Zhonatan ya jo na Sɔli ganha bu Dawuda gbo wɛ
19
Ayiwa, a Sɔli di ba yi jo wu ja Zhonatan ni wu fanha ki sipyigbɔɔ pu bɛɛri mu na wu funŋɔ ki wa wu da Dawuda gbo. Ga Dawuda kaa di bi dan Zhonatan ni fo xuuni. 2 A wu shɛ Dawuda kaala, na wu pye: «Nɛ to Sɔli wʼa ma shaa di gbo. Kasɛɛgɛ yaha mayɛ na, mʼa ba lara xuu wa ni ɲiga ɲisɔɔgɔ na. 3 Tɛgɛ kemu ni ma da ba shɛ lara ge, nɛ ni na to wu na ba foro zhɛ wà. Nɛ na ba yere wu tàan, na jo ni wu ni ma keree na. Wu ba yemu jo ma shizhaa na, nɛ na ba yee jo ma mu.»4 Kee caŋa ki ɲimuguro a Zhonatan di Dawuda mɛsaaŋa jo wu to Sɔli mu, na wu pye: «Saan we, ma ganha bu da kakuunɔ pye ma kapyebye Dawuda na wɛ, bani wu sanha kakuunɔ pye mu na wɛ. Wʼa kasaaŋaa niɲɛhɛŋɛɛ pye mu mu. 5 Wʼa wu munaa li pɛrɛ fɔ, na Filisiti shɛn wu gbo. Kee caŋa Tɛhɛnɛ Baa Kilɛ ya kagbɔɔ pye Izirayɛli shɛɛn pu bɛɛri mu, na se kan pu mu. Muyɛ pyaa ki bɛ ya lee ɲa, a lʼi daan bɛ ma ni. Ɲaha fɛni mʼa jurumu shaa di bye ni jaagi baa fɔɔ shishan wo ni wɛ? Ɲaha na mʼa Dawuda shaa di gbo kaɲuŋɔ baa wɛ?»
6 A Sɔli di sɔɔ Zhonatan wo nijoyo yi na, na gàa na: «Tɛhɛnɛ Baa Kilɛ ɲìi wo wu mɛgɛ na, Dawuda da gbo wɛ.»
7 Kadugo tàan a Zhonatan di ba Dawuda yiri, na yee bɛɛri paari wu mu, na xhɔ, na gari ni wu ni Sɔli yíri. A Dawuda di ganha na Sɔli wo kapyeŋɛɛ ki pyi ba wu bi tee na ki pyi wɛ.
Mikali ya Dawuda ɲuŋɔ wolo
8 Lee bi kashɛnŋmuu li ta li na se ɲaha na. A Dawuda di foro Filisiti shɛɛn pu fɛni, na bɔɔngɔ nigbɔhɔ shan pu ɲuŋɔ ni, fo pʼa paa kɔnhɔ pʼi shɔ wu na.
9 Ayiwa, a Tɛhɛnɛ Baa Kilɛ di ba munakuunɔ la yaha lʼa pa jé Sɔli ni. Na wu nidɛɛngɛ yaha wu kaban caŋa ka, wu canmi wu bye wu keŋɛ ni, Dawuda di ɲɛ na koni wu kpɔɔn, 10 a Sɔli di ganha na giin wu wu canmi wu taga Dawuda su di gbara kasɔrɔgɔ ki na. Ga a Dawuda di figi foro canmi wu tàan, a canmi wu shɛ kasɔrɔgɔ ki su furi. A Dawuda di baa foro, na shɔ kee caŋa ki piige ki ni.
