Pʼa Ishiboshɛti gbo
4
Ayiwa, ba Sɔli ja Ishiboshɛti ya logo na pʼa Abunɛri gbo Eburɔn kulo li ni wɛ, a samɔhɔrɔ di fɔ wu ni, a fyaara di jé Izirayɛli bɛɛri ni. 2 Lee bi Sɔli ja Ishiboshɛti ta kashɛn ɲuŋɔfɛɛ shuun na ɲɛ wu mu. Wa mɛgɛ ki bye na Baana, wa mɛgɛ di ɲɛ na Erekabu. Pee bye Berɔti shɛɛn Irimɔ wo jalaa na foro Bɛnzhamɛ wo gbawege ki ni. Bani Berɔti kulo li bi jateni Bɛnzhamɛ wo gbawege ki ni. 3 Berɔti shɛɛn pu bi paa kari Gitayimu kulo li ni, wà pu wa niɲaa we bɛ ni nadadɛɛnrɛ na.4 Ayiwa, ja wa bye Sɔli ja Zhonatan mu, wu tɔɔyɔ ye bi ɲɔ wɛ. Tuun wemu ni pʼa pa Sɔli ni Zhonatan wo xhu wu jo na yìri Jizirɛli kulo li ni ge, lee bi wu shi wu ta wʼa nɔ yee kaguro na, a wu biivɔɔ wu yìri ni wu ni, na ganha na fe na gbee. A wu shɔ biivɔɔ wu tafɛbaawo wu na ma to, a wu tɔɔyɔ yi gyɛɛgi. Wu mɛgɛ ki bye na Mefibosɛti.a
5 Ayiwa, caŋa ka cafugo na Berɔti shɛɛn Irimɔ wo jalaa, Erekabu ni Baana ya shɛ jé Ishiboshɛti fɛni, lee di wu ta wʼa sinnɛ na ŋmɔni wu kaban cafugo ki na. 6 A pʼi jé kari fo puga ki ni ma na giin shinma ni pʼa ma. A pʼi shɛ ŋmuu taga wu su na gbo yacɛrɛ le ni, lee kadugo na, a pʼi baa foro. 7 Lee jegana li na pʼa bi jé puga ki ni, lee di Ishiboshɛti ta wʼa sinnɛ wu yasinnɛgɛ ki na, wu pushɔngɔ ki ni. A pʼi wu gbo, na wu ɲuŋɔ kɔn, na ɲuŋɔ ki lɔ, na Zhurudɛn fadaaŋa ki wo koo li lɔ, na piige ki bɛɛri pye ɲara na. 8 A pʼi gari ni Ishiboshɛti ɲuŋɔ ki ni Dawuda mu Eburɔn kulo li ni, na shɛ wu pye: «Ma pɛn Ishiboshɛti ɲuŋɔ ki ke, Sɔli ja we, wee wemu wu bi ma munaa li shaa ge. Wù kafɔɔ saan we, niɲaa wo caŋa ɲii le ni Tɛhɛnɛ Baa Kilɛ ya ma goodaa li wolo Sɔli ni wu tirige shɛɛn pu na.» 9 A Dawuda di Berɔti shɛɛn Irimɔ jalaa shuun Erekabu ni wu ceborona Baana pye: «Tɛhɛnɛ Baa Kilɛ ɲìi wo wu mɛgɛ na, wee wemu wʼa nɛ yeege na cɔnrɔmɔ pu bɛɛri ni ge, 10 wemu wʼa pa nɛ pye na Sɔli ya xu ge, wee bi giin na jomɔ nizaama wee ya pa jo nɛ mu. Nɛ wu pye pʼa co, na wu gbo Sikilagi ni, pee jomɔ pe wo footɔnɔ na.b 11 Nimɛ, a sipyikuuyo ya di shɛ tiimɛ fɔɔ gbo wu kaban, wu yasinnɛgɛ na, ta nɛ yaa na wee wo shishan pu foo yege yee na, na yee ɲuŋɔ tugo fɛɛfɛɛ na laha ɲiŋɛ ki ni wɛ?» 12 A Dawuda di wu sipyii pu pye na pu pu gbo. A pʼi pu gbo, na pu keye ye ni pu tɔɔyɔ yi kɔn, na pu yirige pɔ pu na figi Eburɔn wo lowege ki tàan. Lee kadugo na, a pʼi Ishiboshɛti ɲuŋɔ ki lɔ, na shɛ ki le Abunɛri wo faŋa ki ni Eburɔn kulo li ni.