Anɛ wo Kilɛ masɔŋɔ yogo
2
Ayiwa, a Anɛ di Tɛhɛnɛ Baa Kilɛ ɲɛɛri na jo:«Tɛhɛnɛ Baa Kilɛ baraga ni
nɛ zɔ wʼa ɲi fundanga na.
Tɛhɛnɛ Baa Kilɛ baraga ni
nɛ ɲuyirige ta.
Nɛ ɲɔ kʼa mugi na pɛɛn pu fɛni,
na funŋɔ kʼa taan
bani mʼa na ɲuŋɔ wolo.a
2 Wa shishiin ɲɛ fɛfɛɛrɛ fɔɔ
ba Tɛhɛnɛ Baa Kilɛ ɲɛ wɛ.
Kilɛ watii ɲɛ wà nige
Tɛhɛnɛ Baa Kilɛ kadugo na wɛ.
Faaboboŋɔ katii ɲɛ wà nige
na wèe ɲuŋɔ sigee
ba wèe wo Kilɛ wu ɲɛ-ɛ wɛ.
3 Yi ganha ba tabaara jomɔ pu ɲɛhɛŋi nige wɛ!
Ɲuŋɔ baa jomɔ ganha ba fòro nige
yi ɲɔyɔ ni wɛ,
bani Tɛhɛnɛ Baa Kilɛ ɲɛ Kilɛ
wemu wʼa keree bɛɛri cɛ ge.
Wʼa sipyiire ti wo keree
ki bɛɛri taanna na wii.
4 Kashɛnŋmuu pu wo sindaa kʼa kɛgi.
Ga a baraga baa fɛɛ pʼi baraga taga puyɛ niŋɛ pɔ.
5 Piimu pʼa bi li na dinni ge,
pee wa puyɛ pɛrɛɛ nimɛ, kɔnhɔ pʼi da li.
Ga piimu pu bye xuugo fɛɛ pu ge,
pee wa ŋmɔnɔ na.
Seganha wʼa se tɔɔɲii gbarashuun.
Ga jalaa niɲɛhɛmɛɛ fɔɔ wu wo sege kʼa yere.
6 Tɛhɛnɛ Baa Kilɛ wʼa xu nɔni sipya na,
wee wʼa ɲiifɛɛrɛ kaan sipya mu.
Wee wʼa sipya nɔni yaŋa kanha na,
na sipya yeege ki ni.
7 Tɛhɛnɛ Baa Kilɛ wʼa sipya pyi lafɔɔ
kelee la baa fɔɔ.
Wee wʼa sipya tirige,
na wu yirige.
8 Wʼa funmɔ fɔɔ yirige na lɛri ɲiŋɛ na,
na la baa fɔɔ yirige na lɛri kaafugo na,
na pu teŋɛɛ fanhafɛɛ tɛ ni.
Wʼa saanra koro nɔɔrɔ wuu kaan pu mu pu taa.
Bani Tɛhɛnɛ Baa Kilɛ wogoo ki ɲɛ ɲiŋɛ ki tinyeeŋɛɛ kee.
Kee ɲuŋɔ ni wʼa koŋɔ ki sin.
9 Wʼa wu ɲìi fyaara fɛɛ pu ɲuŋɔ sigee.
Ga sipyikuuyo yi wa bɛnri nibiige ki ni.
Bani sipya wo fanha ki ya wu pyi se tavɔɔ wɛ.
10 Piimu pʼa yogo shaa Tɛhɛnɛ Baa Kilɛ mu ge, pee ɲuŋɔ na ba dugo.
Wu na ba Kilɛ-sɛlɛnɛ yaha ba pee fɛni na yìri fugba wu ni.
Tɛhɛnɛ Baa Kilɛ na ba kiiri kɔn ɲiŋɛ ki tɛhɛŋɛɛ ki na.
Wu na ba sefɛɛrɛ kan wu saan wu mu.
Ná wemu wʼa shɔɔnri lɔ ge, wu na ba wee ɲuŋɔ yirige.»
11 A Ɛlikana di guri kari wu puga Arama kulo li ni, ga a funana lʼi gori Tɛhɛnɛ Baa Kilɛ wo labye wu bye kaa na saraya ɲaha shɔɔnrivɔɔ Eli tàan wà.
