Sheba fiige ki saanzhɔ wʼa shɛ foro Solomani na
(2 Caŋa Ɲɛhɛɛ Jomɔ 9:1-12)
10
Ayiwa, a Sheba fiige ki saanzhɔ wu yi logo na Tɛhɛnɛ Baa Kilɛ ya mɛgbɔhɔ kan Solomani mu, a wu ba kɔnhɔ wu ba taleŋɛɛ kii taga wu nɔhɔ wolo wii. 2 A wu nɔ Zheruzalɛmu ni ni tahama-nɔhɔmɔɔ niɲɛhɛmɛɛ ni, na fara ɲɔhɔyɔ na, na yee tugo ni nudanga yawurire ni, ni sanni niɲɛhɛmɛ, ni pɛɛwa faakagereye ya. Ba wʼa pa nɔ Solomani na wɛ, lemu bɛɛri li ɲɛ wu funŋɔ ni ge, a wu yee bɛɛri jo Solomani mu. 3 Lemu bɛɛri wo yegeŋɛ wʼa pye Solomani mu ge, a Solomani di yee bɛɛri ɲaha paari wu mu. La yafiin ya kori saan wu ya já lemu ɲaha paari wu mu wɛ.4 Wee tuun wu ni a Sheba saanzhɔ wu Solomani wo fungɔngɔ fɛɛrɛ ti bɛɛri ɲa, puga kemu wʼa yereŋɛ ge, na kee bɛ ɲa, 5 ni wu tabali wu yaligee kee, ni wu kaaŋa ki sipyii pu wo tashɔnyɔ ye, ni wu kapyebyii pu wo kapyeŋɛɛ kee, ni pu faleye ye, ni wu yagbaya yi keree shɔɔnrivɛɛ pee, saraya nizogoyo yemu wʼa wo Tɛhɛnɛ Baa Kilɛ wo puga ki ni ge, ni yee bɛ, a lee di wu fo fo xuuni. 6 Wee tuun wu ni, a wu saan wu pye: «Yemu nɛ logo ma jomɔ pe, ni ma fungɔngɔ fɛɛrɛ ti keree na, ma na yaha na wo fiige ki ni ge, can wʼa pye wii. 7 Na nɛ yaha nɛ sanha ba di ba li ɲa na ɲii li na wɛ, nɛ bi daa yi na wɛ. Jaha nɛ ta yi taaga ki bɛ logo wɛ! Nɛ mu mɛgɛ ki logo logogana lemu na ge, ma fungɔngɔ fɛɛrɛ te, ni ma naafuu fɛɛrɛ tʼa toro lee tàan. 8 Ma sipyii, ni namaa piimu pu wa ma labye wu na tuun bɛɛri ni, na ma fungɔngɔ fɛɛrɛ jomɔ pu nuri ge, pee ɲɛ duba nagoo. 9 Baraga ki taha Tɛhɛnɛ Baa Kilɛ, ma Kilɛ wu na, wee wʼa ma shɔɔnri lɔ, na ma teŋɛ Izirayɛli wo saanra koro li na! Bani Izirayɛli kaa ya dan Tɛhɛnɛ Baa Kilɛ ni tuun bɛɛri ni, wʼa mu pye saan, kɔnhɔ ma da tiimɛ ni tifire koo ɲaari.» 10 Lee kadugo na, a wu sanni tonɔɔ taanri ni kiloo xhuu kaguro (3.500) kan saan wu mu, ni nudanga yawurire niɲɛhɛrɛ, ni pɛɛwa faakagereye. Wa shishiin ya nudanga yawurire kan nige Solomani mu temu ya ɲɛhɛ na saanzhɔ wu wuuro ti xɔ wɛ.
11 Iramu wo kɔɔgbɔyɔ yemu yi bi ma ni Ofiiri koomɔ pu wo sanni wu ni ge, yee bi ma ni Ofiiri koomɔ pu wo santali tige tiin niɲɛhɛŋɛɛ, ni pɛɛwa faakagereye ni. 12 A saan wu kee santali tige tiin ki taga benɛɛ pii yàa Tɛhɛnɛ Baa Kilɛ wo puga ki ni, ni saan wu wo puga ke. A wu santali tige tiin kii taga kɔnɔɔ ni sibeŋɛɛ kii yàa yoceelee pu mu. Santali tige tiin ya ta nige kiimu ya ɲɛhɛ na ki xɔ wɛ, santali tige tiin ya ɲa bɛ nige wɛ, fo na pa nɔ niɲaa na.
13 Ayiwa, Sheba saanzhɔ wu ɲii ya foro yaaga kemu bɛɛri fɛni ge, a saannaa Solomani di yee bɛɛri kan wu mu, na guri na yakanya ya bɛtii kan wu mu, yee yemu yi ɲɛ saannaa Solomani yɛ na da já yee kan ge. Lee kadugo na, a wu guri kari wu wo fiige ki ni, wu ni wu fanha ki sipyigbɔɔ pu ni.
