3
A Dawuda wo sipyii pee ni Sɔli wo sipyii pʼi taatuunnɔ pye na kashɛn kɔɔn puyɛ na. La bi faraa Dawuda wo sefɛɛrɛ ti na, na se ɲaha na, Sɔli wo sipyii pu fanha di xhuu na gaaŋi.Dawuda jalaa piimu pʼa se Eburɔn ni ge
(1 Caŋa Ɲɛhɛɛ Jomɔ 3:1-4)
2 Ayiwa, Dawuda bi jalaa pii se Eburɔn kulo li ni. Wu jashiimɛ wu mɛgɛ ki bye na Amunɔ. Jizirɛli shɛɛn Ayinowamu wu bi wee se. 3 Shuun wo wu mɛgɛ ɲɛ na Kileyabu. Abigali wu bi wee se, Karimɛli shɛɛn Nabali wemu wʼa xu ge, Abigali di bi fɛnhɛ pye wee wo shɔ. Taanri wo wu mɛgɛ ɲɛ na Abusalɔn, wee ɲɛ Geshuri wo saan Talimayi poro pushɔ Maaka wo ja. 4 Shishɛɛrɛ wo wu ɲɛ na Adonizha, wee ɲɛ Agiti wo ja. Kaguro wo wu ɲɛ na Shefatiya, wee ɲɛ Abitali ja. 5 Gbaara wo wu ɲɛ Yitiremu, wee ɲɛ Dawuda shɔ Egila wo ja. Jalaa piimu Dawuda ya se Eburɔn kulo li ni ge, pee pʼa pye piiri.
Abunɛri ni Ishiboshɛti ya pa bɛ kanha
6 Ayiwa, tuun wemu ni kashɛn ki bye Sɔli wo sipyii pee ni Dawuda wo sipyii pu tɛ ni ge, Abunɛri bi la le wuyɛ ni na fanha ta xuuni wee tuun wu ni Sɔli wo puga ki ni.
7 Lee bi Sɔli ta wʼa cee wa leŋɛ wemu ɲɛ wu furupɔzhɔ wɛ, wu mɛgɛ di ɲɛ na Irisipa. Wee bye Aya wo poro. A Ishiboshɛti di Abunɛri pye: «Ɲaha na mu dʼa jé nɛ to wu shɔ wu mu wɛ?» 8 A pee jomɔ pe di Abunɛri luu yirige fo xuuni, a wu jo: «Wee tuun wu ni ponɔ nɛ ɲɛ na kapyeŋɛɛ pyi Zhuda wo gbawege ki mu gɛ? Nɛ kori yaha ɲɔmɛɛ fɛɛrɛ ni mu to Sɔli wo puga ki mu fo na pa nɔ niɲaa na. Nɛ pye ɲɔmɛɛ fɔɔ wu cebooloo pee, ni wu naɲiinɛɛ pu mu. Nɛ ta sɔɔ na mu le Dawuda keŋɛ ni wɛ. A mu di dɛrɛ na jaagi shaan nɛ na niɲa, na nɛ wʼa katiibaana pye we cee we shizhaa na ya? 9 Ayiwa, ni li wa lere, Tɛhɛnɛ Baa Kilɛ ya lemu wo ɲɔmɛɛ lɔ Dawuda mu ge, nɛ bye nɛ ya Dawuda tɛgɛ lee ɲɔ di fa wu mu wɛ, Kilɛ wu bɔɔngɔ shan na ɲuŋɔ ni, wu da la faraa ki na.a 10 Bani Tɛhɛnɛ Baa Kilɛ ya kàa, na jo na wee da saanra ti wolo Sɔli wo puga ki keŋɛ ni, na wu Dawuda wo saanra ti teŋɛ Izirayɛli ni Zhuda ɲuŋɔ ni, na co Dan kulo li na, fo na shɛ nɔ Bɛɛrisheba kulo li na.» 11 Ishiboshɛti ya já wu ɲɔ shɔ ni kafilakaŋa nigin bɛ ni wɛ, bani wu bi fyagi wu na.
