2 Samuwɛli 8

Dawuda ya se ta kabanugo fiiye ya na

(1 Caŋa Ɲɛhɛɛ Jomɔ 18:1-13)

Ayiwa, lee kadugo na a Dawuda di se ta Filisiti shɛɛn pu na, na pu tirige na yaha wu wo fanha ki nɔhɔ ni, na pu wo fanha ki shɔ pu na.

2 A wu se ta Mowabu shi shɛɛn pu bɛ na. Wu bi ma pee sinniŋɛ ɲiŋɛ na, na daanna mɛɛ taga pu taanna. Wu bu daanna mɛɛ li ɲìi shuun ta, wʼa pee gbo, na daanna mɛɛ li ɲii nigin taanna, na pee ɲìi wuu yaha. A Mowabu shi shɛɛn pʼi guu Dawuda mu, na ganha na munaa pɛrɛmɛ wo na gaan wu mu.

3 A Dawuda di se ta Zoba wo saan wu bɛ na, wee ɲɛ Erobu ja Adadezɛri. Lee bi Adadezɛri ta wʼa kari na wu shɛ Efirate gba wu wo koomɔ pu co di le sanha wu wo fanha ki nɔhɔ ni. 4 A Dawuda di kashɛn wotoriyo kabɔfonɔ nigin ni xhuu gbarashuun (1.700) shɔ wu na, yi ni yi paavɛɛ, ni kashɛnŋmuu tɔdiiye fɛɛ kabɔfoŋɔɔ kɛlɛɛ shuun (20.000). A wu xhuu nigin (100) yɛ yaha shɔnyɔ yi ni, na yisaya bɛɛri wo tɔɔyɔ yi kavaan pu kɔn kɔn. 5 A Damasi koomɔ pu wo Aramu shɛɛn pʼi ba di ba Zoba saan Adadezɛri tɛgɛ, a Dawuda di Aramu shɛɛn kabɔfoŋɔɔ kɛlɛɛ shuun ni shuun (22.000) gbo. 6 Ba lee ya pye wɛ, a Dawuda di wu wo ɲuŋɔfɛɛ pii teŋɛ teŋɛ Damasi wo Aramu shɛɛn pu ɲuŋɔ ni. A Damasi wo Aramu shɛɛn pʼi guu Dawuda mu, na ganha na munaa pɛrɛmɛ wo na gaan wu mu. Tɛhɛnɛ Baa Kilɛ bi se kaan Dawuda mu wu tashɛyɛ yi bɛɛri ni. 7 Adadezɛri wo namaa pu bi sanni ŋmakɔyɔ yemu suu puyɛ na ge, a Dawuda di yee lɔ na pa Zheruzalɛmu ni. 8 A saannaa Dawuda di daɲaa tɔɔrɔ niɲɛhɛrɛ bɛ lɔ Betali kulo le ni Berotayi kulo li ni, kee ɲɛ Adadezɛri wo kulogoo kʼa.

9 Ayiwa, a Ama wo saan Toyi di logo na Dawuda ya se ta Adadezɛri wo kashɛn keŋɛ ki bɛɛri na. 10 A wu wu ja Zhoramu tun Dawuda mu, na wu shɛ wu shaari wu wu sɔ, ma li kaɲuŋɔ pye wʼa kashɛn kɔn Adadezɛri na, na se ta wu na. Bani kashɛn ki bye Toyi ni Adadezɛri tɛ ni. A Zhoramu di gari ni warifyɛn yaŋmuyɔ, ni sanni yaŋmuyɔ, ni daɲaa yaŋmuyɔ ni ma shɛ gan Dawuda mu. 11 A saannaa Dawuda di yi yaha Tɛhɛnɛ Baa Kilɛ yahama ni, ma na jo ba wʼa fiiye yisaya wo warifyɛn we ni sanni wu yaha yahagana lemu na Tɛhɛnɛ Baa Kilɛ yahama ni wɛ, yee fiiye yemu na wʼa bi se ta ge. 12 Yee ɲɛ: Aramu shɛɛn, ni Mowabu shɛɛn, ni Amɔ shi shɛɛn, ni Filisiti shɛɛn, ni Amalɛki shi shɛɛn. Wʼa kashɛn naafuu wemu bɛ ta na foro Zoba saan Erobu ja Adadezɛri ɲuŋɔ ni ge, wʼa bi wee bɛ yaha Tɛhɛnɛ Baa Kilɛ yahama ni.

13 Ba Dawuda ya se ta Damasi wo Aramu shɛɛn pu na wɛ, wu niguriba wo, a wu Edomu shɛɛn namaa kabɔfoŋɔɔ kɛ ni gbarataanri (18.000) gbo suumɔ pu wo fadaan li na. A wu mɛgɛ di sii foro fo xuuni. 14 A wu wu wo ɲuŋɔfɛɛ pʼi teŋɛ Edomu fiige ki ni, a wu pee ɲuŋɔfɛɛ pu teŋɛ Edomu fiige ki bɛɛri ni. Xuu bɛɛri ni Dawuda bi se ge, Tɛhɛnɛ Baa Kilɛ bi se kaan wu mu wee xuu wu bɛɛri ni.

Dawuda wo fanha ki sipyii pu mɛyɛ

(1 Caŋa Ɲɛhɛɛ Jomɔ 18:14-17)

15 Dawuda ya pye Izirayɛli shɛɛn pu bɛɛri wo saan. Wu bi pu bɛɛri wo kiiri wu tiini na gɔɔn na saha ni can wu ni. 16 Seruya ja Zhowabu wu bi bye wu kashɛn keŋɛ ki ɲuŋɔfɔɔ we, Ayiludi ja Zhozafati wee bye wu jomɔ pu torogovɔɔ. 17 Ayitubi ja Sadɔki, ni Abiyatari ja Ayimelɛki, pee bye saraya ɲaha shɔɔnrivɛɛ, Seraya di ɲɛ wu kama kavɔɔ. 18 Zhoyada ja Benaya, wee bye Dawuda wo ɲuŋɔ sigivɛɛ pu ɲuŋɔfɔɔ, pee piimu pu ɲɛ Kerecɛɛn ni Pelecɛɛn pu ge. Dawuda wo jalaa pʼi ɲɛ saraya ɲaha shɔɔnrivɛɛ.