Eli jalaa pu wo kapyegee kee
12 Eli jalaa pu kunni ya bye zɔguuyo sipyii, pu ya bi Tɛhɛnɛ Baa Kilɛ cɛ wɛ. 13 Saraya ɲaha shɔɔnrivɛɛ pu bye pii, ga keree kiimu pʼa bi byi sipyiire ti na ge, kee ki wa mɛ: Ba sipya wa ya shɛ saraga wolo wɛ, pu ba xaara ti sori tuun wemu ni, pu wo kapyebye wa na nɔ ni ganhaa taanri ŋmaa ni, 14 na lee taga xaara ta su na wolo yaaga ki funŋɔ ni, kelee tɔɔrɔ shɔɔ li funŋɔ ni, kelee puuro shɔɔ li funŋɔ ni, kelee golɛgɛ ki funŋɔ ni. Ŋmaa li bu foro ni xaara temu bɛɛri ni, saraya ɲaha shɔɔnrivɔɔ wu ma tee lɔ. Izirayɛli nagoo piimu bɛɛri pu bi ma Silo kulo li ni ge, le pu bi byi pee na. 15 Saraya ɲaha shɔɔnrivɔɔ wu wo tudunmɔ wu ma ba na ta pu sanha sìnmɛ puyɛ pyaa bɛ sòrogo wɛ, na jo: «Yi xaara ta kan wù shɛ tee kaa wù kan saraya ɲaha shɔɔnrivɔɔ wu mu. Wʼa da ba sɔɔ xashɔhɔrɔ na ma mu wɛ, fo xapirire.»
16 Ná wu bu wu pye: «Yere pʼi fɛnhɛ sìnmɛ pu sorogo, lee bu bye, ma na já ma ɲidaan wuuro lɔ.» Tudunmɔ wu ma jo: «Ahayi! Ti kan nimɛ, kelee di ti lɔ fanha na.»
17 Pee naɲilee pu wo jurumu wʼa pa bɛlɛ Tɛhɛnɛ Baa Kilɛ ɲaha tàan, bani pʼa bi Tɛhɛnɛ Baa Kilɛ wo saraya yi fanri.
18 Ga Samuwɛli bi wu wo labye wu pyi Tɛhɛnɛ Baa Kilɛ ɲaha tàan. Nɔhɔcɛrɛɛ wʼa bi bye wee tuun wu ni. Lɛn fàya wo Efodib fadebire wu bi le. 19 Yee bɛɛri Samuwɛli nu wu bi ma fadeboonɔ la jooli, wu ni wu poo wu ba se yeeciri saraga ki tawologo ni, wʼa shɛ lee fadeboonɔ li kan Samuwɛli mu. 20 A Eli di ba duba pye Ɛlikana ni wu shɔ wu mu na jo: «We cee we ya pya wemu kan Tɛhɛnɛ Baa Kilɛ mu ge, Tɛhɛnɛ Baa Kilɛ wu nagoo pii bɛ da wu mu wu yaha we pya we tɛgɛ ma mu.» Lee kadugo na, a pʼi guri kari pu puga. 21 A Tɛhɛnɛ Baa Kilɛ di duba Anɛ mu. A wu jalaa taanri ni pushaa shuun se. Samuwɛli kunni bye na lɛgi Tɛhɛnɛ Baa Kilɛ ɲaha tàan.
Eli ya wu jalaa pu yɛri, ga pu ya logo wɛ
22 Ayiwa, Eli bi sii lɛ fo xuuni. Wu jalaa pu bi lemu pyi Izirayɛli nagoo pu na ge, a wu lee logo. A wu yi logo sanha bɛ na cèe piimu pu bi labye pyi Ɲuŋɔ Tacirige Fàya Puga ki tajege ki ɲɔ ki na ge, na pu bi sinnɛɛ ni pee ni. 23 A wu pu pye: «Ɲaha na yee di we kashi we pyi wɛ? Nɛ yee kapyegee niguuŋɔɔ ki kaa nuri sipyiire ti bɛɛri ɲɔ na. 24 Ahayi, na nagoo, yemu nɛ nuri ge, yee ya bɛ wɛ. Jurumu ni yee wa Tɛhɛnɛ Baa Kilɛ wo sipyii pu ŋmunuŋɔ na leni. 25 Sipya wa bu jurumu pye wu sipyiɲii na, Kilɛ wu da wee kiiri wu kɔn. Ga wa bu jurumu pye Tɛhɛnɛ Baa Kilɛ na, jɔgɔ na wee kiiri wu kɔn wɛ?» Ga pu ya sɔɔ na pu to wu jomɔ pu logo wɛ, bani Tɛhɛnɛ Baa Kilɛ funŋɔ ki bye na pu gbo.
