1 Samuwɛli 12

Samuwɛli wo yɛri yɛri jomɔ pe

Ayiwa, a Samuwɛli di Izirayɛli nagoo pu bɛɛri pye: «Yemu bɛɛri yee ya jo ge, nɛ sɔɔ yee bɛɛri na. Nɛ saan teŋɛ yi ɲuŋɔ ni. 2 Nimɛ, saan wemu wʼa da ba ɲaari yi ɲahagbaa na ge, wee wu ɲɛ we. Nɛ ya lɛ, na ɲuŋɔ kʼa fiinŋɛ. Na jalaa pu wa ni yi ni. Nɛ wi ge, nɛ yee ɲaha co na lɔ fo na nɔhɔpiire ti tuun wu na, fo na pa nɔ niɲaa na. 3 Nɛ we Tɛhɛnɛ Baa Kilɛ ɲaha tàan, ná wemu bɛ wʼa shɔɔnri lɔ ge, ni wee bɛ ɲaha tàan, di bi ta nʼa kabɛbaana la pye wa na, wufɔɔ wu yi jo. Jɔgɔ wo nù nɛ dʼa shɔ wu na wɛ? Jɔgɔ wo kafaŋa nɛ dʼa shɔ wu na wɛ? Jɔgɔ yaaga nɛ dʼa shɔ wu na fanha ni wɛ? Jɔgɔ na nɛ dʼa kakuunɔ pye wɛ? Jɔgɔ wu dʼa yaaga ka taga na ɲɔ fɔrɔgɔ, a di ɲìi tɔ wá wu na wu kaa na wɛ? Di bi lee la pye wa na, wufɔɔ wu yi jo di li fɔɔ tɔ wufɔɔ mu.» 4 A pʼi jo: «Mu ya ta wa yaaga shɔ wu na fanha na wɛ, mu ya ta kakuunɔ pye wa na wɛ, ma di wa yaaga ka shishiin shɔ wa mu wɛ.» 5 A wu pu pye sanha na: «Tɛhɛnɛ Baa Kilɛ wa li sɛɛri, ná wemu wʼa shɔɔnri lɔ ge, wee bɛ wa li sɛɛri na yee yaaga ka shishiin ya ta nɛ mu wɛ.» A sipyiire tʼi jo: «Uun Tɛhɛnɛ Baa Kilɛ wa li sɛɛri!»

6 Ayiwa, a Samuwɛli di sipyiire ti pye: «Tɛhɛnɛ Baa Kilɛ wʼa bi Musa ni Aarɔn shɔɔnri lɔ, na yee sefɛlɛɛ pu yeege Misira fiige ki ni. 7 Nimɛ yi yere Tɛhɛnɛ Baa Kilɛ ɲaha tàan, Tɛhɛnɛ Baa Kilɛ ya tiimɛ keree kiimu bɛɛri pye yee ni yi sefɛɛ pu mu ge, nʼa da ba yi funyɔ to ki na. 8 Yakuba na kari xɔ Misira fiige ki ni, yee sefɛɛ pʼa pa sipyaa wá Tɛhɛnɛ Baa Kilɛ mu. A Tɛhɛnɛ Baa Kilɛ di Musa ni Aarɔn tun pʼa shɛ yee sefɛɛ pu yeege Misira fiige ki ni, na ba pu teŋɛ we xuu we ni. 9 Ga a pʼi ba funŋɔ wɔ Tɛhɛnɛ Baa Kilɛ, pu Kilɛ wu na, a wee di pu ɲɔ yaha Sisera mu Asɔri kulo li wo kashɛn keŋɛ ki ɲuŋɔfɔɔ we. Lee kadugo na, a wu pu ɲɔ yaha Filisiti shɛɛn pu bɛ, ni Mowabu fiige ki wo saan wu bɛ mu, a pee di kashɛn kɔn pu na. 10 A pʼi sipyaa wá Tɛhɛnɛ Baa Kilɛ mu na: ‹Jurumu wèe ya pye! Wee ya kadugo le Tɛhɛnɛ Baa Kilɛ ni, na ganha na kapyeŋɛɛ pyi yapɛrɛɛ Baali ni Ashera mu. Wù wolo wù pɛɛn pu keŋɛ ni nimɛ, wù na da kapyeŋɛɛ pyi ma mu!› 11 A Tɛhɛnɛ Baa Kilɛ di Yeru-Baali tun na pa yee mu, lee kadugo na, a wu Bedan tun, lee kadugo na, na Zhɛfute tun, lee kadugo na, a wu nɛ Samuwɛli yɛpyaa ki tun na pa yee mu. Yi pɛɛn piimu pʼa yi maha ge, pee bɛɛri nigin nigin wʼa yee shɔ pee na pu wo tɛɛgɛɛ ki funŋɔ ni, a yee di ɲaɲiŋɛ ta. 12 Lee kadugo tàan, yee ya pa li ɲa na Naxhashi wʼa ma di ba kashɛn kɔn yee na ge, Amɔ shi shɛɛn pu wo saan we, a yee di ba nɛ pye na: ‹Ahayi dɛ! Fo saan na teŋɛ wèe ɲuŋɔ ni!› Ma li ta bɛ Tɛhɛnɛ Baa Kilɛ, yee wo Kilɛ wu di ɲɛ yee wo saan we. 13 Nimɛ saan wemu yee ya shɔɔnri lɔ ge, wu we, wee wemu kaa yee ya jo ge. Tɛhɛnɛ Baa Kilɛ ya saan teŋɛ yi ɲuŋɔ ni. 14 Yi ba fyagi Tɛhɛnɛ Baa Kilɛ na, yi ba kapyeŋɛɛ pyi wu mu, yi ba wu nijoyo nuri, yi bye yi ya nʼa she leni yiyɛ ni wu ɲɔmɛjogoo ki shizhaa na wɛ. Yee ni yi saan we, wee wemu wu wa yi ɲuŋɔ ni ge, yi ba daha Tɛhɛnɛ Baa Kilɛ, yi Kilɛ wu fɛni, yi keree ki bɛɛri na da ɲɔgi. 15 Ga yi bye yʼi ya Tɛhɛnɛ Baa Kilɛ wo jomɔ pu nuri wɛ, yi bu nʼa she le yiyɛ ni wu ɲɔmɛjogoo ki shizhaa na, Tɛhɛnɛ Baa Kilɛ na ba wu keŋɛ ki yirige yi fɛni, ba wʼa bi ki yirige yi sefɛɛ pu fɛni yirigegana lemu na wɛ. 16 Nimɛ, yi yere yʼi le kagbɔɔ le wii, lee lemu Tɛhɛnɛ Baa Kilɛ da ba bye yi ɲii na ge. 17 Ta alikama yalɔɔrɔ lɔduun bɛ wu ɲɛ nimɛ wɛ? Nʼa da ba Tɛhɛnɛ Baa Kilɛ ɲɛɛri, wu Kilɛ-sɛlɛŋɛɛ pye kʼi foro, wu zanha shan. Yi na ba li ɲa lee funŋɔ ni na yee na saan ɲɛɛri Tɛhɛnɛ Baa Kilɛ mu, na yee ya piin fo xuuni.»

