Bowazi ya Wuruti leŋɛ
4
A Bowazi di gari kulo li tajege ki ɲɔ na, xuu wemu ni pʼa ma keree ki shɔɔnri ge, a wu shɛ diin wà. Bowazi bi ná wemu kaa jo Wuruti mu na ɲuwuuro tʼa wee tɛɛŋɛ xuuni ge, a wee di ba nɔ na doroo. A Bowazi di wu pye: «Ee! Shɛn wefɔɔ, gbara naha, mʼa diin!» A ná wu fulo, na diin. 2 Wee tuun wu ni a Bowazi di kulo li nɔhɔlɛɛ kɛ wa ɲaha bulo, na pee pye na pu bɛ pu pa diin. A pu bɛ di ba diin.3 Ayiwa, ɲuwuuro tʼa ná wemu tɛɛŋɛ xuuni ge, a wu wee pye: «Nɔmi kunni ya yìri Mowabu fiige ki ni na pa, mʼa lee cɛ. Wʼa li shɛ na wee da wù ceborona Elimelɛki wo tɛgɛ ki pɛrɛ. 4 Nɛ jo di yi jo ma mu, jo ma ki shɔ kulo li nɔhɔlɛɛ pee, ni sipyii pusamaa bɛɛri ɲii na piimu bɛɛri pu wa naha ge. Ma bu da ma na da wu ɲuŋɔ wolo, mʼa wu ɲuŋɔ wolo! Ma shiin bu da mʼa da wu ɲuŋɔ wolo wɛ, mʼa yee bɛ jo na ɲii na. Bani ɲuwuuro ti bu laha mu na, nɛ na tʼa da nɔ.» A ná wu jo: «Uun, nɛ na wu ɲuŋɔ wolo.» 5 A Bowazi di jo sanha: «Ayiwa, ma bu tɛgɛ ki shɔ Nɔmi mu, wee tuun wu ni mʼa yaa ma Mowabu shi shɛn Wuruti bɛ ɲuŋɔ wolo, kɔnhɔ shi di ba da wu poo wu nixhugo ki mu, wemu na ba bye wu cɛn wu lɔvɔɔ ge.» 6 A ná wu jo: «Wee tuun wu ni, ni li ɲɛ mu, nʼa da já wu ɲuŋɔ wolo nige wɛ, bani nɛ bu lee pye, nʼa da jaagi shan nayɛ pyaa wo cɛn wu na. Wu ɲuŋɔ wolo mayɛ mu, lee bɛ wɛ nʼa da já wɛ.» 7 (Taashiinɛ ni Izirayɛli ni, wa bu wa keŋɛ yaaga shɔ kelee na ma ɲuwuuro faa, kalɛɛ lemu li bi lee fiinŋɛ ge, lee li wa mɛ: Wa wu da wu wo tanhaŋa wolo, na ki kan wa mu. Lee ma li shɛ na lemu ɲɔ pu shuun wu bɛɛri ya wo ge, na pʼa bɛ li ɲuŋɔ ni.) 8 Ná wemu na ɲuwuuro ti bi nɔ ge, a wee di Bowazi pye: «Wu ɲuŋɔ wolo!» A wu wu tanhaŋa wolo na kan wu mu.
9 Ayiwa, sipyii piimu pu bye wà na fara nɔhɔlɛɛ pu na ge, a Bowazi di pu bɛɛri pye: «Yee pu wa li sɛɛrɛɛ niɲaa na jo yaaga yaaga kʼa bye Elimelɛki mu ge, ni yaaga yaaga kʼa pye Kilijɔn ni Makilɔn mu ge, nɛ yee bɛɛri shɔ Nɔmi mu. 10 Lee funŋɔ ni nʼa da Mowabu shi shɛn Wuruti lɔ na pye na shɔ, Makilɔn ya xu na cee wemu yaha ge, kɔnhɔ shi di ba da wu nixhugo ki mu, na fara lee na, kɔnhɔ wu mɛgɛ ki ganha bu biin fɛɛfɛɛ wu cebooloo pu niŋɛ ni wu to kulo li ni wɛ. Yee pu wa lee wo sɛɛrɛɛ niɲaa.»
11 Ayiwa, nɔhɔlɛɛ pu fara sipyii pusamaa bɛɛri na piimu bɛɛri pu bye kulo li tajege ki ɲɔ na ge, a pu bɛɛri di jo: «Uun, wèe wa li sɛɛrɛɛ. Cee we wʼa jin ma puga ki ni ge, Tɛhɛnɛ Baa Kilɛ wu wu pye ba Arasɛli ni Leya ɲɛ wɛ, pee piimu pʼa Izirayɛli nagoo pu bɛɛri se ge. Kilɛ wu fanha kan ma mu Efirata shi wu ni, wu mɛgɛ nigbɔhɔ da ma mu Bɛtilɛhɛmu kulo li ni! 12 Tɛhɛnɛ Baa Kilɛ wu nagoo niɲɛhɛmɛɛ da ma mu le cebilere le na, ma kpuun lʼi bye Pɛrɛzi wuu li tuugo, Tamari ya Pɛrɛzi wemu se Zhuda mu ge.»
Nɔmi ya ɲabige ka ta
13 Ayiwa, a Bowazi di Wuruti leŋɛ. A Tɛhɛnɛ Baa Kilɛ di duba wu mu. A wu yere yacɛrɛ na, na funana se. 14 A Bɛtilɛhɛmu wo cèe pʼi ganha na Nɔmi pyi: «Tɛhɛnɛ Baa Kilɛ wʼa sɔni! Sipya wemu wʼa da ba ma lɔ wu yere ni ma keree bɛɛri ni ge, wʼa wee pye wee ya se niɲaa. Kilɛ wu mɛgɛ nigbɔhɔ da we pya we mu Izirayɛli fiige ki ni! 15 We pya we na ba ma luu ɲiŋɛ, na yere ni ma keree ni ma ni ma lɛgɛ ki bɛ ni. Ma ja shɔ we, wʼa ye jalaa gbarashuun na, bani ma kaa lʼa dan wu ni. Wee wʼa ke ɲabige ke se ma mu.»
16 A Nɔmi di pya wu co, na wu taha wu dodoŋɔ na. Wee shiin wʼa wu lɔ, na ganha na wu biini. 17 A Nɔmi wo tiinɲii cèe pʼi ganha na mujoŋɔɔ waa na yu: «Nɔmi ya ja ta!» Pu ni Nɔmi ni, a pʼi pya wu mɛgɛ le na Obɛdi (lee kɔ́ri ɲɛ wemu wʼa fungɔngɔ yɛri sipya na ge). Obɛdi wʼa pye Izayi wo to we, Izayi di ɲɛ saannaa Dawuda to.
Saannaa Dawuda nɔhɔ tayirige
18 Pɛrɛzi wo kadugo ki sipyii pu mɛyɛ yi ye:
Pɛrɛzi wʼa Ɛsirɔmu se.
19 A Ɛsirɔmu di Aramu se.
A Aramu di Aminadabu se.
20 A Aminadabu di Nasɔn se.
A Nasɔn di Salimɔ se.
21 A Salimɔ di Bowazi se.
A Bowazi di Obɛdi se.
22 A Obɛdi di Izayi se.
A Izayi di saannaa Dawuda se.