Dawuda ya saama pye Mefibosɛti na
9
Ayiwa, caŋa ka Dawuda ya pa yegeŋɛ pye na: «Ta Sɔli wo kpuun shɛn wa wa sanha ɲìi na, nɛ na já saama pye wemu na Zhonatan wuu na ge ya?»a 2 Lee bi Sɔli wo kapyebye wa ta wà, wu mɛgɛ di ɲɛ na Siba, a pʼi ba ni wee ni Dawuda mu. A saan wu wu pye: «Ta mu wu wa Siba we?» A wu jo: «Uun nɛ wu ɲɛ ma kapyebye we.» 3 A Saan wu jo: «Ta wa wa nige Sɔli wo kpuun li na, nɛ na já saama pye wemu na na saha ni Kilɛ wo ɲɔmɛɛ fɛɛrɛ ti ni wɛ?» A Siba di saan wu ɲɔ shɔ na: «Zhonatan wo ja wa wa sanha, wu tɔɔyɔ yʼa kyɛɛgi.»b 4 A saan wu jo: «Mii wu di ɲɛ wɛ?» A Siba di saan wu pye: «Wu wa Lodebari kulo li ni, Amiyɛli ja Makiri yíri.» 5 A saannaa Dawuda di wu tun kari wu fɛni Amiyɛli ja Makiri kaban Lodebari ni. 6 A Mefibosɛti di ba saan wu yíri, na ba wu nuguro sin, na ɲaha ke buri ɲiŋɛ ki na. Sɔli ja Zhonatan wo ja wu bye wii. A Dawuda di jo: «Mefibosɛti!» A wu jo: «Ma kapyebye wu we.» 7 A Dawuda di wu pye: «Ma ganha bu fya wɛ! Nʼa da ba saama pye ma na ma to Zhonatan wuu na. Ɲiŋɛ bɛɛri ki bye ma tolɛ Sɔli wogo ge, nʼa da kee bɛɛri tɛrɛŋɛ di gan ma mu, mʼa nugo mʼa li ni na ni caŋa bɛɛri.» 8 A Mefibosɛti di nuguro sin na jo: «Ɲaha nɛ di ɲɛ fo mu wu na kasɛɛgɛ yaha ke poxhugo ke na wɛ, kee kemu nɛ ɲɛ ge?»9 A saan wu Siba yiri, Sɔli wo kapyebye we, na wu pye: «Yaaga bɛɛri ki ɲɛ Sɔli ni wu puga ki wogo ge, nɛ yee bɛɛri kan ma kafɔɔ wu ja wu mu. 10 Ma na ba ɲiŋɛ ki faa pyi wu mu, ma ni ma jalaa, ni ma kapyebyii pu ni. Ma na ba yalɔɔrɔ ti kemɛɛ na ma, kɔnhɔ ma kafɔɔ wu ja wu da ɲɔlige taa. Ma kafɔɔ wu ja Mefibosɛti na ba li ni nɛ ni caŋa bɛɛri.» Lee bi Siba ta ni jalaa kɛ ni kaguro ni, ni kapyebyii kɛlɛɛ shuun (20). 11 A Siba di saan wu pye: «Na kafɔɔ saan we, labye we mʼa kan na mu ge, nʼa da ba wu pye cibɛ.»
A Mefibosɛti di ganha na li ni saan wu ni ba wu ja ɲɛ wɛ. 12 Funana la bye Mefibosɛti mu na Mika. Piimu bɛɛri pu bye Siba wo puga ki ni ge, a pee bɛɛri di ganha na kapyeŋɛɛ pyi Mefibosɛti mu. 13 Zheruzalɛmu ni Mefibosɛti bi tiin, bani caŋa bɛɛri wu bi li ni saan wu ni. Wu tɔɔyɔ yi bɛshuun wu bi kyɛɛgi.