Zhonatan ya naɲɛɛgɛ leŋɛ ni Dawuda ni
18
Ayiwa Ba Dawuda ya jo xɔ ni Sɔli wɛ, a wu keree di Sɔli ja Zhonatan zɔ wu ɲi fo xuuni. A Dawuda kaa di daan Zhonatan ni ba wuyɛ pyaa ki ɲɛ wɛ. 2 A Sɔli di Dawuda yaha wuyɛ tàan kee caŋa, wu ya sɔɔ na wu yaha kari wu topuga wɛ. 3 A Zhonatan di taanɲɛɛgɛ ɲɔmɛɛ lɔ Dawuda mu, bani wu kaa bi dan wu ni ba wuyɛ pyaa ki ɲɛ wɛ. 4 Fadegbɔhɔ ke ki bye wu na ge, a wu kee wolo kan Dawuda mu, na fara wu tɔɔrɔ fadeŋɛ ki na, ni wu ŋmɔpara le, ni wu sindaa, ni wu kirige ki bɛ. 5 Sɔli bu Dawuda yaha kari kashɛn bɛɛri na, wʼa shɛ se ta, a lee di Sɔli pye wʼa wu yaha wu kashɛnŋmuu pu bɛɛri ɲuŋɔ ni. A wu kaa di daan sipyii pu bɛɛri ni, ali Sɔli wo kapyebyii pu bɛ.Sɔli ya ɲɛpɛɛn lɔ ni Dawuda ni
6 Dawuda ya Filisiti shɛn wu gbo ge, ba kashɛn keŋɛ kʼa pa guri na ma wɛ, a cèe pʼi foro Izirayɛli shɛɛn pu wo kulogoo ki bɛɛri ni na shɛ saannaa Sɔli ɲuŋɔ círi. Pu fundanga wuu bi taya ni kɔnɔɔ kpɔɔn, na ciire cee, na xhɔnhɔni, na xhugulo. 7 Pee cèe pu bi ciire ti cee na puyɛ ɲɔ shuu na:
«Sɔli ya sipyii kabɔfoŋɔɔ niɲɛhɛŋɛɛ gbo,
a Dawuda di gbo fo sipyii kabɔfoŋɔɔ kɛlɛɛ niɲɛhɛmɛɛ.»
8 Kee yogo ke ya ta tàan Sɔli mu wɛ. A wu luu di yìri fo xuuni. A wu jo: «Pʼa nɛ pye kabɔhɔɔ niɲɛhɛŋɛɛ, na Dawuda pye kabɔhɔɔ kɛlɛɛ niɲɛhɛŋɛmɛɛ. Li bu doro le tàan, go saanra koro li mu lʼa ma gɛ!» 9 Na co kee caŋa ki na, a Sɔli di ganha na Dawuda wii ni ɲɛkuunɔ ni.
10 Kee caŋa ki ɲimuguro a Tɛhɛnɛ Baa Kilɛ di munakuunɔ la yaha lʼa pa jé Sɔli ni, a wu bye wu ɲɛ nige wu yɛ mu wɛ na wu yaha wu kaban ki ni. A Dawuda di ganha na koni wu kpɔɔn ba wʼa tee na li pyi wɛ, lee bi Sɔli canmi wu ta wu keŋɛ ni. 11 A wu canmi wu yirige na jo: «Nʼa da Dawuda kori di gbara kasɔrɔgɔ ke na.» Ga a Dawuda di fiin foro canmi wu tàan tɔɔɲii shuun.
12 A Sɔli di fya Dawuda ɲaha na, bani Tɛhɛnɛ Baa Kilɛ bye ni wu ni, ga wu bye nige ni wee Sɔli ni wɛ. 13 Lee na wʼa Dawuda laha wuyɛ tàan, na wu pye kashɛnŋmuu kabɔfonɔ nigin (1.000) ɲuŋɔfɔɔ. Kee kashɛn keŋɛ ki ba se kashɛn na, Dawuda ma ki ɲaha co. 14 Dawuda bu kaa lemu bɛɛri ɲɔ wolo, lʼa ɲɔ bani Tɛhɛnɛ Baa Kilɛ bye ni wu ni. 15 Sɔli ya Dawuda keree ki bɛɛri ɲaa ki na ɲɔgi ge, a la di ganha na faraa wu funŋɔ fyaara ti na. 16 Ga Dawuda kaa bi dan Izirayɛli shɛɛn pee ni Zhuda shɛɛn pu bɛɛri ni, bani wee wu bi pu ɲaha coni na se kashɛn na tuun bɛɛri ni.
