Dawuda ya gaaŋi di zhɛ Kariɲɛɛgɛ Ɲɔmɛɛ li Keshi wu lɔ ba Zheruzalɛmu ni
(1 Caŋa Ɲɛhɛɛ Jomɔ 13:1-14)
6
Ayiwa, a Dawuda di ba Izirayɛli wo kashɛn naŋmaya yi bɛɛri pinnɛ sanha, pee bye namaa kabɔfoŋɔɔ kɛlɛɛ taanri (30.000). 2 Dawuda ni pee sipyii pu bɛɛri di yìri Baale kulo li ni Zhuda wo koomɔ pu ni, na pʼi shɛ ba ni Kilɛ wo Kariɲɛɛgɛ Ɲɔmɛɛ li Keshi wu ni wee wemu na Tɛhɛnɛ Baa Kilɛ, Kashɛn Keye yi Fɔɔ wu mɛgɛ kʼa yiri ge. Wu nidɛɛngɛ ki wa serubɛɛna pu ɲuŋɔ ni, keshi wu fugba wu ni.b 3 A pʼi Kariɲɛɛgɛ Ɲɔmɛɛ li Keshi wu le wotori nivomɔ wa funŋɔ ni, na wu lɔ yeege Abinadabu wo puga ki ni, kee bye faaboboŋɔ ki na. Abinadabu jalaa Uza ni Ayo, pee pu bi wotorifomɔ wu fe.c 4 A pʼi wotori wo yirige lee yirigegana li na ni Kariɲɛɛgɛ Ɲɔmɛɛ li Keshi wu ni na foro Abinadabu wo puga ki ni faaboboŋɔ ki na. A Ayo di doro keshi wu ɲahagbaa li na. 5 Dawuda ni Izirayɛli wo puga ki bɛɛri bi sipɛrɛ tiye yi wo yatinyɛ tuuyo yi bɛɛri kpɔɔn, ni kɔnɔɔ, ni gboyo, ni taya, ni daɲaa tuuyo na yi kuuni yiyɛ na Tɛhɛnɛ Baa Kilɛ ɲaha tàan.Uza xugana
6 Ba pʼa shɛ nɔ Nakɔn wo shuu li na wɛ, a niiyɛ yʼi dɛrɛ, a Uza di wu keŋɛ yeege Kilɛ wo Kariɲɛɛgɛ Ɲɔmɛɛ li Keshi wu fɛni, na wu co. 7 A Tɛhɛnɛ Baa Kilɛ luu di yìri Uza tàan, na wu gbo wà lee kanahana le wuu na. 8 A Dawuda luu di yìri ma li kaɲuŋɔ pye Tɛhɛnɛ Baa Kilɛ bi Uza gbo lee gbogana li na. Lee na pʼa wee xuu wu mɛgɛ yiri ali niɲaa we bɛ ni na Pɛrɛzi-Uza. 9 Kee caŋa ke a Dawuda di fyaguunɔ fya Tɛhɛnɛ Baa Kilɛ na, na jo: «Tɛhɛnɛ Baa Kilɛ wo keshi wu na já shɛ shɛgana lekɛ na nɛ yíri wɛ?» 10 A Dawuda di bye wu ya sɔɔ na shɛ ni Tɛhɛnɛ Baa Kilɛ wo keshi wu ni wuyɛ yíri, Dawuda wo kulo li ni wɛ, ga na gari ni wu ni Gati shɛɛn Obɛdi-Edomu kaban. 11 A Tɛhɛnɛ Baa Kilɛ wo keshi wu yebyaa taanri pye Gati shɛɛn Obɛdi-Edomu kaban. A Tɛhɛnɛ Baa Kilɛ di baraga le Obɛdi-Edomu ni wu puga ki bɛɛri ni.
