Sɔli wo saanra ti keree
13
Sɔli ya pye saan na wu shi wu yaha ɲuŋɔkana la na. Lee bi wu ta wʼa yee shuun pye xɔ saanra ti ni Izirayɛli shɛɛn pu ɲuŋɔ ni. 2 A Sɔli di Izirayɛli namaa kabɔfoŋɔɔ taanri (3.000) shɔɔnri lɔ. Namaa kabɔfoŋɔɔ shuun (2.000) bye ni wu ni Mikimasi kulo ni, Bɛtɛli wo faaboboyo yi na, kabɔfonɔ nigin (1.000) di ɲɛ ni Zhonatan ni, Gibeya kulo li ni, Bɛnzhamɛ wo koomɔ pu ni. A wu sipyiire tisara yaha na pʼa gaaŋi pu kabanya ni. 3 Filisiti shɛɛn wo kashɛn keŋɛ kemu ki bye Gibeya ni ge, caŋa ka Zhonatan ya pa shɛ do kee na, na se ta ki na, a Filisiti shɛɛn pʼi yee logo. Ba lee ya pye wɛ, a Sɔli di jo na pu maga wi fiige ki bɛɛri ni. A wu jo: «Heburuu pu bɛɛri ya yaa na ye logo.» 4 A Izirayɛli shɛɛn bɛɛri di yi logo na Sɔli ya se ta Filisiti shɛɛn pu wo kashɛn keŋɛ ki na, a lee di Filisiti shɛɛn pu logoo yirige Izirayɛli nagoo pu tàan. A Izirayɛli wo kashɛnŋmuu pu bɛɛri di ba binnɛ Sɔli fɛɛ ni Giligali ni. 5 A Filisiti shɛɛn pʼi puyɛ pinnɛ, pʼi shɛ kashɛn kɔn Izirayɛli na. Kashɛn wotoriyo kabɔfoŋɔɔ kɛlɛɛ taanri (30.000) wu bye pu mu, ni shɔnduguloo kabɔfoŋɔɔ gbaara (6.000), ni kashɛnŋmuu piimu ya ɲɛhɛ ba suumɔ lɔhɔ ɲɔ gbazhɛnhɛ ɲɛ-ɛ ge. A pʼi shɛ pu kashɛn keŋɛ ki sin Mikimasi kulo li ni, Bɛti-Avɛni kulo li Kilɛ-nɔhɔ ki na. 6 A Izirayɛli nagoo pu funyɔ di jɔnri, bani sipyiire ti bi cɔnri. A pʼi ganha na se na laraa faaya yi ni, ni tahaya ye, ni faaya wegeye ye, ni keeye ye, ni ɲiŋɛ wegeye yi ni. 7 A Heburuu pii di Zhurudɛn Gba wu kɔn ɲɛri na kari Gadi fiige ke, ni Galadi fiige ki ni. Lee bi Sɔli ta sanha Giligali ni. Piimu bɛɛri pu bye ni wu ni ge, pee bɛɛri bi shɔ na jɛlɛ. 8 A Sɔli di cabyaa gbarashuun pye na Samuwɛli sigee, ma na jo ba Samuwɛli bi yi jo wu mu wɛ. Ga Samuwɛli ya ta shɛ Giligali ni wɛ, a sipyiire tʼi ganha na jaaga.a9 Wee tuun wu ni a Sɔli di jo: «Yi pa ni saraga nizogoŋɔ ke ni ɲaɲiŋɛ saraga ki ni na mu.» A wu saraga nizogoŋɔ ki wolo. 10 Wʼa saraga nizogoŋɔ ki wolo xɔ mɛ yɛ, a Samuwɛli di nɔ. A Sɔli di foro kari di shɛ wu ɲuŋɔ círi di wu shaari. 11 A Samuwɛli di jo: «Ɲaha ma dʼa pye mɛ wɛ?» A Sɔli di wu pye: «Ba nɛ sipyiire ti ɲa ti na jaaga wɛ, tuun wemu mu ya shɛ nɛ na ge, mu bɛ di ya ta pa wee tuun we ni wɛ, Filisiti shɛɛn pu bɛ da pa binnɛ Mikimasi ni, 12 a nɛ yi jo nayɛ funŋɔ ni jo: ‹Filisiti shɛɛn pu na ba digi nɛ fɛni Giligali ni, na ta nɛ sanha Tɛhɛnɛ Baa Kilɛ ɲɛɛri wɛ!