Tɛhɛnɛ Baa Kilɛ ya ɲɔmɛɛ lɔ Dawuda mu
(1 Caŋa Ɲɛhɛɛ Jomɔ 17:1-15)
7
Ayiwa, ba saannaa Dawuda ya jé wu saannaa puga ki ni wɛ, lee bi Tɛhɛnɛ Baa Kilɛ ta wʼa wu shɔ wu pɛɛn pu bɛɛri na, na ɲaɲiŋɛ kan wu mu. 2 Wee tuun wu ni, a saan wu Kilɛ tudunmɔɔ Natan pye: «Wii dɛ, nɛ na ɲɛ ke sɛdiri†a tiye puga nijeŋɛ ke ni, na ta Kilɛ wo Kariɲɛɛgɛ Ɲɔmɛɛ li wo Keshi wu ɲɛ fàya puga yɛ ni.»3 A Natan di wu pye: «Kaa kaa li ɲɛ ma funŋɔ ni ge, li pye, bani Tɛhɛnɛ Baa Kilɛ wa ni ma ni.»
4 Ga kee caŋa ki piige ki ni a Tɛhɛnɛ Baa Kilɛ di ba Natan pye: 5 «Shɛ na kapyebye Dawuda pye na yemu Tɛhɛnɛ Baa Kilɛ ya jo ge, yee yi wa mɛ: ‹Mu wu wa da puga kɔn nɛ mu, nɛ bye kee ni ya? 6 Caŋa kemu nɛ Izirayɛli shɛɛn pu yeege Misira fiige ki ni ge, na co kee caŋa ki na fo na pa nɔ niɲaa na, mʼa li cɛ na nɛ sanha jé ɲa puga ni wɛ. Ga na nɛ yaha lee ɲara li bɛɛri na ni pu ni, fàya puga ki bye nɛ tatɛɛngɛ. 7 Nɛ tuun wemu bɛɛri pye na ɲaari ni Izirayɛli shɛɛn pu ni ge, ɲuŋɔfɛɛ piimu nɛ bi shɔɔnri pu ni na pye pu ɲahagbaacomɔɔ ge, nɛ wee wa pye ɲa na jo ɲaha na pʼa pye pu ya ta ticeye puga yereŋɛ na mu-i ya?› »
8 A Tɛhɛnɛ Baa Kilɛ di Natan pye sanha na: «Ayiwa nimɛ, shɛ yi jo na kapyebye Dawuda mu na yemu Kashɛn Keye yi Fɔɔ Tɛhɛnɛ Baa Kilɛ wʼa jo ge yee yi wa mɛ: ‹Yatɔɔnahama ni mu bye na yatɔɔyɔ naha, a nɛ mu shɔɔnri lɔ na pye na wo sipyii pu wo ɲuŋɔfɔɔ, pee piimu pu ɲɛ Izirayɛli shɛɛn pu ge. 9 Xuu bɛɛri ni mʼa toro ge, nɛ pye ni ma ni ma kapyegee ki bɛɛri ni. Nɛ ma pɛɛn pu bɛɛri kɔri laha ma ɲahagbaa na. Mɛgbɔhɔ fɛɛ piimu pu wa ɲiŋɛ ke na ge, nʼa da ba ma mɛgɛ ki pɛlɛ ba pee ɲɛ wɛ. 10 Nɛ na ba tatɛɛngɛ ka kan na sipyii pu mu, Izirayɛli shɛɛn pee. Pu niyɛ na ba gemɛ juri kee ni, pʼa bye naha ɲaɲiŋɛ na, kaa la shishiin wa da ba funbɛɛnrɛ leŋɛɛ pu ni nige naha wɛ, sipyikuuyo bɛ di wa da ba pu kana nige ma na jo ba lʼa bi byi taashiinɛ li ni, 11 ni kiiri kɔnvɛɛ pu wo tuun wu ni wɛ, pee piimu nɛ bi teŋɛ pu ɲuŋɔ ni ge. Nɛ na ba ma shɔ ma pɛɛn pu bɛɛri na, na ɲaɲiŋɛ kan ma mu. Nɛ Tɛhɛnɛ Baa Kilɛ ya mu pye jo puga kemu nʼa da ba gan ma mu ge, kee na ba bye ma kadugo shɛɛn. 12 Ma wo caŋa ɲii li ba fa, a mʼa shɛ binnɛ ni ma sefɛlɛɛ pu ni, nɛ na ba mayɛ pyaa wo ja wa lɔ, na wee teŋɛ saanra ti na na pye ma faara. Nɛ na ba baraga le wu saanra ti ni xuuni. 13 Wee wʼa da ba puga yereŋɛ nɛ mɛgɛ na. Nɛ na ba baraga le yaha gbee wu saanra koro li ni. 14 Nɛ na ba bye wu To, wʼa bye nɛ ja.b Wu ba kakuunɔ la pye, nɛ na sipya wa yaha wee na wu kuu ni kagaanga ni ba to ya wu ja kuuni wɛ. 15 Ga nʼa da ga na wo saama pu laha wu na, ba nɛ pu laha Sɔli na, na wu kɔri laha ma ɲaha tàan wɛ. 16 Saanra tʼa da ga foro mu wo puga ki ni bada wɛ. Baraga na ba bye yaha ma saanra ti ni fo gbee.› »