11 Ayiwa, a Sɔli di sipyii pii yaha kari pʼa shɛ Dawuda puga ki kasɛɛgɛ pyi, kɔnhɔ pʼi ba wu gbo ɲimuguro ti na.a Ga a Dawuda shɔ Mikali di wu kaala na wu pye: «Ma bye ma di ya paa ke piige ke ni wɛ, gbo ma ɲɛ ɲiga na.» 12 A Mikali di Dawuda tɛgɛ na wu yeege fɛnɛtiri ni, a wu baa gbee, na shɔ. 13 Lee kadugo na, a Mikali di terafimub wu lɔ sinniŋɛ yasinnɛgɛ ki na, na sika sɛɛgɛ shiire wogo ka yaha wu ɲuŋɔ ke tàan, na fatɔŋɔ taga wu tɔ. 14 Tuun wemu ni Sɔli ya pa sipyii pii yaha kari Dawuda fɛni ge, a Mikali di pu pye: «Dawuda ya cuuŋɔ wɛ.» 15 Ga a Sɔli di pu kuruŋɔ tun sanha na pu shɛ Dawuda ɲa. A wu pu pye: «Yi shɛ wu ni wu yasinnɛgɛ ki lɔ yi pa na kan naha, kɔnhɔ di wu gbo!» 16 Ba tudunmɔɔ pʼa kuri kari Dawuda fɛni wu kaban wɛ, na dɛrɛ shɛ terafimu ta pʼa wu sinniŋɛ yasinnɛgɛ ki na, na sika sɛɛgɛ shiire wogo ka yaha wu ɲuŋɔ ke tàan. 17 Ba pʼa shɛ yee jo Sɔli mu wɛ, a wu Mikali pye: «Ɲaha na ma dʼa na faanna le faannagana le na wɛ? Ɲaha na ma dʼa na pɛn wu pye wʼa shɔ wɛ?» A Mikali di jo: «Wʼa jo na nɛ bye nɛ di ya wee yaha wee di da gaaŋi wɛ, na wee da nɛ gbo.»
Sɔli ya kari Dawuda fɛni Arama kulo li ni
18 Ayiwa, ba Dawuda ya paa shɔ mu wɛ, na gari Samuwɛli yíri Arama kulo li ni. Sɔli ya lemu bɛɛri pye wu na ge, a wu shɛ yee bɛɛri paari Samuwɛli mu. Lee kadugo na, a wu ni Samuwɛli di gari Nayɔtic ni, na shɛ diin wà. 19 A pʼi shɛ Sɔli pye na Dawuda wa ni Kilɛ tudunmɔɔ pu ni Nayɔti ni Arama kulo li tàan. 20 A Sɔli di pii tun na pu shɛ Dawuda co. A pee di shɛ Kilɛ tudunmɔɔ pu pinnɛgɛ ki ta kʼa foro ki lɛɛ ni, na ganha na Kilɛ tuduro yu, Samuwɛli dʼa pu ɲaha co. A Kilɛ Munaa di digi Sɔli wo tudunmɔɔ pu bɛ na, a pu bɛ di foro pu lɛɛ ni, na ganha na Kilɛ tuduro yu. 21 A pʼi ba yee jo Sɔli mu, a wu pii bɛ tun kari. Ba pee bɛ ya shɛ nɔ wɛ, na foro pu lɛɛ ni, na ganha na Kilɛ tuduro yu. A Sɔli di tudunmɔɔ taanri wuu tun kari, a pu bɛ di shɛ nɔ, na foro pu lɛɛ ni, ganha na Kilɛ tuduro yu. 22 Wee tuun wu ni a Sɔli yɛ pyaa di lɔ na gaaŋi Arama kulo li ni. Ba wʼa shɛ nɔ Seku wo keeŋɛ ki ɲɔ na wɛ, na yegeŋɛ pye na: «Mii Samuwɛli ni Dawuda di ɲɛ wɛ?» A pʼi wu pye: «Pu wa Nayɔti ni Arama kulo li tàan.» 23 A wu ganha na gaaŋi wà. Na wu yaha koo li na, a Kilɛ Munaa di digi wu bɛ na, a wu bɛ di foro wu lɛɛ ni, na ɲɔ kɔn na Kilɛ tuduro yu na gaaŋi fo na shɛ nɔ Nayɔti ni Arama tàan. 24 A wu bɛ di wu fàya wolo ba pusamaa ɲɛ wɛ, na ganha na Kilɛ tuduro yu Samuwɛli ɲaha tàan. A wu fàya baa wo wu do ɲiŋɛ na, na kee caŋa ki bɛɛri pye lee ni, na ba piige ki bɛ pye mu. Lee na pʼa yu na: «Ta Sɔli bɛ wu ɲɛ Kilɛ tudunmɔɔ pu ni ya?»d