Tɛhɛnɛ Baa Kilɛ ya Samuwɛli yiri wu wo labye wu kaa na
3
Samuwɛli nɔhɔcɛrɛɛ wo wʼa bi labye pyi Tɛhɛnɛ Baa Kilɛ mu Eli kabanugo. Tɛhɛnɛ Baa Kilɛ na jo ni sipya ni, lee pyegee bi ta ɲɛhɛ wee tuun we ni wɛ, wu kashɛgɛɛ ki bɛ di bi fɔri kiyɛ ni wɛ. 2 Eli bɛ di bi ɲaa nige xuuni wee tuun wu ni wɛ, fyɛngɛrɛ tʼa bi wu tɛɛŋɛ. Caŋa ka piige ni, wu nizinnɛgɛ ya bi bye wu tasinnɛgɛ ki ni, 3 Kilɛ wo sokinna wu bi sanha fugi wɛ, Kariɲɛɛgɛ Ɲɔmɛɛ li wo Keshi wʼa bi bye xuu wemu ni Tɛhɛnɛ Baa Kilɛ wo puga ki ni ge, Samuwɛli nizinnɛgɛ ki bye wà. 4 Wee tuun wu ni a Tɛhɛnɛ Baa Kilɛ di Samuwɛli yiri. A wee di wu ɲɔ shɔ na: «Ooyi.» 5 A wu baa kari Eli yíri na shɛ wu pye: «Nɛ we, bani mʼa na yiri.» A Eli di wu ɲɔ shɔ na: «Nɛ ta ma yiri wɛ, shɛ sinnɛ!» A Samuwɛli di shɛ sinnɛ.6 A Tɛhɛnɛ Baa Kilɛ di wu yiri sanha. A Samuwɛli di yìri kari Eli yíri na shɛ wu pye: «Nɛ we, bani mʼa na yiri.» A Eli di wu ɲɔ shɔ na: «Nɛ ta ma yiri wɛ, na ja. Shɛ sinnɛ!» 7 Lee bi Samuwɛli ta wu sanha Tɛhɛnɛ Baa Kilɛ cɛ wɛ. Wu wo jomɔ pu bɛ bi sanha zhɛ wu na wɛ. 8 A Tɛhɛnɛ Baa Kilɛ di Samuwɛli yiri tɔɔɲii taanri wuu li ni. A wu yìri kari Eli yíri na shɛ wu pye: «Nɛ we, bani mʼa na yiri.»
Wee tuun wu ni a Eli di li ɲa na Tɛhɛnɛ Baa Kilɛ wʼa pya wu yiri. 9 A wu Samuwɛli pye: «Shɛ sinnɛ! Wu bu ma yiri sanha mʼa wu pye: ‹Tɛhɛnɛ Baa Kilɛ, ta yu, ma bulona wʼa ɲuwegee shan ni ma jomɔ pu ni!› » A Samuwɛli di guri kari wu tasinnɛgɛ ki ni. 10 A Tɛhɛnɛ Baa Kilɛ di shɛ yere wà na wu yiri ma na jo ba wʼa tee na li pyi wɛ, a wu jo: «Samuwɛli, Samuwɛli.» A Samuwɛli di wu ɲɔ shɔ na: «Ta yu, ma bulona wʼa ɲuwegee shan ni ma jomɔ pu ni.»
11 A Tɛhɛnɛ Baa Kilɛ di Samuwɛli pye: «Li wii nɛ na ba kaa la pye Izirayɛli nagoo pu niŋɛ ni, sipyaa sipya wʼa li logo ge, wufɔɔ na jiraŋi. 12 Yemu bɛɛri nɛ jo Eli wo puga ki shizhaa na ge, nɛ na ba yee bɛɛri pye di yi ɲɔ fa caŋa ka. Nɛ na ba li ɲɔ co, di li fa bɛ sanha. 13 Eli ya bi wu nagoo pu wo tiibaara ti cɛ. Lee na nɛ yi jo wu mu jo nʼa da ba jaagi kanhama shan yaha wu puga ki ɲuŋɔ ni fo gbee. Wu nagoo pʼa puyɛ pye laŋi nagoo, wu ya ta pu ɲaha kɔn lee na wɛ. 14 Lee wuu na nɛ kàa jo Eli wo puga ki tiibaara tʼa da ga jɔgɔ laha wà bada wɛ. Saraga kelee ma yakanga wa da já ti jɔgɔ laha wà wɛ.»
15 A Samuwɛli di sinnɛ yaha wà, fo na shɛ ɲiga mugi. Ba ɲiga kʼa mugi wɛ, a wu shɛ Tɛhɛnɛ Baa Kilɛ wo puga ki kuɲɔgɔɔ ki mugi. Wʼa bi fya a lee di wu pye wu ya ta já wu kaɲagaa ki paari Eli mu wɛ. 16 Ga a Eli di Samuwɛli yiri na wu pye: «Na ja, Samuwɛli.» A Samuwɛli di wu ɲɔ shɔ na: «Ooyi!» 17 A Eli di wu yege na: «Yekɛ Kafɔɔ dʼa jo ma mu wɛ? Nʼa ma ɲɛɛri ma ganha yafiin ŋmɔhɔ na na wɛ. Ma bye ma di ya kee keree ki bɛɛri jo na mu ki ɲɔporo na wɛ, Kilɛ wu bɔɔngɔ shan ma ɲuŋɔ ni, wu da la faraa ki na.» 18 Wee tuun wu ni a Samuwɛli di kee keree ki bɛɛri paari wu mu ki ɲɔporo na. Wu ya ta yafiin ŋmɔhɔ wu na wɛ. A Eli di jo: «Tɛhɛnɛ Baa Kilɛ wu wa wii! Lemu lʼa taan wu mu ge, wu lee pye!»
19 Samuwɛli bi lɛgi. Tɛhɛnɛ Baa Kilɛ bi bye ni wu ni. Wu nijoyo ya shishiin bi goroo fabaa wɛ. 20 Izirayɛli fiige ki bɛɛri ni, na co Dan kulo li na fo na shɛ nɔ Bɛɛrisheba kulo li na, Izirayɛli nagoo pʼa bi li cɛ na Tɛhɛnɛ Baa Kilɛ wo tudunmɔ wu ɲɛ Samuwɛli. 21 A Tɛhɛnɛ Baa Kilɛ di ganha na wuyɛ shɛɛ Silo kulo li ni. Tɛhɛnɛ Baa Kilɛ bi wuyɛ shɛɛ Samuwɛli na wee xuu wu ni, na wu jomɔ pu yu wu mu.