17 Lee kadugo na Kilɛ ya lemu bɛɛri shɛ Natan na, na jomɔ pemu bɛɛri jo wu mu ge, a wu shɛ yee bɛɛri paari Dawuda mu.
Dawuda ya Tɛhɛnɛ Baa Kilɛ shaari
(1 Caŋa Ɲɛhɛɛ Jomɔ 17:16-27)
18 Wee tuun wu ni, a saannaa Dawuda di gari Tɛhɛnɛ Baa Kilɛ yíri, na shɛ wu pye: «Wù Kafɔɔ Tɛhɛnɛ Baa Kilɛ, ɲaha nɛ di ɲɛ wɛ? Ɲaha nɛ puga di ɲɛ, fo mu wu na nɛ lɔ shɛ nɔ fo pe nɔmɔ pe ni wɛ? 19 Tɛhɛnɛ Baa Kilɛ, lemu bɛɛri mu ya pye ge, mu ya lee bɛɛri ta lʼa cɛrɛ ma ɲii ni, na ɲibaŋa keree bɛ jo ma kapyebye wu puga ki shizhaa na. Ta sipyitiimɛ ya yaa ni ke pɛɛŋɛ ke bɛɛri ni? 20 Yekɛ nɛ Dawuda di da já jo mu mu sanha wɛ? Bani wù Kafɔɔ Tɛhɛnɛ Baa Kilɛ ya wu kapyebye wu cɛ. 21 Ma na jo mʼa bi ɲɔmɛɛ lɔ, na fara lee na, kee fungɔngɔ kʼa bi sii ma mu, lee wuu na mʼa kii kagbɔhɔɔ kii pye, na ma kapyebye wu bɛ pye wʼa ki cɛ. 22 Can na mu ya sii tii pɛlɛ wù Kafɔɔ Tɛhɛnɛ Baa Kilɛ. Ma ɲɔhɔ ɲɛ wɛ! Kilɛ watii bɛ di ɲɛ wà mu kadugo na wɛ, ma na jo ba wèe ya tee na yi nuri wù ɲuwegee ki ni wɛ. 23 Ta shi nigintiimɛ wa ɲɛ sanha ke ɲiŋɛ ke na ba ma sipyii Izirayɛli wu ɲɛ wɛ, kilɛlɛɛ piitiilee na shɛ wu ɲuŋɔ wolo na yeege fiige katii ni, na wu pye pu wo sipyii, na wu mɛgɛ pɛlɛ ba Izirayɛli shɛɛn pu ɲɛ-ɛ ya? Mʼa kagbɔhɔɔ pye pu mu, na fyaara kagbɔhɔɔ pye ma fiige ki mu, ma sipyii pu ɲaha tàan, pee piimu ɲuŋɔ mʼa wolo na foro Misira fiige ke, ni ki kilɛlɛɛ pu keŋɛ ni, kɔnhɔ pʼi bye ma wuu ge. 24 Ma baraga le Izirayɛli shɛɛn pu ni, kɔnhɔ pʼi bye yaha gbee ma wo shi. A mu Tɛhɛnɛ Baa Kilɛ di bye pu Kilɛ. 25 Ayiwa, nimɛ Tɛhɛnɛ Baa Kilɛ, jomɔ pemu mʼa jo ma bulona we ni wu puga ki shizhaa na ge, kori yaha gbee lee ɲɔmɛɛ le na. Yemu mʼa jo ge, mʼa yee koro ɲaari. 26 Lee funŋɔ ni, ma mɛgɛ ki na ba bɛlɛ tuun bɛɛri ni, fo sipyii pʼa yu: ‹Kashɛn Keye yi Fɔɔ Tɛhɛnɛ Baa Kilɛ wu ɲɛ Izirayɛli wo Kilɛ we.› Ma bulona Dawuda bɛ wo puga kʼi sii baraga ta ma ɲaha tàan. 27 Bani mu Tɛhɛnɛ Baa Kilɛ, Kashɛn keye yi Fɔɔ, Izirayɛli shɛɛn pu wo Kilɛ we, mu wʼa le kaa le shɛ ma bulona wu na, na wu pye na: ‹Nɛ na ba puga kan ma mu.› Lee lʼa ma bulona wu luu waha ke ɲɛrɛgɛ ke bye na. 28 Ayiwa nimɛ, Tɛhɛnɛ Baa Kilɛ, wù Kafɔɔ we, mu wu ɲɛ Kilɛ we. Ma jomɔ pu ɲɛ can. Mʼa pe saama pe ɲɔmɛɛ lɔ ma bulona wu mu. 29 Lee wuu na nʼa ma ɲɛɛri jo ma duba ma bulona wu puga ki mu, kɔnhɔ kʼi gori yaha gbee ma ɲaha tàan. Bani mu Tɛhɛnɛ Baa Kilɛ yɛpyaa kʼa jo. Mu wo jomɔ pu fanha ni bɛ ma bulona wu puga kʼa da ba duba taa fo gbee.»