2 Samuwɛli 11

Dawuda ni cee wa keree

Ba yee lʼa maha círi wɛ, tuun wemu ni saannaa pu ma se kashɛn ki na ge, a Dawuda di Zhowabu ni wu kashɛn ɲuŋɔfɛɛ, ni Izirayɛli wo kashɛnŋmuu pu bɛɛri yaha kari kashɛn na. A pʼi shɛ Amɔ nagoo pu kyɛɛgi, na shɛ Araba maha, pu kugbɔɔ le, na diin li ɲɔ na. Ga Dawuda yɛ pyaa ki ge, wee bi kori Zheruzalɛmu ni. 2 Caŋa ka yakoŋɔ Dawuda ya pa yìri wu tasinnɛgɛ ni, na dugi na ɲaari ɲaari wu zangaso wu fugba ni. Na wu yaha kataŋa ki na, a wu cee wa ɲa wu na wuri. Wee bi sii ɲɔ. 3 A Dawuda di tudunmɔ yaha shɛ wee cee wu keree yege. A pʼi ba wu pye: «Eliyamu poro Batisheba wu ɲɛ wii, Ɛti shi shɛn Uri wo shɔ.» 4 A Dawuda di tuduro yaha pʼa shɛ wee cee wu yiri. Lee bi wu cèe kalɛɛ ta lʼa toro wee tuun wu ni, a wu wu fɛfɛɛrɛ keree ɲɔ fa. Ayiwa, a wu ba Dawuda kaban. A Dawuda di ba sinnɛ ni wu ni, a wu na kari wu puga.

5 Lee funŋɔ ni a cee wu yere yacɛrɛ na, na tuduro yaha shɛ jo Dawuda mu na: «Nɛ wʼi yere yacɛrɛ na.» 6 Wee tuun wu ni a Dawuda di tuduro tun Zhowabu mu na: «Ɛti shi shɛn Uri yaha pa na mu.» A Zhowabu di Uri yaha shɛ Dawuda yíri. 7 Ba Uri ya nɔ wɛ, a Dawuda di wu yege Zhowabu keree na, ni kashɛnŋmuu pusamaa ni kashɛn ki bɛ keree na. 8 Lee kadugo na a Dawuda di wu pye: «Shɛ puga, mʼa shɛ ŋmɔ.» A Uri di foro saan wu kaban, a saan wu ma yakanga kan pʼa shɛ gan wu mu.

9 Ga a Uri di binnɛ shɔn ni saan wu kapyebyii pu ni saan wu puga ki kuɲɔɔ li ɲɔ ki na. Wu ya ta kari wu kaban wɛ. 10 A pʼi shɛ Dawuda pye: «Uri ya ta kari wu kaban wɛ.» A Dawuda di Uri pye: «Ta kulo ni bɛ mu ya yìri nimɛ wɛ? Ɲaha na mu di ya ta shɛ puga-ɛ do?» 11 A Uri di Dawuda pye: «Kariɲɛɛgɛ Ɲɔmɛɛ li Keshi wu fara Izirayɛli kashɛn keŋɛ ke, ni Zhuda kashɛn keŋɛ ki na, pee wa shuun fàya buguloo ni. Nɛ kafɔɔ Zhowabu ni kashɛn ɲuŋɔfɛɛ pu wa shuun wà kashɛn ki sige ni, nɛ ma já shɛ na kaban, di shɛ li, di gba, di shɔn ni na shɔ ni ya? Nɛ kaa jo na ma yaha ɲiifɛɛrɛ ni, nɛ kunni wa da já lee la pye wɛ.» 12 A Dawuda di Uri pye: «Uun, ɔɔ Tiin naha, mʼa niɲaa bɛ pye. Ɲiga na di na ba ma yaha mʼa gaaŋi.» A Uri di kee caŋa ki ni ki ɲimuguro ti pye Zheruzalɛmu ni. 13 A Dawuda di wu yiri yalige na wu kaban. A wu shɛ li, na gba. A Dawuda di wu gba fo na wu ɲi sinmɛ na. Ga lee bɛ na, kee piige ki bɛ ni a Uri di shɛ binnɛ shɔn ni saan wu kapyebyii pu ni, wu ya ta shɛ wu kaban wɛ.

