Amɔ shi shɛɛn pʼa Dawuda wo tudunmɔɔ pu shiige
(1 Caŋa Ɲɛhɛɛ Jomɔ 19:1-5)
10
Ayiwa, lee kadugo na a Amɔ shi shɛɛn pu wo saan wu ba xhu, a pʼi wu ja Anuni teŋɛ saanra ti na wu faara. 2 A Dawuda di jo: «Nʼa da saama pye Nakasi ja Anuni mu, ba wu to wʼa bi saama pyi na mu wɛ.» A Dawuda di wu fanha ki sipyigbɔɔ pii tun shɛ wu mu, na pu shɛ wu to wu kpɔn pu shaari. Ba pee tudunmɔɔ pʼa shɛ jé Amɔ shi shɛɛn pu wo fiige ki ni wɛ, 3 a Amɔ shi shɛɛn pu wo ɲuŋɔfɛɛ pʼi pu kafɔɔ Anuni pye: «Dawuda na pii tun na pu pa mu to wu kpɔn pu shaari, mu ya giin na pɛɛŋɛ wʼa taha mu to wu na gɛ? Ta bɛ Dawuda ya pii tun na pa, pʼi ba kulo li saala, pʼi li sɛɛri, pʼi ba li kyɛɛgi wɛ?» 4 Ba lee ya pye wɛ, a Anuni di Dawuda wo tudunmɔɔ pu co, na pu ɲahazhɔlɔɔ pu taaya ya kuu, na pu fàya yi cere kɔn fo pu nafizheŋɛɛ kii na. Lee kadugo na, na pu yaha kari. 5 A pii di shɛ yee jo Dawuda mu, a Dawuda di wa tun wʼa shɛ jiri pu na, bani pu bi shiige le pu ɲahaya ni. A Dawuda di yi jo pʼa shɛ jo pu mu na pu tiin Zheriko kulo li ni, fo pu ɲahazhɔlɔɔ pu ba shɛ fun, na pee ba fun na pʼi na pʼa ma puga.Dawuda ya kashɛn kɔn Amɔ shi shɛɛn pee, ni Arame shɛɛn pu na
(1 Caŋa Ɲɛhɛɛ Jomɔ 19:6-19)
6 Ayiwa, a Amɔ shi shɛɛn pʼi li ɲa na pee ya puyɛ la wolo Dawuda na. Wee tuun wu ni a pʼi shɛ Bɛti-Erobu kulo li wo Arame shɛɛn pee, ni Zoba kulo li wo Arame shɛɛn pu wo kashɛnŋmuu pu lɔ saraa na, a pee di bɛ ni kashɛnŋmuu kabɔfoŋɔɔ kɛlɛɛ shuun (20.000) ni. A pʼi shɛ kashɛnŋmuu kabɔfonɔ nigin (1.000) lɔ Maaka wo saan wu mu, na shɛ kabɔfoŋɔɔ kɛ ni shuu (12.000) lɔ Tobu shɛɛn mu. 7 Ba Dawuda ya yee logo wɛ, na Zhowabu yaha kari pu fɛni ni kashɛn keŋɛ ki bɛɛri ni, pu kashɛn naŋmaya yi bɛɛri. 8 A Amɔ shi shɛɛn pʼi puyɛ gbegele kashɛn ki na, na ba daanni pu wo kugbɔɔ li tajege ki ɲɔ ki na. Lee bi Zoba ni Erobu wo Arame shɛɛn pee, ni Tobu ni Maaka wo namaa pu ta pee ya shɛ binnɛ pu yɛ sige ki ni. 9 A Zhowabu di li ɲa na kabaya shuun na kashɛn ki wa, ka wa pu ɲahagbaa na, ka di ɲɛ pu kadugo yíri. A wu kashɛn naŋmaya ya shɔɔnri Izirayɛli wo naŋmaya yi ni, na dii ni pee ni Arame shɛɛn pu na. 10 A wu kashɛn keŋɛ kisaŋa kaa le wu cuun Abishayi keŋɛ ni, a wee di ɲaha tii Amɔ shi shɛɛn pu na. 11 A Zhowabu di wu cuun wu pye: «Arame shɛɛn pu fanha ba ɲɛhɛ nɛ wogo ki na, mʼa ba nɛ tɛgɛ. Amɔ shi shɛɛn pu fanha ba ɲɛhɛ ma bɛ na, nɛ bɛ na zhɛ ma tɛgɛ. 12 Ma yatɛnyɛ waha! Wù wù yatɛnyɛ waha wù wo shi we, ni wù Kilɛ wu wo kulogoo ki wuu na, Tɛhɛnɛ Baa Kilɛ wo ɲidaan ɲɛ wemu ge, wu na wee pye!» 13 A Zhowabu di shɛ do Arame shɛɛn pu na ni wu wo kuruŋɔ ki ni, a pee di baa Zhowabu ɲaha na. 14 Ba Amɔ shi shɛɛn pʼa Arame shɛɛn pu ɲa pʼa paa wɛ, a pu bɛ di baa Abishayi ɲaha na, na guri jé pu kugbɔɔ li ni. A Zhowabu di guri Amɔ shi shɛɛn pu fɛni, na ba Zheruzalɛmu ni.
15 Ba Arame shɛɛn pʼa li ɲa na Izirayɛli shɛɛn pʼa se ta pee na wɛ, a pu bɛɛri di shɛ puyɛ pinnɛ. 16 Arame shɛɛn piimu pu bye Efirate Gba wu kogii wu na ge, a Adadezɛri di tuduro tun pee mu, a pʼi ba Elamu kulo li ni. Sobaki wu bye pu ɲaha na, Adadezɛri wo kashɛn keye yi ɲuŋɔfɔɔ we. 17 A pʼi ba yee jo Dawuda mu. A Dawuda di Izirayɛli bɛɛri yiri pinnɛ, na Zhurudɛn gba wu kɔn ɲɛri, na gari Elamu kulo li ni. A Arame shɛɛn pʼi kashɛn ki gbegele Dawuda fɛni, na do wu na. 18 A Arame shɛɛn pʼi baa gbee Izirayɛli shɛɛn pu ɲaha na. A Dawuda di kashɛn wotoriyo xhuu gbarashuun (700) wo dugivɛɛ gbo, ni shɔnduguloo kabɔfoŋɔɔ kɛlɛɛ shishɛɛrɛ (40.000) A wu pu kashɛn keŋɛ ki ɲuŋɔfɔɔ Sobaki bɛ bana fo xuuni, a wu xhu wee xuu wu ni. 19 Saannaa piimu bɛɛri pu bi kuu Adadezɛri mu ge, ba pee ya li ɲa na Izirayɛli ya se ta pee na wɛ, a pʼi ɲaɲiŋɛ sha pu ni Izirayɛli tɛ ni, na guu Izirayɛli mu. Lee kadugo na Arame shɛɛn pu ya sɔɔ na shɛ Amɔ shi shɛɛn pu tɛgɛ nige wɛ.