26 Ayiwa, Samuwɛli lɛvɛɛrɛ wo wu bi lɛgi. Wu kaa bi dan Tɛhɛnɛ Baa Kilɛ ni, na dan sipyiire ti bɛ ni.
Yemu Tɛhɛnɛ Baa Kilɛ ya jo Eli ni wu puga ki shizhaa na ge
27 Caŋa ka Kilɛ wo sipya wa ya pa shɛ Eli yíri na shɛ wu pye: «Yemu Tɛhɛnɛ Baa Kilɛ ya jo ge, yee yi wa mɛ: ‹Na Izirayɛli nagoo pu yaha Misira fiige ki ni Farawɔn keŋɛ ni bulooro ti labye wu ni, ta nɛ ya nayɛ shɛ wee tuun wu ni ma sefɛlɛ Aarɔn ni wu kpuun li na wɛ? 28 Nɛ wʼa wu ɲaha bulo na foro Izirayɛli nagoo pu bɛɛri niŋɛ ni, wu da na wo saraya ɲaha shɔɔnrivɛɛrɛ ti pyi, wu da se ni saraya ni na wo saraya tawologo ki ni, wu da nudanga yawurire sòrogo, wu da efodi† fadeŋɛ leni na ɲaha tàan. Saraya yemu bɛɛri Izirayɛli nagoo pʼa wo ge, nɛ yee bɛɛri kan ma sefɛlɛɛ pu puga ki mu.c 29 Ayiwa, nɛ saraya ni yakanya yemu kaa jo jo pʼa yee kaan na mu na puga ki ni ge, a ɲaha di li pye mu ni ma nagoo pu jate ya ta nɔ yee na-ɛ wɛ? Yi dʼa ta dii a mu di ganha na ma nagoo pu pɛlɛ na toro nɛ tàan wɛ? A yʼi ganha na yi yacɛrɛɛ ɲini ni nɛ wo sipyii pu wo saraya yi nijeye yi ni, pee piimu pu ɲɛ Izirayɛli nagoo pu ge. 30 Lee wuu na: “Nɛ bi jo jo mu wo puga ke ni ma sefɛlɛ wu wo puga ki kʼa da ba labye pyi nɛ ɲaha tàan fo gbee”, Tɛhɛnɛ Baa Kilɛ, Izirayɛli wo Kilɛ wu ɲɔjomɔ pi. Ga nimɛ, Tɛhɛnɛ Baa Kilɛ ɲɔjomɔ pi: “Kee fungɔngɔ ke sanha ya lii nɛ na, bani sipyii piimu pʼa nɛ pɛlɛ ge, pee nɛ bɛlɛ, ga piimu pʼa nɛ fanri ge, pee bɛ na ba fanha. 31 Caya ya wa ma, nɛ na ba ma baraga ki xɔ, di ma sefɛlɛ wu bɛ wo puga ki baraga xɔ, sipyilɛgɛ da ba da nige ma puga ki ni wɛ. 32 Ma na ba kawagaa niɲɛhɛŋɛɛ ɲa nɛ wo puga ki shizhaa na, na ta keree ki bɛɛri di ɲɔgi Izirayɛli wo puga ki mu. Sipyilɛgɛ ka shishiin wa da ba ɲa nige ma puga ki ni wɛ. 33 Ga lee bɛ na, ma puga ki shɛn wemu bɛɛri ba ma faa nɛ wo puga ki wo kapyeŋɛɛ ki na, wee na ba ɲɛsinmɛ yeege ma ɲaha ki ni, na funyaŋa waa ma na. Ma puga ki shɛɛn pusamaa bɛɛri na ba xhuli lɛbaa. 34 Lemu nʼa da ba bye ma jalaa shuun, Ofini ni Finiyasi na ge, lee na ba bye ɲaha shɛshɛɛrɛ temu ya li shee na kii keree kii na ba ma ta ge. Pu shuun wu bɛɛri na ba xhu canuŋɔ. 35 Kadugo tàan nɛ ma ba saraya ɲaha shɔɔnrivɔɔ watii shɔɔnri lɔ nayɛ mu, wemu ɲɛ nʼa daa fɔɔ ge. Wee na ba nɛ ɲidaan bɛɛri ni na fungɔngɔ bɛɛri fani. Nɛ na ba baraga le wu tirige shɛɛn pu ni. Nɛ ba saan wemu bɛɛri shɔɔnri lɔ, na wee teŋɛ, pʼa ganha na saraya ɲaha shɔɔnrivɛɛrɛ ti wo kapyeŋɛɛ ki pyi wee saan wu ɲaha tàan. 36 Ma tirige shɛɛn piimusamaa pu da ba gori ge, pee na ba se na nuguro sinni pee saraya ɲaha shɔɔnrivɛɛ pu fɛni, na wari tuuŋɔɔ ni buuri ɲɛɛri pu mu. Ma tirige shɛɛn pu na ba saraya ɲaha shɔɔnrivɛɛ pu pyi na pu saraya ɲaha shɔɔnrivɛɛrɛ ti wo kapyeŋɛɛ kii kan pu mu, kɔnhɔ pu da daa pʼa li.”› »