Dawuda ya pye Zhuda koomɔ pu wo saan we
2
Ayiwa, ba kee keree kʼa toro wɛ, a Dawuda di Tɛhɛnɛ Baa Kilɛ yege na: «Ta nɛ yaa na shɛ Zhuda fiige ki kulo la ni?» A Tɛhɛnɛ Baa Kilɛ di wu ɲɔ shɔ na: «Shɛ la ni.» A Dawuda di wu yege na: «Di zhɛ lekɛ ni wɛ?» A Tɛhɛnɛ Baa Kilɛ di jo: «Shɛ Eburɔn kulo li ni!» 2 A Dawuda di gari Eburɔn kulo li ni ni wu cèe shuun wu ni, Jizirɛli shɛɛn Ayinowamu ni Abigali, wee wemu wu bi fɛnhɛ pye Karimɛli shɛɛn Nabali wo shɔ ge.a 3 Namaa piimu pu bye ni wu ni ge, a wu gari ni pee ni pu puga shɛɛn pu bɛ ni, a pʼi shɛ diin Eburɔn kulo le, ni li mahama kulogoo ki ni.4 Ba lee ya pye wɛ, a Zhuda shɛɛn pʼi ba, na ba Dawuda tìre na pye pu wo saan.
A pʼi Dawuda pye na Galadi koomɔ pu wo Yabɛshi shɛɛn pʼa Sɔli le faŋa ni.b 5 A Dawuda di tudunmɔɔ tun na shɛ Galadi wo Yabɛshi shɛɛn pu mu, na pu pye: «Tɛhɛnɛ Baa Kilɛ wu baraga le yi ni, bani yee ya pye ɲɔmɛhɛɛ fɛɛ yi kafɔɔ Sɔli shizhaa na, na wu le faŋa ni. 6 Lee na do, Tɛhɛnɛ Baa Kilɛ bɛ wu saama pye yi mu ni ɲɔmɛɛ fɛɛrɛ ni! Yi wo saama pu wuu na nɛ bɛ wʼa da ba saama pye yi mu. 7 Yi lowaa ta, yʼi bye samɔhɔrɔ fɛɛ. Yi kafɔɔ Sɔli ya xu, a Zhuda shɛɛn pʼi nɛ tìre, kɔnhɔ nɛ bye pu saan.»
Ishiboshɛti ya teŋɛ na pye Izirayɛli fiige ki saan
8 Ayiwa, Nɛri ja Abunɛri wemu wu bye Sɔli wo kashɛn keŋɛ ki ɲuŋɔfɔɔ wu ge, lee bi wee ta wee ya Sɔli ja Ishiboshɛti lɔ na gari ni wu ni Maxanayimu ni. 9 Na shɛ wu teŋɛ na pye Galadi wo koomɔ pe, ni Azɛri wo koomɔ pe, ni Jizirɛli wo koomɔ pe, ni Efirayimu wo koomɔ pe, ni Bɛnzhamɛ wo koomɔ pu wo saan, ni Izirayɛli fiige ki bɛɛri wo saan. 10 Tuun wemu ni Ishiboshɛti ya teŋɛ na pye saan Izirayɛli fiige ki ɲuŋɔ ni ge, wu shi wu bye yee kɛlɛɛ shishɛɛrɛ (40). A wu yee shuun pye saanra ti ni. A Zhuda wo gbawege ki yɛ di daha Dawuda fɛni. 11 Dawuda ya tuun wemu pye Eburɔn kulo li ni saanra ti ni, Zhuda wo gbawege ki ɲuŋɔ ni ge, wee ya pye yee gbarashuun ni yebyaa gbaara.c
Sɔli wo sipyii ni Dawuda wo sipyii pʼa kashɛn ŋmɔ
12 Ayiwa, caŋa ka Nɛri ja Abunɛri ya pa yìri ni Sɔli ja Ishiboshɛti wo namaa pu ni, na foro Maxanayimu ni, na gbegele kashɛn na, na gari Gabawɔn kulo li ni. 13 A Seruya ja Zhowabu ni Dawuda bɛ wo namaa pʼi foro kari kashɛn na. A kashɛn keye yʼi shɛ yiyɛ ɲuŋɔ círi Gabawɔn wo lɔhɔ tamaraga ki tàan. A kashɛn keŋɛ ka di yere lɔhɔ ki ɲɔ ki na, ke kabanugo ke na, a ka di yere ke kabanugo ke bɛ na. 14 A Abunɛri di Zhowabu pye: «Wʼà lɛvɛɛ pu yeege puyɛ mu, pu da puyɛ coni shuun shuun wù ɲii na.» A Zhowabu di jo: «Wù li pye mu!» 15 A kashɛnŋmuu kɛ ni shuun di foro yere Ishiboshɛti wo sipyii pu ni, na foro Bɛnzhamɛ wo tirige shɛɛn pu ni, a kɛ ni shuun di foro yere Dawuda bɛ wo namaa pu ni. 16 Shuun wa bɛɛri, pʼa puyɛ co co ɲuŋmogoo kii na, na ŋmɔparaa ki curi curi puyɛ gbodiye yi ni, pu shuun wu bɛɛri na binnɛ to, na xhu xhu. A pʼi wee xuu wu mɛgɛ le Gabawɔn kulo li ni na Ɛlikati-Asurimu. (Lee kɔ́ri ɲɛ na faaya yi wo tɛgɛ ked.)
