Kilɛ ya wu tudunmɔ Natan tun Dawuda mu
12
A Tɛhɛnɛ Baa Kilɛ di Natan tun Dawuda mu. A Natan di gari Dawuda fɛni na shɛ wu pye: «Namaa shuun bye kulo la ni, nigin wa ɲɛ kabyaa fɔɔ, wusama ɲɛ la baa fɔɔ.a 2 Dubyaa niɲɛhɛmɛɛ ni niiyɛ niɲɛhɛyɛ yi bye kabyaa fɔɔ wu mu. 3 Ga yaaga katii bye la baa fɔɔ wu mu na ye dubyashɔrɔ nigin na wɛ. Wu bi lee shɔ na bɔri. A lʼi ganha na lɛgi wu kaban ni wu nagoo ni. Wee dubyashɔ wu bi wee ná wu yaligee ki li, na gbuu wu cɛɛgbuu li ni. Dubya wu bi ŋmunɔɔ wu dodoŋɔ na. Wee dubya wu bye wee ná wu mu kanna wu poro pushɔ wi. 4 Ayiwa, a nabun di ba jé kabyaa fɔɔ wu mu caŋa ka. Kabyaa fɔɔ wu ya ta sɔɔ na yatɔɔgɔ ka co wu wo niiyɛ ye kelee wu yatɔɔbya wu ni di gbo nabun wu mu wɛ. Ga a wu shɛ la baa fɔɔ wu wo dubyashɔ wu co na pa gbo wu nabun wu mu.»5 Taapile ni a Dawuda luu di sii yìri fo xuuni wee kabyaa fɔɔ wu tàan. A wu wakaraa Natan pye: «Nɛ kaa Tɛhɛnɛ Baa Kilɛ ɲìi wo wu mɛgɛ na, ná wemu wʼa lee pye ge, wee ni xu wʼa yaa. 6 Dubya wemu wʼa co ge, wʼi dubyaa shishɛɛrɛ kan wee dubya wu tɛgɛ, bani kakuunɔ wʼa pye, wu ya ta pye ɲuŋɔ ɲaarivɔɔ wɛ.» 7 Wee tuun wu ni a Natan di Dawuda pye: «Muyɛ pyaa ki ɲɛ wee ná we.» A wu nugoo jo sanha na: «Yemu Tɛhɛnɛ Baa Kilɛ, Izirayɛli wo Kilɛ wʼa jo ge, yee yi wa mɛ: ‹Nɛ wʼa mu tìre na pye Izirayɛli shɛɛn pu wo saan. Nɛ wʼa mu shɔ Sɔli na. 8 Nɛ ma kafɔɔ Sɔli wu puga ki le ma keŋɛ ni, na wu cèe pu kan ma mu. Nɛ mu teŋɛ Izirayɛli ni Zhuda shi wu ɲuŋɔ ni. Yee bye yee ya mu yaa wɛ ge, nɛ bi da zii la fara yee na. 9 A ɲaha di mu pye mu ya nɛ Tɛhɛnɛ Baa Kilɛ jomɔ pu fanha, na kakuunɔ pye nɛ na wɛ wɛ? Mʼa Ɛti shi shɛn Uri gbo ni ŋmɔpara ni, na wu shɔ lɔ na pye ma shɔ. Ta Amɔ shi shɛɛn pu mu bɛ mʼa wu kan pʼa gbo wɛ? 10 Lee wuu na dɛ, ŋmɔpara da ga laraga kɔn ma puga ki na bada wɛ, bani mu na Ɛti shi shɛɛn Uri wo shɔ wu leŋɛ, na pye ma shɔ, nɛ mu ya fanha.› 11 Yemu Tɛhɛnɛ Baa Kilɛ ya yu ge, yee yi wa mɛ: ‹Nɛ na ba kawaa la shan ma ɲuŋɔ ni, lee kawaa le nɔhɔ na ba yìri mayɛ pyaa wo puga ki ni. Nɛ na ba ma cèe pu lɔ mayɛ pyaa ki ɲii li na, na pu kan ma sipya wa mu, wee ma sinnɛ ni pu ni caŋa ke wo kpɛɛngɛ ki na.b 12 Ŋmɔhɔrɔ ni mu ya ma wuu li pye, ga caŋa ke wo kpɛɛngɛ ki na nʼa da ba na wuu li pye Izirayɛli shɛɛn pu bɛɛri ɲii na.› »
13 Wee tuun wu ni a Dawuda di Natan pye: «Jurumu nɛ pye, nɛ Tɛhɛnɛ Baa Kilɛ wu xakɛ lɔ.» A Natan di Dawuda pye: «Tɛhɛnɛ Baa Kilɛ ya ma jurumu wu yafa ma mu. Mʼa da xhuu nige wɛ. 14 Ga pya wemu we cee wʼa se ma mu ge, wee na ba xhu. Bani le kakuunɔ le ya pye kaɲuŋɔ na Tɛhɛnɛ Baa Kilɛ wo pɛɛn pu pye pʼa Kafɔɔ tii fanha.» 15 Lee kadugo na a Natan di gari wu kaban.
Batisheba ja wʼa xu
Ayiwa, Uri shɔ wʼa pya wemu se Dawuda mu ge, a Tɛhɛnɛ Baa Kilɛ di wu kpɔn. A pya wu do na yá.