Solomani wo naafuu we
(2 Caŋa Ɲɛhɛɛ Jomɔ 9:13-28)
14 Ayiwa, yee funŋɔ ni, sanni wemu wu bi ma na gaan saannaa Solomani mu ge, wee ɲɛ tonɔɔ kɛlɛɛ shuun (20), 15 lee niŋɛ ɲɛ katahaŋaa ki wo sanni wu ni wɛ, kegaaŋa pyevɛɛ pee, ni yaŋmuyɔ yi pɛrɛvɛɛ pee, ni saannaa pusamaa bɛɛri ni fiige ki gbafɛnɛɛri pu bi wemu kaan ge.
16 A saannaa Solomani di sanni ŋmasigiye nagaya xhuu shuun (200) yàa, ŋmasigiŋɛ ka bɛɛri sanni kiloo gbaara, 17 ni sanni ŋmasigiye nifɛnhɛŋɛɛ xhuu taanri (300), ŋmasigiŋɛ ka bɛɛri sanni kilo nigin ni taaga. A saan wu shɛ yi yaha Liban wo Taha ki wo puga ki ni. 18 A saan wu saanra koro nagaŋa ka yàa ni suu ganhaa ni, na sanni nidiimɛ taga ki tɔ. 19 Taduguyo gbaara katadinnɛ li bye lee saanra koro li na, na shɛ li tatiiŋɛ ki kuuri, na keye tatahaya shuun yàa koro li kabanuyo shuun wu na, na cɛnrilɛɛ shuun wo jaalaa yàa pu na yere yere keye tatahaya shuun wu tàan, 20 na cɛnrilɛɛ jaalaa kɛ ni shuun yàa katadinnɛ li wo taduguyo gbaara wu kabanuyo shuun wu na, pee bi yere yere. Le tuugo bi sanha bye ɲa saan wa shishiin wo saanra ti ni wɛ. 21 Saannaa Solomani wo yagbaya yi cɛɛgbuugoo ki bɛɛri ki bye sanni wogoo, Liban wo Taha ki wo puga ki wo yagbegeye yi bɛɛri di ɲɛ sanni nidiimɛ, warifyɛn woyo bye yi ni wɛ, bani wa jate bi nɔ warifyɛn na Solomani wo caŋa ɲii li ni wɛ. 22 Tarisisi wo kɔɔgbɔyɔ yi bye saan wu mu yemu yi bi se fo taliige ni ni Iramu wo kɔɔgbɔyɔ yi ni ge. Yee taanri bɛɛri Tarisi wo kɔɔgbɔyɔ yi ma ba ni sanni, ni warifyɛn, ni suu ganhaa, ni kotugoo, ni shazhɛɛyɛ nizaaya ni.
23 Ayiwa, a saannaa Solomani wo naafuu we, ni wu fungɔngɔ fɛɛrɛ tʼi wu pye sipyigbɔ na ye ɲiŋɛ ki saannaa pusamaa bɛɛri na. 24 Fungɔngɔ fɛɛrɛ temu Kilɛ bi le wu zɔ wu ni ge, ɲiŋɛ ke bɛɛri bi wu shaa kɔnhɔ pʼi tee logo. 25 Wa bɛɛri ba ma, wufɔɔ di ma ni wu wo yakanya ni, warifyɛn yaŋmuyɔ, ni sanni yaŋmuyɔ, ni faleye, ni kashɛn yagboyo, ni nudanga yawurire, ni shɔnyɔ, ni shɔngɔ kafaya. Mu na lee bi byi yee bɛɛri.
Solomani wo kashɛn yagboyo ye
(2 Caŋa Ɲɛhɛɛ Jomɔ 1:14-17 ; 9:25-28)
26 Ayiwa, a Solomani di kashɛn wotoriyo ni shɔnyɔ faari pinnɛ. Kashɛn wotoriyo kabɔfonɔ nigin ni xhuu shishɛɛrɛ (1.400) wu bye wu mu, ni shɔnduguloo kabɔfoŋɔɔ kɛ ni shuun (12.000). A wu ya yaha wuyɛ tàan Zheruzalɛmu ni, na yisaya yaha kari kashɛn wotoriyo yi wo tamaraya kulogoo ki ni. 27 A saan wu sii warifyɛn wu ɲɛhɛ Zheruzalɛmu ni ba kagereye ɲɛ wɛ. A wu sɛdiri tiye yi bɛ ɲɛhɛ fo xuuni ma na jo ba sikomɔri tiye yi ɲɛ futɛgɛ ki wo fiige ki ni wɛ. 28 Pu bi ma ni shɔnyɔ yi ni Solomani mu na yìri Misira fiige ke, ni Kewea wo koomɔ pu ni. Saan wu wo kegaaŋa pyevɛɛ pii pu bu se na yi shuu Kewe wo koomɔ pu ni. 29 Kashɛn wotori nigin pɛrɛmɛ, na yìri Misira fiige ki ni na ma, pee bye warifyɛn sikilee xhuu gbaara (600), shɔngɔ nigin pɛrɛmɛ, na yìri Misira fiige ki ni na ma, pee bye warifyɛn sikilee xhuu nigin ni kɛlɛɛ kaguro (150). Lee pɛrɛgana li na yi pɛrɛvɛɛ pu bi ma na yi pɛrɛɛ Xhɛti shi shɛɛn pu wo saannaa pee ni Aramub fiige ki wo saannaa pu bɛ mu.