Tɛhɛnɛ Baa Kilɛ wo keshi wʼa jé Zheruzalɛmu ni
(1 Caŋa Ɲɛhɛɛ Jomɔ 15:25—16:3)
12 Ayiwa, a pʼi ba yi jo saannaa Dawuda mu na: «Tɛhɛnɛ Baa Kilɛ ya baraga le Obɛdi-Edomu wo puga ke, ni wu keŋɛ yaŋmuyɔ yi bɛɛri ni, Kilɛ wo Kariɲɛɛgɛ Ɲɔmɛɛ li Keshi wu wuu na.» Lee funŋɔ ni a Dawuda di yìri na gari Obɛdi-Edomu kaban, na shɛ Kilɛ wo keshi wu lɔ ni fundangbɔhɔ ni, na pa Dawuda wo kulo li ni. 13 Piimu pʼa Tɛhɛnɛ Baa Kilɛ wo keshi wu lɔ ge, ba pee ya ɲidaɲii gbaara pye wɛ, a Dawuda di nupee nigin ni nupige sinmɛ wogo ka wolo saraga. 14 Dawuda bi xhɔnhɔni wu fanha ki bɛɛri ɲuŋɔkana na Tɛhɛnɛ Baa Kilɛ ɲaha tàan. Lɛn fàya wo efodi† wa Dawuda bi le ba fàŋa ɲɛ wɛ. 15 A Dawuda ni Izirayɛli wo puga ki bɛɛri di Tɛhɛnɛ Baa Kilɛ wo keshi wu lɔ na pa ni fundanga mujoŋɔɔ ni maya mɛhɛɛ ni.
16 Ba Tɛhɛnɛ Baa Kilɛ wo keshi wʼa ɲɔ kɔn na jin Dawuda wo kulo li ni wɛ, a Sɔli poro pushɔ Mikali di wii fɛnɛtiri ni na saannaa Dawuda ɲa wu na sirani na xhɔnhɔni Tɛhɛnɛ Baa Kilɛ ɲahagbaa na, a wu fanhara shan wu na wu zɔ wu na.
17 Ba pʼa pa ni Tɛhɛnɛ Baa Kilɛ wo keshi wu ni wɛ, na ba wu yaha wu tayahaŋa ni, fàya puga ki ni, kee kemu Dawuda bi yereŋɛ wu mu ge. A Dawuda di saraya nizogoyo ni fundanga saraya wolo Tɛhɛnɛ Baa Kilɛ mu. 18 Ba Dawuda ya yee saraya nizogoyo ye, ni fundanga saraya yi wolo xɔ wɛ, a wu duba pye sipyiire ti mu Tɛhɛnɛ Baa Kilɛ, Kashɛn Keye yi Fɔɔ wu mɛgɛ na. 19 Lee kadugo na a wu gato kan sipyiire ti bɛɛri nigin nigin mu, Izirayɛli shɛɛn pu bɛɛri, namaa fara cèe na. Wa bɛɛri buuri gato ɲile nigin, ni tamari gato ɲile nigin, ni ɛrɛzɛn gato ɲile nigin. A sipyiire ti bɛɛri di gari pu piyɛyɛ yi ni.d
20 A Dawuda di guri pa di ba duba pye wu puga ki mu, a Sɔli poro pushɔ Mikali di foro na shɛ wu ɲuŋɔ círi, na jo: «Ga Izirayɛli shɛɛn pu wo saan wu ɲuŋɔ ya yìri niɲaa xuuni! Bani wu ceepile wo ya wuyɛ shɛ wu sipyii pu wo kapyebyezhaa pu na, ba laɲɔbaa fɔɔ da ba wuyɛ shɛ mɛ wɛ!» 21 A Dawuda di Mikali pye: «Tɛhɛnɛ Baa Kilɛ ɲaha tàan nɛ lee pye mu, wee wemu wʼa nɛ shɔɔnri lɔ, na mu wo to wu ni wu puga ki bɛɛri yaha, na nɛ teŋɛ na pye Tɛhɛnɛ Baa Kilɛ wo sipyii pu ɲuŋɔfɔɔ ge, pee piimu pu ɲɛ Izirayɛli shɛɛn pu ge. Wee Tɛhɛnɛ Baa Kilɛ we ninumɔ ɲaha tàan nʼa da da na wo fundanga ki pyi. 22 Nɛ na ba nayɛ tirige na ye le bɛ na sanha, nɛ na ba nayɛ cɛrɛŋɛ sanha fo xuuni. Ga kapyebyezhaa piimu kaa mu wʼa yu mɛ ge, nɛ na ba pɛɛŋɛ ta pee ɲaha tàan.» 23 Lee lʼa Sɔli poro pushɔ Mikali pye wu ya ta pya ta ɲa wɛ, fo na shɛ nɔ wu caxhugo na.