Sɔli ya se ta Amɔ shi shɛɛn pu na
11
Ayiwa lee kadugo na, a Amɔ shi shɛɛn pu wo saan Naxhashi di ba kashɛn keŋɛ yirige Yabɛshi kulo li fɛni Galadi koomɔ pu ni. A Yabɛshi shɛɛn pʼi wu pye na: «Kariɲɛɛgɛ ɲɔmɛɛ lɔ ni wù ni, wù na bye ma kapyebyii.» 2 Ga a Amɔ shi shɛɛn pu wo saan Naxhashi di jo: «Ma bu na ɲa nʼa kariɲɛɛgɛ ɲɔmɛɛ lɔ ni yi ni, fo yi bu sɔɔ di wa bɛɛri wo kanige cɛ ɲii le ja, di shiige wá Izirayɛli bɛɛri na lee wagana li na.» 3 A Yabɛshi wo nɔhɔlɛɛ pʼi jo: «Cabyaa gbarashuun tɛhɛnɛ kɔn kan wù mu. Wù na tuduro tun Izirayɛli fiige ki bɛɛri mu, sipya bɛ bye wu di ya ta di ba wù ɲuŋɔ wolo wɛ, wù na ba wùyɛ kan ma mu.» 4 A tudunmɔɔ pʼi nɔ Gibeya kulo li ni, Sɔli wo kulo le, na te tuduro te jo kulo li shɛɛn pu mu, a sipyiire ti bɛɛri di sipyaa ɲɔ kɔn na waa.5 Lee bi Sɔli ta wʼa yìri kɛrɛyɛ yi ni na ma, na taha wu niiyɛ na. A wu jo: «Ɲaha kʼa sipyiire ti ta tʼi mɛhɛɛ suu wɛ?» Yabɛshi shɛɛn ya yemu jo ge, a pʼi yee jo wu mu. 6 Ba Sɔli ya pee jomɔ pu logo wɛ, a Kilɛ Munaa di jé wu ni. A wu luu di sii yìri fo xuuni. 7 A wu niiyɛ shuun wa co, na yee kɔn kɔn, na tee xaara ti kan tudunmɔɔ pʼi mu pʼa shɛ gan Izirayɛli fiige ki bɛɛri ni, na jo: «Sipya bɛɛri wu ɲɛ wu ya sɔɔ na pa daha nɛ Sɔli ni Samuwɛli fɛni na se kashɛn ki na wɛ, le pyegana le na weefɔɔ wo nupɛhɛɛ kʼa da ba bye.» A Tɛhɛnɛ Baa Kilɛ di wu ɲìi fyaara ti pɛlɛ sipyiire ti zɔlɔɔ pu na, a pʼi foro kashɛn ki na ba shɛn nigin ɲɛ wɛ. 8 A Sɔli di pu tɔrɔ Bezɛki kulo li ni. Izirayɛli shɛɛn pu bye sipyii kabɔfoŋɔɔ xhuu taanri (300.000), Zhuda wo namaa pʼi ɲɛ kabɔfoŋɔɔ kɛlɛɛ taanri (30.000). 9 A pʼi Yabɛshi wo tudunmɔɔ pu pye na: «Yi shɛ yi jo Galadi wo Yabɛsi shɛɛn pu mu na: ‹Yi na ba ɲuwuuro ta ɲiga na, caŋa ki ba nɔ ɲuŋɔ niŋɛ ni.› » A tudunmɔɔ pʼi ba yee jo Yabɛshi shɛɛn mu, a pee di fundanga ta. 10 A Yabɛshi shɛɛn pʼi Amɔ shi shɛɛn pu pye: «Ɲiga na wʼà da ba shɛ wùyɛ kan yi mu, lemu lʼa yi taan ge, yi na lee pye wù na.»
11 Ɲimuguro ti na, a Sɔli di sipyiire ti taa na pye taaya taanri. A pʼi jé pɛɛn pu wo kashɛn keŋɛ ki ni na ɲiga ki ta ki sanha mugi wɛ, na gbere Amɔ shi shɛɛn pu na na gbuu, fo na shɛ caŋa ki pye kʼa nɔ ɲuŋɔ niŋɛ ni. Pii pʼa shɔ to pu ni ge, a pee di baa caaga pu yɛ pu yɛ, wa ya pinnɛ ni wa ni wɛ.
Sipyiire tʼa sɔɔ Sɔli wo saanra ti na
12 A sipyiire tʼi Samuwɛli pye: «Piikɛ pu bi yu wɛ, na: ‹Ta Sɔli wu da bye wèe wo saan we?› Yi pee namaa pu ɲɔ yaha wù mu wù pu gbo.» 13 Ga a Sɔli di jo: «Sipya bɛ da gbo niɲaa wo caŋa ɲii le ni wɛ, bani Tɛhɛnɛ Baa Kilɛ ya Izirayɛli nagoo pu ɲuŋɔ wolo niɲaa.» 14 A Samuwɛli di sipyiire ti pye: «Yi pa wù shɛ Giligali ni wù shɛ yi jo taha sanha na saan wu ɲɛ Sɔli.» 15 A sipyiire ti bɛɛri di gari Giligali ni. A pʼi shɛ Sɔli teŋɛ wà na pye saan Tɛhɛnɛ Baa Kilɛ ɲaha tàan Giligali ni. A pʼi ɲaɲiŋɛ saraya wolo wà Tɛhɛnɛ Baa Kilɛ ɲaha tàan. A Sɔli ni Izirayɛli namaa pu bɛɛri di kalenɛ nigbɔɔ pye wà.