Abunɛri ya kariɲɛɛgɛ ɲɔmɛɛ lɔ ni Dawuda ni
12 A Abunɛri di tudunmɔɔ pii tun Dawuda mu na pu shɛ wu pye: «Jɔgɔ wogo ki wa fiige ki wɛ? Kariɲɛɛgɛ ɲɔmɛɛ lɔ ni na ni, lee bu bye, nɛ na ma tɛgɛ na Izirayɛli bɛɛri ɲaha ɲɛri ma yíri.» 13 A Dawuda di jo: «Yʼa bɛ! Nɛ na ba kariɲɛɛgɛ ɲɔmɛɛ lɔ ni ma ni. Ga kaa nigin yɛ nʼa da zha ma mu: Ma ganha bu ba yere na ɲaha tàan, na ta ma ya pa ni Sɔli poro pushɔ Mikali ni wɛ.» 14 A Dawuda di tuduro yaha shɛ jo Sɔli ja Ishiboshɛti mu na: «Na shɔ Mikali wu kan na mu, wee wemu nɛ sha ni Filisiti shɛɛn cekɔɔnrɔ sɛɛkɔngɔɔ xhuu nigin (100) ni ge.»b 15 A Ishiboshɛti di pu pye pʼa shɛ wu co lɔ wu poo Paliti kaban, Layishi wo ja we. 16 A ná wu daha wu na, na ganha na mɛɛ suu fo na shɛ nɔ Bawurimu kulo li ni. Ga a Abunɛri di wu pye: «Kuri mʼa se puga!» A wu guri kari wu puga.
17 A Abunɛri di Izirayɛli nɔhɔlɛɛ pu pye: «Lʼa mɔ yee na li shaa Dawuda di bye yi saan. 18 Lee wo pyeduun wu ɲɛ nimɛ, bani Tɛhɛnɛ Baa Kilɛ ya jo wu shizhaa na na: ‹Na kapyebye Dawuda keŋɛ kurogo nʼa da ba Izirayɛli, na sipyii pu wolo Filisiti shɛɛn pu keŋɛ ni, di pu wolo pu pɛɛn pu bɛɛri keŋɛ ni.› » 19 A Abunɛri di jo ni Bɛnzhamɛ wo tirige shɛɛn pu bɛ ni. Lee kadugo na, a wu gari Eburɔn ni, Izirayɛli ni Bɛnzhamɛ wo tirige shɛɛn pʼa bɛ lemu bɛɛri na ge, a wu shɛ yee ɲaha jo Dawuda mu. 20 Namaa kɛlɛɛ shuun (20) ni Abunɛri ya nɔ Eburɔn ni Dawuda na. A Dawuda di kalenɛ ligbɔhɔ ka pye Abunɛri ni wu namaa pu mu. 21 A Abunɛri di Dawuda pye: «Nʼa da zhɛ, di shɛ Izirayɛli bɛɛri pinnɛ ma wo fanha ki nɔhɔ ni na kafɔɔ saan we. Pu na ba kariɲɛɛgɛ ɲɔmɛɛ lɔ ni ma ni, ma la ɲɛ ma da saanra ti pyi piimu bɛɛri ɲuŋɔ ni ge, ma ganha na ti pyi pee bɛɛri ɲuŋɔ ni.» A Dawuda di Abunɛri yaha kari, a wu guri ɲaɲiŋɛ na.
Zhowabu ya Abunɛri gbo
22 Ba jɛri ya pye wɛ, a Zhowabu ni Dawuda wo namaa pʼi nɔ jé na yìri kashɛn sige ni ni kashɛn naafuu niɲɛhɛmɛ ni. Lee bi Abunɛri ta wu ɲɛ nige Dawuda tàan Eburɔn ni wɛ, bani Dawuda bi koo kan wu mu, a wu gari ɲaɲiŋɛ na. 23 Ba Zhowabu ya nɔ ni wu kashɛn keŋɛ ki bɛɛri ni wɛ, a pʼi Zhowabu pye na Nɛri ja Abunɛri wʼa pa foro saan wu na, a saan wu wu yaha kari, a wu guri ɲaɲiŋɛ na. 24 A Zhowabu di gari saan wu fɛni na shɛ wu pye: «Ɲaha wo kaa mu dʼa pye mɛ wɛ? Abunɛri ya pa foro mu na ge, ɲaha na ma dʼa wu yaha wʼa kuri kari ɲaɲiŋɛ na wɛ? 25 Mu ya Nɛri ja Abunɛri cɛ cɔ! Wʼa pa ba mu le piinŋɛ ni, wu ma kashɛn ki forogaŋaa ni ki jegaŋaa ki cɛ, lemu bɛɛri mʼa byi ge, wu lee cɛ.» 26 Ba Zhowabu ya laha Dawuda tàan wɛ, na tudunmɔɔ pii tun kari Abunɛri fɛni, a pee di shɛ wu ta co Sira wo keeŋɛ ki tàan, na wu kuruŋɔ na pa, na ta Dawuda ya yaaga cɛ yee ni wɛ. 27 Ba Abunɛri ya kuri pa nɔ Eburɔn ni wɛ, a Zhowabu di wu co kari kabanugo na, kulo li tajege ki funŋɔ ki ni, ma na giin na ŋmɔhɔrɔ jomɔ pa wu da zhɛ jo wu mu, na shɛ ŋmuu taga wu su yacɛrɛ le ni na gbo wee xuu wu ni, kɔnhɔ wu wu cuun Azayɛli wo shishan pu foo tɔ.