16 A Dawuda di Kilɛ ɲɛɛri pya wu wuu na, na suun le. A wu jé wu puga, na piige ki bɛɛri pye na sinnɛ ɲiŋɛ na. 17 A wu puga ki nɔhɔlɛɛ pʼi wu kemɛ ɲɛɛri na wu yìri ɲiŋɛ ki na. Ga wu ya ta sɔɔ wɛ, na zhe wu da yaaga ka shishiin bɛ li ni pu ni wɛ. 18 Yama pu caŋa gbarashuun wogo ki na, a pya wu xhu. A Dawuda wo kapyebyii pʼi fya yi jo na wu mu, bani pu bi puyɛ pyi na: «Na pya wu yaha wu sanha fɔ wu munaa ni wɛ, wèe ya jo ni wu ni wu di ya wèe woyo yi logo funbɛɛnrɛ keŋɛ ni wɛ, wèe na já shɛ wu pye dii na pya wʼa xu wɛ? Wu na bɔɔngɔ nɔ wuyɛ na.»
19 Ga a Dawuda di li sɛɛri na ya wee wo kapyebyii pʼa ŋmunuŋmunɔ puyɛ mu, a wu li cɛ lee na na pya wʼa xu. A wu pu yege na: «Pya wʼa xu gɛ?» A pʼi wu ɲɔ shɔ na uun wʼa xu. 20 Ayiwa, a Dawuda di yìri ɲiŋɛ ki na, na lɔhɔ wuu, na sìnmɛ nudanga wo pa tìre, na fàya yatii le. Lee kadugo na a wu gari Tɛhɛnɛ Baa Kilɛ wo puga ki ni, na shɛ wu nuguro sin na wu pɛlɛ. Kadugo tàan a wu guri pa wu kaban, na ba jo na pu pa ni yalige ni. A wu diin na li. 21 A wu kapyebyii pʼi wu pye: «Le mʼa pye mɛ ge, lee wo kɔri di ɲɛ wekɛ wɛ? Na pya wu yaha ɲìi na, mu bi suun le, na Kilɛ ɲɛɛri wu mu. A pya wʼi xhu a mʼi dɛrɛ yìri na li.» 22 A wu jo: «Na pya wu yaha ɲìi na, nɛ suun le, na ganha na mɛɛ suu, bani nɛ bi li kɔɔn na funŋɔ ni jo: ‹Kilɛ na ba ɲuŋɔ ɲaari na na na pya wu cuuŋɔ la, jɔgɔ wu dʼa lee cɛ wɛ?› 23 Ga nimɛ, wʼa xu xɔ, nɛ wo suun wu kalenɛ ma bye lekɛ wɛ? Ta nɛ na ja wu kuruŋɔ di ba? Nɛ wʼa da ba shɛ wu ta wà, wee kunni wʼa da guri ba nige wɛ.»
Batisheba ya ja wa bɛ se Dawuda mu na Solomani
24 Lee kadugo na, a Dawuda di wu shɔ Batisheba luu ɲiŋɛ, na shɔn ni wu ni. Ayiwa, a wu ba ja wa bɛ se sanha Dawuda mu, a wu wu mɛgɛ le na Solomani. A Solomani kaa di daan Tɛhɛnɛ Baa Kilɛ ni. 25 A Tɛhɛnɛ Baa Kilɛ di wu tudunmɔ Natan tun wʼa shɛ yee jo Dawuda mu. A Natan di pya wu mɛgɛ le na Yedidiya (Tɛhɛnɛ Baa Kilɛ wo ɲidaan wo we) Tɛhɛnɛ Baa Kilɛ wuu na.
Dawuda ya Araba kulo li co
(1 Caŋa Ɲɛhɛɛ Jomɔ 20:1-3)
26 Ayiwa, lee bi Zhowabu ta wee ya shɛ do Amɔ shi shɛɛn pu wo kulo li na, lee lemu li ɲɛ Araba ge, a wu se ta pu fanha ki wo kayii li na, na lee co. 27 Ba lee ya pye wɛ, a wu tudunmɔɔ tun na pu shɛ Dawuda pye na: «Nɛ pa do Araba kulo li na, nɛ dʼa lɔhɔ tamaraga ki wo kayii li co bɛ. 28 Nimɛ, kashɛnŋmuu pusamaa kemɛ wá puyɛ na, mʼa ba ŋma le kulo li fɛni, mʼa li co, kɔnhɔ nɛyɛ pyaa ganha bu li co, nɛ wo mɛgɛ di da yiri li na wɛ.» 29 A Dawuda di kashɛnŋmuu pusamaa kemɛ wá puyɛ na, na gari Araba kulo li fɛni, na shɛ do li na, na li co. 30 A wu kulo li saan wu wo saanra ɲudɔnɔ li kɔ laha wu ɲuŋɔ ki ni, sanni ni li bi yàa, li wo tidugumɔ pu bi toro kiloo kɛlɛɛ taanri (30) tàan. Pɛɛwa faakagereye yi bi taga li to. A pʼi le tɔ Dawuda ɲuŋɔ ni. A Dawuda di sii yaŋmuyɔ niɲɛhɛyɛ kuu lee kulo li ni na pa. 31 Kulo li shɛɛn pu pi ge, a wu pee co na pa, na ba pu le kapyewagaa ni, ma na jo na tiye jii ni si ni, na faaya tɛni, ni kacerekpɔngɔ, ni dufaanshaan. A wu Amɔ shi shɛɛn pu wo kulogoo ki bɛɛri pye mu lee pyegana li na. Lee kadugo na a Dawuda di guri pa Zheruzalɛmu ni ni wu kashɛnŋmuu pu bɛɛri ni.