Dawuda ya Mikali leŋɛ, Sɔli poro we
17 Ayiwa, caŋa ka Sɔli ya pa Dawuda pye: «Na poro pushɔ nizhiimɛ Merabu we, nʼa da ba wu kan ma mu wu bye ma shɔ. Ta kapyeŋɛɛ pyi na mu yɛ ni lowaa ni, ma da Tɛhɛnɛ Baa Kilɛ wo kashɛn ki ŋmuu.» Sɔli bi li kɔɔn wuyɛ funŋɔ ni na: «Nɛyɛ pyaa wa da ba Dawuda gbo wɛ, Filisiti shɛɛn pʼa da ba wu gbo.» 18 A Dawuda di Sɔli pye: «Ɲaha nɛ di ɲɛ wɛ? Nɛ to wu wo kpuun li ɲɛ lekɛ Izirayɛli fiige ki ni fo nɛ wu na pye saan wo yafɛna wɛ?» 19 Ba Sɔli poro pushɔ Merabu ya pa lɛ ma nɔ pu wu kan Dawuda mu wɛ, a pʼi wu kan Mexhola shɛɛn Adiriyɛli mu.
20 Ayiwa, Sɔli poro pushɔ wemu wu ɲɛ na Mikali ge, lee bi wee ta Dawuda na dan wee ni. A pʼi shɛ yee jo Sɔli mu, a yee di da yʼa bɛ wu mu. 21 A Sɔli di li kɔn wuyɛ funŋɔ ni na: «Nʼa da ba wee kan wu mu, wee di bye wu co co tifuugo, kɔnhɔ Filisiti shɛɛn pʼi wu ta gbo.» A Sɔli di Dawuda pye li tɔɔɲii shuun wuu ni na: «Niɲaa yɛpyaa ma da ba bye nɛ yafɛna.»
22 A Sɔli di te tuduro te jo wu fanha ki sipyigbɔɔ pu mu na: «Yi yi peele jo Dawuda mu na: ‹Mu kaa lʼa dan saan wu ni, ma kaa di dan wu fanha ki sipyigbɔɔ pu bɛ ni, lee na, mʼa yaa na sɔɔ na bye wu yafɛna.› » 23 A Sɔli wo fanha ki sipyigbɔɔ pʼi shɛ yee jo Dawuda mu. A Dawuda di pu ɲɔ shɔ na: «Na pye saan wo yafɛna, yee wa lee wii kafɛnhɛfɛnhɛnɛ gɛ? Labaa fɔɔ nɛ ɲɛ, nɛ ɲɛ sipyigbɔ wɛ.» 24 A Sɔli wo fanha ki sipyigbɔɔ pʼi shɛ Dawuda wo nijoyo yi jo wu mu. 25 A Sɔli di jo: «Yi shɛ yi jo Dawuda mu na: ‹Saan wu ya bɔri shaa cee wu na wɛ, ga fo Filisiti shɛɛn wo cekɔɔnrɔ sɛɛkɔngɔɔ xhuu nigin (100), kɔnhɔ wu wu luu ɲiŋɛ wu pɛɛn pu ni.› » Sɔli funŋɔ bye wu Dawuda le Filisiti shɛɛn pu keŋɛ ni pu gbo. 26 A fanha ki sipyigbɔɔ pʼi shɛ pee jomɔ pu jo Dawuda mu, a kee fungɔngɔ kʼi bɛ Dawuda mu. Lee funŋɔ ni a Dawuda di bye saan wu yafɛna. Tuun wemu tɛhɛnɛ lʼa bi kɔn shɛ ge, 27 sani wee tuun we wu nɔ ge, a Dawuda di gari ni wu kashɛnŋmuu pu ni, na shɛ Filisiti shɛɛn namaa xhuu shuun (200) gbo, na ba ni pee wo cekɔɔnrɔ ti sɛɛkɔngɔɔ ki ni. A pʼi shɛ ti bɛɛri kan saan wu mu, kɔnhɔ Dawuda di bye wu yafɛna. Wee tuun wu ni a Sɔli di wu poro pushɔ Mikali kan Dawuda mu na pye wu shɔ.
28 Ayiwa, a Sɔli di li ɲa, na li cɛ na Tɛhɛnɛ Baa Kilɛ wu wa ni Dawuda ni, na Dawuda kaa di dan bɛ wee poro pushɔ Mikali bɛ ni. 29 A la di ganha na faraa Dawuda wo ɲìi fyaara ti na wu mu. Na co wee tuun wu na a Dawuda di bɛn yaha Sɔli mu wu wo caŋa ɲii li bɛɛri ni. 30 Filisiti shɛɛn pu wo ɲuŋɔfɛɛ pu bu foro tɔɔɲii bɛɛri ni kashɛn ki fɛni, Dawuda bi ma ɲaha ta xuuni kashɛn ki ni na ye Sɔli wo kashɛn ɲuŋɔfɛɛ pusamaa na, a wu mɛgɛ di sii foro xuuni.