1 Samuwɛli
Samuwɛli wo sɛmɛ nizhiimɛ we
Ɛlikana ni wu kpuun keree
1
Ná wa ya bye Aramatayimu-Zofimu kulo li ni, Efirayimu faaboboyo koomɔ pu ni, wu mɛgɛ ɲɛ na Ɛlikana. Wu to wu bi bye Yerowamu. Yerowamu to di ɲɛ Eliyu, Eliyu to di ɲɛ Toyu, Toyu to di ɲɛ Sufu, Efirayimu shi shɛn wʼa bi bye wii. 2 Cèe shuun pu bi bye wee ná wu mu. Nigin wa mɛgɛ ɲɛ Anɛ, wewu mɛgɛ di ɲɛ na Penina. Nagoo ya bi bye Penina mu, ga pya yafiin ya bi bye Anɛ mu wɛ.3 Yee bɛɛri Ɛlikana bi ma yìri wu wo kulo li ni na shɛ Kashɛn Keye yi Fɔɔ, Tɛhɛnɛ Baa Kilɛ pɛlɛ Silo kulo li ni, na yapɔrɔgɔ wolo sagara wu mu. Eli wo jalaa shuun we, Ofini ni Finiyasi ya bi Tɛhɛnɛ Baa Kilɛ wo saraya yi labye wu pyi wà. 4-5 Tuun bɛɛri ni Ɛlikana ya saraga wolo ge, wʼa wu wo taa li taa tahaa taanri, na shuun wu fara kiyɛ na ma kan wu shɔ Anɛ mu, na nigin wu taa wu shɔ Penina ni wu jalaa ni wu pushaa pu na. Wu bi lee pyi mu, bani wu shɔ Anɛ wu bi dan wu ni, ali na ta Tɛhɛnɛ Baa Kilɛ di bi ta pya kan bɛ wee mu wɛ. 6 Anɛ ɲiizhɔ wu bi ma wu loyire keree pyi, na wu kana, na ɲatanhaŋa nɔni wu na, bani Tɛhɛnɛ Baa Kilɛ bi ta pya kan Anɛ mu wɛ. 7 Ayiwa yee bɛɛri ba Ɛlikana ya shɛ Tɛhɛnɛ Baa Kilɛ wo puga ki ni wɛ, wʼa lee pye Anɛ mu. Ga Penina bi tiin na Anɛ kana tuun bɛɛri ni. Wu bi ma mɛɛ suu, na zhe lige na. 8 A Anɛ poo Ɛlikana di ba wu pye: «Anɛ, ɲaha na mʼa mɛɛ suu wɛ? Ɲaha na mʼa she lige na wɛ? Ɲaha kʼa ma ɲaha tanha wɛ? Ta nɛ ye jalaa kɛ na mu mu wɛ?»
Samuwɛli tagana
9 A yee la di ba nɔ, ba pʼa xɔ wà lige ke ni gba wu na lee kulo li ni wɛ, Silo kulo li ge, a Anɛ di yìri, na gari Tɛhɛnɛ Baa Kilɛ wo Fàya Puga ki yíri. Lee ya bi saraya ɲaha shɔɔnrivɛɛ Eli nidɛɛngɛ ta Kilɛ wo Fàya Puga ki ɲɔ na. 10 Anɛ funyaŋa wo bi ɲɛsinmɛ woni. Wʼa bi mɛɛ suu Tɛhɛnɛ Baa Kilɛ ɲaha tàan na wu ɲɛɛri. 11 A wu ɲɔfaaga faa na jo: «Ee Kashɛn Keye yi Fɔɔ Tɛhɛnɛ Baa Kilɛ, ma funŋɔ bi ɲɛ nidogo ma bulozhɔ wu kanhama pu na, ma funŋɔ bi ɲɛ nidogo wu na, ma bye ma di ya funŋɔ wɔ wu na wɛ, ma bu ja kan ma bulozhɔ wu mu, nɛ na ba wu kan Tɛhɛnɛ Baa Kilɛ mu, na co wu cazege ki na fo wu caxhugo ke, wu ɲuŋɔ da ga xhuu wɛ.»a 12 Anɛ wo Kilɛ-ɲɛrɛgɛ ki tɛhɛnɛ lʼa pa dɔnnɔ ge, a Eli di wu ɲɔsɛɛyɛ yi kasɛri, 13 na li ɲa na wʼa bi yu wuyɛ tàan, wu ɲɔsɛɛyɛ yʼa bi ɲɛri ga wu jomɔ pu bi nuri wɛ. Lee lʼa bi li pye Eli na giin na duvɛn wʼa gba na tin. 14 A Eli di wu pye: «Fo tuun wekɛ ni mu wo duvɛn wʼa da ba ma yaha wɛ? Shɛ ma sinzhɛɛnrɛ ti migile xuu watii ni.» 15 A Anɛ di wu ɲɔ shɔ na: «Uun na Kafɔɔ sinzhɛɛnrɛ bɛ wɛ, nɛ ɲɛ cee wemu ɲɛ ni funyaŋa ni ge. Nɛ ta duvɛn kelee kafugo yagbaga ka shishiin gba wɛ, na funŋɔ keree bɛɛri nɛ paari Tɛhɛnɛ Baa Kilɛ mu ki tɛhɛnɛ na. 16 Ma ganha bu ma bulozhɔ wu wii zɔguuŋɔ fɔɔ wɛ, bani na kanhama ni na loyire keree kʼa kasa ye, lee lʼa nɛ pye nɛ jo fo nimɛ.» 17 Wee tuun wu ni a Eli di jo: «Ma ɲaɲiŋɛ wo wʼa gaaŋi, yaaga kemu mʼa sha Izirayɛli wo Kilɛ wu mu ge, wu kee kan ma mu.» 18 A Anɛ di jo: «Ma bulozhɔ wu wu niimɛ ta ma ɲaha tàan.» Ba Anɛ ya yee jo xɔ wɛ, na foro na shɛ li, wu ɲaha kʼa bi tanha nige wɛ.