28 Ba Dawuda ya pa lee cɛ kurogo ki na wɛ, na jo: «Nɛ jaagi baa wo wu ɲɛ tuun bɛɛri ni Tɛhɛnɛ Baa Kilɛ ɲaha tàan, Nɛri ja Abunɛri wo shishan pu keree na, na saanra ti bɛ di ɲɛ jaagi baa. 29 Kee bɔɔngɔ ke ki to Zhowabu ni wu puga ki ɲuŋɔ ni! Tuun bɛɛri ni sipya ya yaa na ta Zhowabu wo puga ki ni ni ceshii ni, kelee togo na ɲɛ wu na, kelee wu na ɲaari ni pubiin ni, kelee ŋmɔpara na wu gbo, kelee wu bye xuugo fɔɔ!» 30 Zhowabu ni wu ceborona Abishayi bi Abunɛri gbo, bani Abunɛri bi pu ceborona Azayɛli gbo Gabawɔn wo kashɛn ki ni.
31 Zhowabu ni sipyiire temu bɛɛri ti bye ni wu ni ge, a Dawuda di pu pye: «Yi yi fàya yi shɛɛngi, yʼi bɔrɔyɔ fàya† le, yʼi da tataara pyi Abunɛri keree na!» A Dawuda yɛpyaa bɛ di daha gbo wu na. 32 A pʼi shɛ Abunɛri le Eburɔn kulo li ni, a saan wu ganha na mɛɛgɛ waa Abunɛri faŋa ki na, a sipyiire ti bɛɛri di mɛhɛɛ su. 33 Lee kadugo na, a saan wu funyaŋa yogo ka cee Abunɛri na na:
«Ta Abunɛri bi yaa na xu
ba sicere fɔɔ ɲɛ-ɛ ya?
34 Ma keye yi bi ta pɔ wɛ,
daɲaa shɔnhɔyɔ di bi bye ma tɔɔyɔ yi na wɛ!
Togana lemu na sipya ya dun sipyitiibaalaa keŋɛ fɛni ge,
lee togana li na mu ya to.»
Ayiwa, a sipyiire ti bɛɛri di mɛhɛɛ su sanha Abunɛri na. 35 A sipyiire ti bɛɛri di fulo Dawuda na, na wu fɔri na fo wu li na ta caŋa ki sanha xhɔ wɛ. Ga a Dawuda di gàa na jo: «Nɛ bu buuri le na ɲɔ ni, kelee yalige tuugo katii, na ta caŋa ki sanha do wɛ, Kilɛ wu bɔɔngɔ shan na ɲuŋɔ ni, wu da la faraa ki na!» 36 A sipyiire ti bɛɛri di pee jomɔ pu logo, na kaɲii kan pu mu. Lemu bɛɛri saan wu bi byi ge, lee bi dan sipyiire ti ni. 37 A kashɛnŋmuu pu bɛɛri, ni Izirayɛli bɛɛri, di li cɛ lee funŋɔ ni kee caŋa ke na saan wu tɔɔgɔ ya ta pye Nɛri ja Abunɛri wo xhu wu ni wɛ. 38 A saan wu wu fanha ki sipyigbɔɔ pu pye: «Ta yee ya li cɛ na ɲuŋɔfɔɔ wa, na sipyigbɔ wa wʼa to Izirayɛli ni niɲaa wɛ? 39 Can wu ɲɛ wii, nɛ tìre na pye saan, ga nɛ fanha kʼa cɛ́rɛ. Pii pu wa Seruya nagoo pu ge, pu kafugo kʼa pɛlɛ nɛ ɲaha tàan. Tɛhɛnɛ Baa Kilɛ wu le kakuunɔ le foo tɔ li pyevɔɔ wu mu na saha ni li ɲuŋɔkana li ni!»