Dawuda ya pye Izirayɛli wo saan
(1 Caŋa Ɲɛhɛɛ Jomɔ 11:1-9)
5
Ayiwa, a Izirayɛli gbaweye yi bɛɛri di ba binnɛ Dawuda fɛɛ ni Eburɔn kulo li ni, na jo: «Wèe ɲɛ ma kaciiye ni ma cére xaara. 2 Fo taashiinɛ li ni, ali na Sɔli bɛ yaha saanra ti na wèe ɲuŋɔ ni, mu wu bi Izirayɛli shɛɛn pu ɲaha coni tuun bɛɛri ni na se kashɛn na, na wu ɲaha coni na ma. Tɛhɛnɛ Baa Kilɛ bi yi jo mu mu na: ‹Mu wʼa da ba Izirayɛli naha, nɛ wo sipyii pee. Mu wu da ba bye Izirayɛli wo ɲuŋɔfɔɔ we.› » 3 A Izirayɛli nɔhɔlɛɛ pu bɛɛri di shɛ puyɛ pinnɛ mu lee pinnɛgana li na saan wu ɲaha tàan Eburɔn kulo li ni. A saannaa Dawuda di kariɲɛɛgɛ ɲɔmɛɛ lɔ ni pu ni Eburɔn kulo li ni Tɛhɛnɛ Baa Kilɛ ɲaha tàan. A pʼi Dawuda tìre kɔnhɔ wu bye saan Izirayɛli ɲuŋɔ ni.4 Tuun wemu ni Dawuda ya teŋɛ saanra ti na ge, wu shi wu bye yee kɛlɛɛ taanri (30). A wu yee kɛlɛɛ shishɛɛrɛ pye saanra ti ni (40).a 5 Yee gbarashuun ni yeye gbaara wʼa pye saanra ti ni Zhuda shi wu ɲuŋɔ ni Eburɔn kulo li ni, na yee kɛlɛɛ taanri ni taanri (33) pye Zheruzalɛmu ni Izirayɛli ni Zhuda bɛɛri ɲuŋɔ ni.
Dawuda ya Zheruzalɛmu kulo li co
6 Ayiwa, caŋa ka saannaa Dawuda ni wu kashɛnŋmuu pʼa pa yìri, na shɛ do Zheruzalɛmu kulo li na. Zhebusi shɛɛn pu bye lee kulo li ni. A pʼi Dawuda pye na: «Ma tajege wa naha wɛ, bani ali wèe wo fyɛnmɛɛ ni wèe wo tɔrɔɔ nigin nigin fɛɛ yɛ na zii mu kuruŋɔ.» Pu bi giin na Dawuda da já kulo li co wɛ.b 7 Ga a Dawuda di se ta pu na, kulo li xuu wemu wʼa kuuri ni kashɛn ɲaha kɔn kɔn kasɔrɔgɔ ni ge, na wee co. A pʼi wee mɛgɛ le na Dawuda wo kulo. Lee ninunɔ pʼa byi na Siyɔn. 8 Kee caŋa Dawuda bi jo: «Ma bu jo mʼa se ta Zhebusi shɛɛn pu na, pee fyɛnmɛɛ ni pee tɔrɔɔ nigin nigin fɛɛ pii pu ɲɛ Dawuda wo pɛɛn pu ge, ɲiŋɛ nɔhɔdaan logoro lemu pʼa su na shan kulo li ni ge, fo ma bu doro lee ni.» Lee na pʼa yu na: «Fyɛnmɛɛ ni tɔrɔɔ nigin nigin fɛɛ wa da jé puga ki ni wɛ.» 9 A Dawuda di kee taceŋɛ ki ɲɛri pye wu wogo, na ki mɛgɛ le na: «Dawuda wo kulo le.» A wu piyɛyɛ ya yereŋɛ na taga ki maha. Xuu wemu mɛgɛ pʼa yiri na Milo ge, na co wee xuu wu na fo na pa kanha ki funŋɔ ki yíri wu ni. 10 A Dawuda di ganha na fanha taa na se ɲaha na. Kashɛn Keye yi Fɔɔ Tɛhɛnɛ Baa Kilɛ bi bye ni wu ni.
