɔ pu na wɛ. 21 A wu funana li mɛgɛ le na Ikabodi (Lee kɔ́ri ɲɛ na nɔɔrɔ wu ɲɛ wà nige wɛ.) A wu jo: «Kilɛ wo nɔɔrɔ wʼa laha Izirayɛli na!» Kilɛ wo Kariɲɛɛgɛ Ɲɔmɛɛ li Keshi wu wo jo we, ni wu pelɛgɛ ke, ni wu poo wu wo xhu wu wuu na wʼa yee jo. 22 A wu jo: «Kilɛ wo nɔɔrɔ wʼa yìri laha Izirayɛli ɲuŋɔ ni, bani pʼa Kilɛ wo Kariɲɛɛgɛ Ɲɔmɛɛ li Keshi wu shɔ pu na.»