Kilɛ na ba ɲaɲiŋɛ kan wu sipyii pu mu
40
Yi Kilɛ wʼa jo na:«Yi na sipyii pu logoo ɲiŋɛ, yi pu logoo ɲiŋɛ!
2 Yi jo ni Zheruzalɛmu ni yʼi wu luu ɲiŋɛ,
yʼi mujugbɔɔ wá wu mu yʼi wu pye
na wu ɲaa wʼa nɔ wu tɛhɛnɛ na,
na wʼa wu jurumu wu foo tɔ xɔ,
na nɛ Tɛhɛnɛ Baa Kilɛ ya wu jurumu
wu bɛɛri foo tɔ xɔ wu mu fo tɔɔɲii shuun.»
3 Mujuu lʼa fòro na:
«Yi Tɛhɛnɛ Baa Kilɛ wo koo li yàa sipoŋɔ ki ni.
Yi kogborogo ka wolo wù Kilɛ wu mu kacaaga ki ni,
yʼi ki funŋɔ ki taanna.a
4 Dudɛɛgɛb ye bɛɛri na ba ɲi daanna.
Faaboboyo ye ni yaŋaboyo yi bɛɛri na ba digi daanna.
Takokaya ye bɛɛri ɲɔ na ba daanna.
Futɛwegeye ye bɛɛri na ba ɲi daanna.
5 Lee bu bye Tɛhɛnɛ Baa Kilɛ wo nɔɔrɔ wu na ba wuyɛ shɛ.
Sipyii bɛɛri na ba wu ɲa,c bani Tɛhɛnɛ Baa Kilɛ wʼa yi jo.»
6 Mujuu la lʼa jo na: «Mujuu wá!»
A nɛ wu pye: «Di mujuu li wá di yekɛ jo wɛ?»
A wu jo di mujuu wá na:
«Sipyii pu bɛɛri pu ɲɛ ba ɲà ɲɛ wɛ.
Pu nɔɔrɔ wu bɛɛri wu ɲɛ ba sige yawyeye fyɛɛnrɛ ɲɛ wɛ.
7 Tɛhɛnɛ Baa Kilɛ bu kafɛɛgɛ fɔ yi na,
yʼa waha, yi fyɛɛnrɛ ti ma fanhaŋa.
Oo dɛ, sipyiyawyii ɲɛ ba ɲà ɲɛ wɛ.
8 Ɲà ma waha, ki fyɛɛnrɛ ti ma fanhaŋa.
Ga wèe wo Kilɛ wu wo jomɔ pu na gori yaha gbee.d»
9 Siyɔn, dugi faabobotɔɔngɔ ka na,
mu wemu wu wa jozaama pu jovɔɔ wu ge.
Zheruzalɛmu, ma mujuu li wá ni fanha ni,
mu wemu wu wa jozaama pu jovɔɔ wu ge.
Ma mujuu li wá, ma ganha bu fya wɛ,
yi jo Zhuda kulogoo ki mu na: «Yi Kilɛ wu we!»
10 Kafɔɔ, Tɛhɛnɛ Baa Kilɛ wʼa ma ni sefɛɛrɛ ni.
Ɲuŋɔfɛɛrɛ ti wa wu keŋɛ ni.
Wʼa ma ni wu saraa wu ni wu keŋɛ ni.
Wʼa ma ni wu labye wu kuduun wu ni wuyɛ ɲaha na.ef
11 Wu na ba wu dubyaa pu naha
ba yatɔɔnahama ɲɛ wɛ.
Wu na ba keŋɛ taga dubyapiire ti pinnɛ,
na ti lɔ taha wu dodoŋɔ na.
Wu na ba sɛɛgɛ taan dubyaseye yi na,
na se ni yi ni kasɛɛgɛ na.g
Tɛhɛnɛ Baa Kilɛ ɲɔhɔ ɲɛ wɛ
12 Jɔgɔ wʼa suumɔ lɔhɔ ki taanna
wu kadawii ni wɛ?
Jɔgɔ wʼa fugba wu taanna
ni wu sibiri wu ni wɛ?
Jɔgɔ wʼa ɲiŋɛ ki puuro ti taanna
ni yataanga ni wɛ?
Jɔgɔ wʼa faaboboyo ye ni yaŋaboyo yi wo tidugumɔ pu taanna
ni tidugumɔ yataanga ni wɛ?
13 Jɔgɔ wu da já Tɛhɛnɛ Baa Kilɛ wo Munaa li suguri wɛ?
Jɔgɔ wu dʼa pye yɛrivɔɔ, na wu kalaa wɛ? h
14 Jɔgɔ wʼa wu yɛri, a wu xakili ta wɛ?
Jɔgɔ wʼa wu kalaa tiimɛ koo ni wɛ?
Jɔgɔ wʼa wu kan lajɛ,
na fungɔngɔ fɛɛrɛ koo shɛ wu na wɛ?
15 Wii, shi wu bɛɛri wu ɲɛ wu mu
ba lɔhɔ fuduunɔ nigin ma do mɛ
lokoyaaga funŋɔ ni wɛ.
Wu ɲɛ ba gbazhɛnhɛ pile tidugumɔ ɲɛ mɛ
tidugumɔ yataanga na wɛ.