17 Kee caŋa ki wo kashɛn ki bi sii wɛri fo xuuni, a Dawuda wo namaa pʼi se ta Abunɛri ni Izirayɛli wo namaa pu na. 18 Seruya wo jalaa taanri wu bye kee caŋa ki wo kashɛnŋmuu pu ni, pee ɲɛ Zhowabu, ni Abishayi, ni Azayɛli. Azayɛli tɔrɔ di bi wɛri ba kaafa ɲɛ sige ni wɛ. 19 A wee di munaa nɔri Abunɛri na, wu ya fiin shɛ kanige kelee kamɛnɛ wɛ. 20 A Abunɛri di ba ŋmahana ɲɛri, na wu pye: «Ta Azayɛli bɛ wɛ?» A wu jo: «Uun nɛ wi.» 21 A Abunɛri di wu pye: «Waa shɛ kanige cɛ, kelee kamɛnɛ cɛ, mʼa we lɛvɔɔ we wa shan, mʼa wee wo kashɛn yɛrɛyɛ yi lɔ.» Ga Azayɛli ya ta sɔɔ na kuri wu fɛni wɛ. 22 A Abunɛri di wu pye sanha na: «Kuri na fɛni! Ɲaha na mʼa li kilee fo di ba ma gbo wɛ? Lee bu bye, dii nɛ di da já ɲaha shɔhɔ sanha ma ceborona Zhowabu ni da wii wɛ?» 23 Ga Azayɛli ya ta sɔɔ na kuri wu fɛni wɛ. Lee funŋɔ ni, a Abunɛri di wu ŋmɔpara li munaa li taga wu su yacɛrɛ le ni, a lʼi shɛ furi foro kadugo yíri wu ni. A wu do, na xhu taapile ni. Azayɛli ya to na xhu xuu wemu ni ge, ba wa bɛɛri ya nɔ wà wɛ, wufɔɔ na yere.
24 A Zhowabu ni Abishayi di daha Abunɛri na na niinɛ. Caŋa ki bi dun pʼi nɔni Ama wo faaboboŋɔ ki na Giya ɲahatiimɛ pu ni, Gabawɔn wo siwaga ki koo li na. 25 A Bɛnzhamɛ wo tirige shɛɛn pʼi ba binnɛ Abunɛri fɛɛ ni, na bye kuruŋɔ nigin, na yere faaboboŋɔ ki ɲidii li ni. 26 A Abunɛri di Zhowabu yiri, na wu pye: «A lʼi gari kanna ŋmɔpara li wa se ɲaha na ni gbuuro ti ni sanha? Ta mu ya li cɛ na li kadugo na ba golo wɛ? Fo tuun wekɛ ni mu di da ba namaa pu pye na pu ganha ba pu cebooloo pu niinɛ-ɛ wɛ?» 27 A Zhowabu di wu pye: «Tɛhɛnɛ Baa Kilɛ ɲìi wo wu mɛgɛ na, ma da bye ma ya jo wɛ, namaa pu bi da ga pu cebooloo pu niinɛ wu ɲɔ yaha, na ta ɲiga sanha mugi wɛ.» 28 A Zhowabu di maga ki wi, a namaa pu bɛɛri di yere, pu ya Izirayɛli shɛɛn pu niinɛ nige wɛ, a pʼi kashɛn ki ɲɔ yaha. 29 A Abunɛri ni wu namaa pʼi piige ki bɛɛri pye na ɲaari Zhurudɛn wo fadaaŋa ki na. A pʼi Zhurudɛn gba wu kɔn ɲɛri, na Bitɔrɔn bɛɛri já toro, na gari Maxanayimu ni. 30 A Zhowabu di Abunɛri wo niinɛ wu ɲɔ yereŋɛ, na guri, na ba wu kashɛn keŋɛ ki bɛɛri pinnɛ. A namaa kɛ ni gbarashɛɛrɛ di fɔ Dawuda wo kashɛnŋmuu pu ni, na fara Azayɛli na. 31 Ga lee bi Dawuda wo kashɛnŋmuu pu ta pʼa namaa xhuu taanri ni kɛlɛɛ gbaara (360) gbo Abunɛri ni Bɛnzhamɛ wo sipyii pu ni. 32 A pʼi gari ni Azayɛli ni, na shɛ wu le wu to wu wo faŋa ki ni Bɛtilɛhɛmu ni. A Zhowabu ni wu namaa pʼi piige ki bɛɛri pye na ɲaari. A pʼi shɛ nɔ Eburɔn ni ɲimuguɲɔ wu na.