19 Kee caŋa ki ɲimuguro ɲisɔɔgbɔhɔ ki na, a pʼi shɛ nuguro sin Tɛhɛnɛ Baa Kilɛ fɛɛ ni na wu pɛlɛ. Ayiwa, a pʼi guri kari pu puga Arama kulo li ni.
Lee kadugo na a Ɛlikana ni wu shɔ Anɛ di binnɛ. A Tɛhɛnɛ Baa Kilɛ di wu funŋɔ nidogo yaha wu na. 20 Ba tuun wa ya pa nɔ wɛ, a Anɛ di yere yacɛrɛ na, na ja se, na pya wu mɛgɛ le Samuwɛli,b bani wʼa jo: «Tɛhɛnɛ Baa Kilɛ mu nɛ wu ɲɛɛri.»
Anɛ ya wu ja wu kan Tɛhɛnɛ Baa Kilɛ mu
21 Ayiwa, lee kadugo na a Ɛlikana di ba guri kari sanha Silo kulo li ni ni wu puga shɛɛn pu bɛɛri ni, kɔnhɔ wu shɛ yeeciri saraga ki wolo Tɛhɛnɛ Baa Kilɛ mu, ɲɔfaaga ke wʼa faa ge, wu kee bɛ wolo. 22 Ga Anɛ ya ta shɛ wɛ. Bani wʼa bi wu poo wu pye na: «Pya wu ɲɔ ba wolo jire ni, wee tuun wu ni nʼa da zhɛ ni wu ni, di shɛ wu kan Tɛhɛnɛ Baa Kilɛ mu, wu na gori yaha wà gbee.» 23 A wu poo Ɛlikana wu wu ɲɔ shɔ na: «Li pye ma ɲidaan pyegana na, kori naha fo ma ba shɛ pya wu ɲɔ wolo jire ni. Tɛhɛnɛ Baa Kilɛ ya ɲɔmɛɛ lemu lɔ ge, wu lee ɲɔ fa yɛ!c» A li shiin di bye mu, a cee wu gori wà, na ganha na pya wu kaan na ŋmari, fo na shɛ wu ɲɔ pye kʼa wolo jire ni.
24 Ayiwa, ba pya wu ɲɔ ya pa wolo jire ni wɛ, a Anɛ di gari ni wu ni Tɛhɛnɛ Baa Kilɛ wo puga ki ni Silo kulo li ni. A wu gari ni yee taanri nupeed bɛ ni, ni farini myɛ kiloo kɛ ni duvɛn sinmɛ koro bɛ. Lee bi pya wu ta sanha nɔhɔcɛɛrɛ. 25 A pʼi nupee li gbo, na gari ni pya wu ni Eli yíri. 26 A Anɛ di Eli pye: «Na kafɔɔ, kafari mʼa logo na ɲɔ na. Nɛ kàa jo nʼa da ga kafinɛyɛ jo ma mu wɛ, na kafɔɔ, cee wemu wu bi pa yere ma tàan caŋa ka na Tɛhɛnɛ Baa Kilɛ ɲɛɛri ge, nɛ wu ɲɛ wii. 27 We pya we kaa nɛ bi ɲɛɛri Kilɛ mu. A wu nɛ ɲɛrɛgɛ ki logo, na wee pya wu kan nɛ mu. 28 Lee wuu na nɛ pa wu kan Tɛhɛnɛ Baa Kilɛ mu. Wu na yaha Tɛhɛnɛ Baa Kilɛ mu wu ɲiifɛɛrɛ ti bɛɛri funŋɔ ni. Lee kadugo na, a pʼi nuguro sin, na Tɛhɛnɛ Baa Kilɛ pɛlɛ.»