18 A Samuwɛli di Tɛhɛnɛ Baa Kilɛ ɲɛɛri, kee caŋa kiyɛ pyaa, a Tɛhɛnɛ Baa Kilɛ di Kilɛ-sɛlɛŋɛɛ pye kʼa foro, na zanha shan. A sipyiire ti bɛɛri di sii fya fo xuuni Tɛhɛnɛ Baa Kilɛ ni Samuwɛli na. 19 A sipyiire ti bɛɛri di Samuwɛli pye: «Tɛhɛnɛ Baa Kilɛ, ma Kilɛ wu ɲɛɛri wù mu, ma kapyebyii pee, kɔnhɔ wù ganha bu xhu wɛ, bani wèe na saan ɲɛɛri, la wèe ya fara sanha wù wo jurumu wu na.» 20 A Samuwɛli di sipyiire ti pye: «Yi ganha bu fya wɛ! Yee ya we jurumu we bɛɛri pye, ga yi ganha bu laraga kɔn Tɛhɛnɛ Baa Kilɛ na wɛ. Yʼa kapyeŋɛɛ pyi Tɛhɛnɛ Baa Kilɛ mu ni yi zɔlɔɔ pu bɛɛri ni. 21 Yi ganha bu laraga kɔn wu na, yʼi shɛ tannga leŋɛ ni ɲuŋɔ baa yaaya ni wɛ, yee wa da la ɲɔ yi na wɛ, yi di wa da já yi ɲuŋɔ wolo wɛ, bani ɲuŋɔ baa yaaya yi ɲɛ yii. 22 Tɛhɛnɛ Baa Kilɛ wa da ga wu sipyii pu yaha wu mɛgbɔhɔ ki wuu na wɛ. Tɛhɛnɛ Baa Kilɛ ya li ɲɔ wolo wu yee pye wu wo sipyii. 23 Kilɛ-ɲɛrɛgɛ ke nɛ byi yee mu ge, nɛ da ga jurumu pye Tɛhɛnɛ Baa Kilɛ na ni kee wo yereŋɛ ni wɛ! Koo lemu lʼa ɲɔ, na dii ge, lee ni nʼa da da yi kalaa. 24 Yi sii ya fyagi yɛ Tɛhɛnɛ Baa Kilɛ na, yʼi da kapyeŋɛɛ pyi wu mu ni ɲɔmɛɛ fɛɛrɛ ni, ni yi zɔlɔɔ pu bɛɛri ni. Kagbɔhɔɔ kiimu wʼa pye yi mu ge, yʼi kasɛɛgɛ yaha kee na. 25 Ga yi bu kakuunɔ pye, yi ɲuŋɔ na ba dugo yi ni yi saan wu ni.»