Wuruti ya kaa lemu ɲɛɛri Bowazi mu ge
3
Caŋa ka Wuruti yashɔ Nɔmi ya pa wu pye: «Na poro, nʼa da xuu wa sha ma mu kɔnhɔ mʼa fɛrɛmɛ ta. 2 Bowazi wemu wo kapyebyezhaa ni mʼa bi labye wu pinnɛ na byi ge, wèe ceboro wu ɲɛ wii. Wee wʼa wu wo shinma shuu fuu niɲaa piige. 3 Wee tuun wu ni yìri mʼa wuu, mʼa nudanga sìnmɛ pa tìre, mʼa ma fazaaya yi le, mʼa shɛ shuu li na. Ga ma ganha bu mayɛ shɛ wu na na wu ta wu sanha li na gba wɛ. 4 Wu ba sinnɛ tuun wemu ni, mʼa wu tasinnɛgɛ ki kemɛ sɛɛri xuuni, mʼa fulo wu na, mʼa wu fatɔŋɔ ki laha wu tɔɔyɔ yi na, mʼa sinnɛ wu tɔɔyɔ yi ni. Mʼa yaa na lemu pye lee kadugo na ge, wuyɛ pyaa na yeesaya ɲaha jo ma mu.»5 A Wuruti di wu ɲɔ shɔ na: «Keree kiimu bɛɛri mʼa jo na mu ge, nʼa da zhɛ ki bɛɛri pye.» 6 A Wuruti di gari shuu li na, wu yashɔ wʼa keree kiimu bɛɛri jo wu mu ge, a wu shɛ kee bɛɛri pye.
7 A Bowazi di ba li, na gba a wu funŋɔ di sii taan xuuni, a wu gari na shɛ sinnɛ wu ɔrijɛ shinmapya wu tàan. A Wuruti di beele fulo wu na, na fatɔŋɔ ki laha wu tɔɔyɔ yi na, na sinnɛ wu tɔɔyɔ yi ni. 8 Ba ɲiŋɛ kʼa pa ɲi wɛ, a Bowazi di ba gburogi yìri, na joŋɔ wii wu tɔɔyɔ ni wɛ, na cee wa nizinnɛgɛ ta wà. 9 A wu jo: «Jɔgɔ wi wɛ?» A cee wu jo: «Nɛ Wuruti wi, ma kapyebyezhɔ we! Ma fatɔŋɔ ki tɔ na na, bani wèe ceboro wemu wʼa yaa na wèe ɲuŋɔ wolo ge, wee mu ɲɛ.»
10 A Bowazi di wu pye: «Wuruti, Tɛhɛnɛ Baa Kilɛ wu duba ma mu! Le mʼa pye mɛ nimɛ ge, lee ya li shɛɛ na mʼa pye ɲɔmɛɛ fɔɔ ma yashɔ wu shizhaa na na ye taashiinɛ li bɛ na. Bani mu bi da zii daha lɛvɛɛ pʼa nɔhɔ ni, pu kabyaa fɛɛ, kelee pu la baa fɛɛ. 11 Ayiwa nimɛ, ma ganha bu fya wɛ na poro. Ma bu kaa bɛɛri jo na mu, lee nʼa da bye ma mu. Bani pu bɛɛri ya li cɛ na mu ya pye cee wemu ya tii ge. 12 Can wu ɲɛ wii, nɛ kunni ɲɛ yee ceboro, wemu ya yaa na mu ɲuŋɔ wolo ge, ga yee ceboro wa ɲɛ wà, ɲuwuuro tʼa wee tɛɛŋɛ na ye nɛ na. 13 Shɔn naha! Di ba shɛ wee ná wu pɛrɛgi ɲiga ɲisɔɔgɔ na, wu bu da wu na da zɔɔ wu ma ɲuŋɔ wolo. Wu bu shɛ sɔɔ, wu na li pye. Wu bu shɛ li she, nʼa da ɲɔmɛɛ lɔ ma mu, jo nɛ na ma ɲuŋɔ wolo Tɛhɛnɛ Baa Kilɛ ɲìi wo wu mɛgɛ na. Sinnɛ naha fo ɲiga ba shɛ mugi!»
14 Wee tuun wu ni a Wuruti di sinnɛ Bowazi tɔɔyɔ yi ni fo na shɛ kpɛɛngɛ pye ki na woni. A wu ba sɔɔ yìri na kpɛɛngɛ ki ta ki sanha nɔ wa wu wa cɛ wɛ. Bani Bowazi bi wu pye na wu ganha bu sipya wa shishiin yaha wu li cɛ na cee wa wʼa pa shuu li na wɛ. 15 Ba wʼa yìri na giin da gaaŋi wɛ, a Bowazi di wu pye: «Pa ni ma fadegbɔhɔ ki ni! Mʼa ki co xuuni!» A wu ki co xuuni, a Bowazi di ɔrijɛ shinma kiloo kɛ ni kaguro shishiin le ki ni, na wu tugo ki taan, na ganha na gaaŋi kanha ki ni.
16 Ba Wuruti ya shɛ nɔ wu yashɔ wu na wɛ, a wee di wu yege na: «Dii yi dʼa shɛ da wɛ porofɔɔ we?» Lemu bɛɛri Bowazi ya pye wu mu ge, a wu lee bɛɛri paari wu yashɔ wu mu. 17 A wu wu yashɔ wu pye sanha: «Wee wʼa we ɔrijɛ shinma kiloo kɛ ni kaguro we kan nɛ mu, bani wʼa bi jo na nɛ kewaya wo ya yaa na kuri pa jé mu fɛni wɛ.» 18 Wee tuun wu ni a Nɔmi di wu pye: «Porofɔɔ we, tiin naha fo kii keree kii ba shɔɔnri shɔɔnrigana lemu na, bani wu ya kii keree kii shɔɔnri niɲaa wɛ, wu ɲaha da ga ɲiŋɛ wɛ.»