Tiiri wo saan wʼa tudunmɔɔ tun Dawuda mu
(1 Caŋa Ɲɛhɛɛ Jomɔ 14:1-2)
11 Ayiwa, a saannaa Iramu, Tiiri wo saan we, a wee di tudunmɔɔ tun Dawuda mu ni sɛdiri tiin ni, ni mɛnizhee, ni faaya tɛvɛɛ, a pee di shɛ saannaa puga yereŋɛ Dawuda mu. 12 A Dawuda di li cɛ lee funŋɔ ni na Tɛhɛnɛ Baa Kilɛ wʼa baraga leni wee ni, na wu pye saan Izirayɛli ɲuŋɔ ni, na Tɛhɛnɛ Baa Kilɛ wʼa wee wo saanra ti ɲuŋɔ yirige Izirayɛli wuu na, wu sipyii pee.
Jalaa piimu pʼa se Dawuda mu Zheruzalɛmu kulo li ni ge
13 Ayiwa, ba Dawuda ya yìri Eburɔn kulo li ni na pa wɛ, a wu ba Zheruzalɛmu wo cèe pii bɛ leŋɛ. Pii wo furu bi pɔ, pii wo furu di ya ta pɔ wɛ. A wu jalaa ni pushaa pii bɛ se sanha. 14 Nagoo piimu wʼa se Zheruzalɛmu kulo li ni ge, pee wo mɛyɛ yi wa ye: Shamuwa, ni Shobabu, ni Natan, ni Solomani, 15 ni Yibari, ni Elishuwa, ni Nefɛgi, ni Yafiya, 16 ni Elishama, ni Eliyada, ni Elifelɛti.
Dawuda ya se ta Filisiti shɛɛn pu na
(1 Caŋa Ɲɛhɛɛ Jomɔ 14:8-16)
17 Ayiwa, ba Filisiti shɛɛn pʼa pa yi logo na pʼa Dawuda tìre na pye Izirayɛli wo saan wɛ, a pu bɛɛri di gari Dawuda fɛni. Ba Dawuda ya yi logo wɛ, na shɛ lara faaga wege ka ni. 18 A Filisiti shɛɛn pʼi nɔ na jaaga Arafa shi wu wo fadaaŋa ki na. 19 A Dawuda di Tɛhɛnɛ Baa Kilɛ yege na: «Ta nɛ yaa na to Filisiti shɛɛn pu na ya? Ta ma na pu le na keŋɛ ni ya?» A Tɛhɛnɛ Baa Kilɛ di Dawuda pye: «Shɛ pu fɛni, bani nʼa da pu le ma keŋɛ ni nakaara baa.» 20 A Dawuda di gari fo Baali-Perasimu ni. A wu shɛ se ta pu na wà, na jo: «Tɛhɛnɛ Baa Kilɛ ya kapahaŋa kɔn nɛ mu na pɛɛn pu na, ba lɔhɔ ma kashuu kɛgi mɛ wɛ.» Lee na pʼa wee xuu wu mɛgɛ le na Baali-Perasimu (Kapahaya yi kafɔɔ). 21 A Filisiti shɛɛn pʼi baa na pu yasunyɔ yi yaha wee xuu wu ni, a Dawuda ni wu namaa pʼi gari ni yi ni.
22 A Filisiti shɛɛn pʼi ba yìri lee kadugo na sanha, na ba jaaga sanha Arafa shi wu wo fadaaŋa ki na. 23 A Dawuda di Tɛhɛnɛ Baa Kilɛ yege. A Tɛhɛnɛ Baa Kilɛ di wu pye na: «Ma ganha bu dii pu na wɛ. Maha shɛ pu kadugo yíri, ma shɛ do pu na muri tiye yi ɲahatiimɛ pu ni. 24 Ma ba tɔɔyɔ tunmɔ nuri na foro tiye yi ɲidii li ni tuun wemu ni, mʼa togaaya lɔ wee tuun wu ni, bani Tɛhɛnɛ Baa Kilɛ wʼa toro ma ɲaha na kashɛn ki ni, wu shɛ Filisiti shɛɛn pu já.» 25 Tɛhɛnɛ Baa Kilɛ ya yemu jo Dawuda mu ge, a wu lee pye. A wu se ta Filisiti shɛɛn pu na, na co Geba kulo li na fo na shɛ nɔ Gezɛri kulo li na.