14 Ɲimuguro ti ɲisɔɔgɔ ki na, a Dawuda di sɛmɛ wa ka na kan Uri mu wu shɛ gan Zhowabu mu. 15 Dawuda bi yi ka wee sɛmɛ wu ni na: «Shɛ Uri yaha kashɛn ki fanha taɲɛhɛŋɛ xuu wu ni, yʼi ba mɔɔri kuri yʼi wu yaha wà, kɔnhɔ pʼi wu gbo.»

16 Ayiwa, ba Zhowabu ya sɛmɛ wu kalaa wɛ, wu wo kulo li kasɛɛgɛ funŋɔ ni, wʼa li cɛ na jo xuu wemu ni kashɛn kʼa da ba wɛri ge, a wu Uri yaha wà. 17 A kulo li shɛɛn pʼi foro to Zhowabu ni wu kashɛn keŋɛ ki na. A pʼi Dawuda wo kashɛnŋmuu pʼa ni kashɛn ɲuŋɔfɛɛ pʼi gbo. A Ɛti shi shɛn Uri bɛ di xhu.

18 A Zhowabu di tudunmɔ wa tun, na wu shɛ kashɛn ki torogaŋaa ki bɛɛri jo Dawuda mu. 19 A wu tudunmɔ wu pye: «Ma ba shɛ kashɛn ki torogaŋaa ki bɛɛri jo xɔ saan wu mu, 20 wu luu bu yìri, a wu jo: ‹Ɲaha na yee dʼa shɛ jé kulo li fɛɛ ni, na da to li na wɛ? Ta yee ya li cɛ na pu ma ŋmaya ŋmuu na yìri kasɔrɔyɔ yi fugba wu ni wɛ? 21 Jɔgɔ wu dʼa Yerubesɛti ja Abimɛlɛki gbo wɛ? Ta cee bɛ wa tugubinnɛ yaha shan wu ɲuŋɔ ni, na yìri kasɔrɔgɔ fugba ni wɛ? Ta lee xugana li na bɛ wʼa xu Tibɛsi kulo li ni wɛ? Ɲaha kʼa yee pye yee ya fulo kasɔrɔgɔ ki na wɛ?› Wee tuun wu ni, mʼa wu pye: ‹Ma kapyebye Uri bɛ wʼa xu.› »

22 Ayiwa, a tudunmɔ wu gari. Ba wʼa nɔ wɛ, tuduro temu bɛɛri Zhowabu ya jo wu mu ge, a wu tee bɛɛri jo. 23 A tudunmɔ wu saan wu pye: «Pii namaa pii ya se ta wèe na. Pʼa foro na jíri wèe na sizaya yi ni, a wèe di pu kuruŋɔ na pa fo kulo li tajege ki ɲɔ ki na. 24 A sindaaya fɛɛ pʼi ganha na ma kapyebyii pu ŋmuu na yìri kasɔrɔgɔ ki fugba wu ni, a pii di xhu ma kashɛnŋmuu pu ni, a ma kapyebye Uri bɛ di xhu, Ɛti shi shɛn we.» 25 A Dawuda di tudunmɔ wu pye: «Shɛ yi jo Zhowabu mu na wu ganha bu lee yaha wuyɛ mu kawaa wɛ, bani ŋmɔpara ya gbuu ke kashɛn keŋɛ ke mu, na gbuu ke bɛ mu. Na wu yatɛnyɛ waha kulo li fɛni, wu li ja. Shɛ yee jo wu mu, mʼa samɔhɔrɔ le wu ni.» 26 Ba Uri shɔ wʼa wu poo wu xhu wu logo wɛ, na wu yamɛɛ su. 27 Ba yamɛɛ li cabyaa kʼa fa wɛ, a Dawuda di tuduro yaha shɛ cee wu yiri pa wu kaban. A wu wu leŋɛ, na ja se wu na.

Lemu bɛɛri Dawuda ya pye le kaa le funŋɔ ni ge, lee bi kolo Tɛhɛnɛ Baa Kilɛ mu.