Suumɔ lɔhɔ niŋɛ tapkiiye yi tidugumɔ pu ɲɛ wu mu
ba kafunnɔrɔ ɲɛ wɛ.
16 Liban taha ki tiire ti bɛɛri da ga yaa
ni wu saraga nizogoyo yi wo kajiiye yi ni wɛ.
Liban taha ki sige xaara ti bɛɛri bɛ di wa da ga
wu saraya nizogoyo yi xɔ wɛ.
17 Shi wu bɛɛri ɲɛ yafiin bɛ wu ɲaha tàan wɛ.
Pu ɲɛ yaaga bɛ wɛ, kaɲuu ɲɛ pu na wu mu wɛ.
18 Jɔgɔ ni yʼi wa giin di Kilɛ taanna wɛ?
Jaa wekɛ tuugo ni yee di wa da ba wu taanna wɛ?
19 Ni yapɛrɛ ni gɛ? Kacɛbye wu ma lee yàa,
sanni yaavɔɔ na sanni taga li wɔɔgɔ, na warifyɛn ɲɔhɔrɔ tara li na.i
20 Sipya wemu bu bye se ɲɛ wu ni wu lee shi pye wɛ,
weefɔɔ na tige sha kemu ki ɲɛ ki ya wɛrɛ xu-i ge.
Wʼa kacɛbye wa sha, wemu wʼa jani xuuni ge,
wee na ba yapɛrɛ la yàa wu mu, lemu na já zin, lʼi yere ɲɔ ge.
21 Yee ya ta li cɛ-ɛ ya? Yee ya ta li logo-e ya?
Pu ya ta yi jo yee mu fo taashiinɛ li ni-i ya?
Yee ya ta koŋɔ ki nɔhɔ shangana li ɲaha cɛ-ɛ ya?
22 Wee wʼa tiin saanra ti na, ɲiŋɛ ki kogogo ki fugba wu ni.
Sipyii pu ɲɛ wu ɲaha tàan ba kabeeye ɲɛ wɛ.
Wʼa fugba wu pii ba fàŋa ɲɛ wɛ,
wʼa wu sin ba fàya puga ɲɛ wɛ, na pye wu tatɛɛngɛ wà.
23 Wu ma fanhafɛɛ pu ɲɛri na pye kaɲuu baa,
na ɲiŋɛ ki kiirikɔɔn pu cɛrɛŋɛ na pye wetɔnɔ baa sipyii.
24 Pʼa nɔri yɛ, pʼa nugi yɛ, pʼa nire ɲɔ kɔn na yeege yɛ,
a Kilɛ di pu fɔ ni kafɛɛgɛ ni, a pʼi waha.
A kafɛɛgbɔhɔ di ba pu lɔ ba ɲawaya ɲɛ wɛ.
25 Fɛfɛɛrɛ wo wʼa jo na:
«Jɔgɔ ni yee di wa da ba nɛ taanna wɛ?
Nɛ ni jɔgɔ wu ɲɛ nigin wɛ?»
26 Yi ɲuyɔ yi yirige yʼi fugba wu wii.
Jɔgɔ wʼa wɔrɔɔ ki yàa wɛ?
Wee wʼa ki bɛɛri pyi ki na fani na fòro ba kashɛn keŋɛ ɲɛ wɛ.
Wʼa ki bɛɛri yiri ki mɛyɛ na.
Wu sefɛɛrɛ nigbɔɔrɔ te ni wu fanhagbɔhɔ ki funŋɔ ni
nigin bɛ ya fɔni ki ni wɛ.
Kilɛ na ba fanha nivɔŋɔ le wu sipyii pu ni
27 Yakuba, ɲaha na mu di tigire tɛri Kilɛ na wɛ?
Izirayɛli ɲaha na mu di yu wɛ na:
«Nɛ wo ɲuŋɔ keree kʼa ŋmɔhɔ Kafɔɔ na.
Koo lemu ni nɛ yaa na kaɲii ta ge, wu ya lee cɛ wɛ?»
28 Mu ya li cɛ-ɛ ya? Mu ya li logo-e ya?
Tuun bɛɛri wo Kilɛ wu ɲɛ Tɛhɛnɛ Baa Kilɛ.
Wee wʼa ɲiŋɛ ki tɛyɛ yi bɛɛri yàa.
La ya fòro wu baraga ki ni wɛ,
wu di ya ganri bɛ wɛ.
Sipya da ga já wu fungɔngɔ fɛɛrɛ ti tɛhɛnɛ sha di li cɛ wɛ.
29 Wemu wʼa kanha ge, wʼa fanha kaan weefɔɔ mu,
na baraga leni baraga baa fɔɔ ni.
30 Lɛvɛɛ pu ma ganha, pu fanha na xhɔ.
Ali mɔhɔbahalaa bɛ wa guruŋɔ na dun.
31 Ga piimu pʼa Tɛhɛnɛ Baa Kilɛ pye pu tadaŋa ge,
pee wa fanha nivoŋɔ taa.
Pee ma yìri kapaya na ba ɲaa ɲɛ wɛ.
Pu ma fe kanha baa, na ɲaari pu baraga da ga xhɔ wɛ.