› A nɛ kunni di fanhaɲɛhɛŋɛ kaa pye, na saraga nizogoŋɔ ki wolo.» 13 A Samuwɛli di Sɔli pye: «Fungɔngɔ baa keree mu ya pye, Tɛhɛnɛ Baa Kilɛ, ma Kilɛ wʼa kodoronɔ lemu shɛ mu na ge, mu ya ta lee koo ɲaari wɛ. Lee da bi bye, Tɛhɛnɛ Baa Kilɛ bi da baraga le ma saanra ti ni Izirayɛli ɲuŋɔ ni fo gbee! 14 Ga nimɛ ma saanra tʼa da ba mɔ nige wɛ. Tɛhɛnɛ Baa Kilɛ ya ná watii sha na bɛ ni wu wo ɲidaan wu ni, na wee pye wu wo sipyii pu wo ɲuŋɔfɔɔ we, bani Tɛhɛnɛ Baa Kilɛ ya yemu jo mu mu ge, mu ya ta yee koo ɲaari wɛ.»b 15 Lee kadugo na, a Samuwɛli di yìri Giligali ni, na gari Gibeya kulo li ni, Bɛnzhamɛ wo koomɔ pu ni. Kashɛnŋmuu piimu pu bye ni Sɔli ni ge, a wu pee tɔrɔ, a pee di bɛ ni namaa xhuu gbaara (600) ni. 16 Sɔli ni wu ja Zhonatan, ni kashɛnŋmuu piimu pu bye ni pu ni ge, a pee di shɛ pu kashɛn keŋɛ ki sin Gibeya kulo li ni, Bɛnzhamɛ wo koomɔ pu ni, lee bi Filisiti shɛɛn pu ta pee ya pu wo kashɛn keŋɛ ki sin Mikimasi kulo li ni. 17 Caŋa ka kashɛn naŋmaya ya ya pa foro Filisiti shɛɛn pu wo kashɛn keŋɛ ki ni, na daa na pye kuruyo taanri. A kuruŋɔ ka di koo lɔ na gaaŋi Ofira yíri, Shuwali fiige ki ni. 18 A kuruŋɔ ka di Bɛti-Orɔn koo li lɔ, a taanri wogo kʼi fiige ki kodɛhɛnɛ li wo koo li lɔ Zeboyimu wo fadaan li ni, siwaga ki kacɛ ki na.
19 Lee caŋa ɲii le ni, tudun nigin bɛ bye Izirayɛli fiige ki bɛɛri ni wɛ, bani Filisiti shɛɛn pu bi jo na: «Wù Heburuu pu ɲaha kɔn ŋmɔparaa ni canmaa pu wo yàa wu na.» 20 Izirayɛli shɛɛn pu bɛɛri bi se na sooloo ni pu niiyɛ tuuyo ɲɔkpaanya, ni pu kacereye ni pu wahasɔlɔɔ kaan Filisiti shɛɛn pu mu pu na jeeni. 21 Sooloo pee ni niiyɛ tuuyo ɲɔkpaanya yi wo yàa yàa pɛrɛmɛ pu bye na warifyɛn sikili nigin taa taaya taanri, na shuun wu wa wuyɛ na. Kacereye ni ŋmahaa ki bi yari warifyɛn sikili taaga taanri wogo na. 22 Lee funŋɔ ni, caŋa kemu kashɛn kʼa yìri ge, sipyii piimu bɛɛri pu bye ni Sɔli ni Zhonatan ni ge, ŋmɔpara kelee canmi bye wee wa shishiin mu wɛ, fɔ Sɔli ni wu ja Zhonatan yɛ. 23 A Filisiti shɛɛn pu wo kashɛnŋmuu pii di shɛ Mikimasi kulo li faaboboyo yi wo tatorogo ki co.