Tɛhɛnɛ Baa Kilɛ wu ɲɛ Se fɔɔ we.
41
Ayiwa, a Tɛhɛnɛ Baa Kilɛ di jo:«Yee suumɔ lɔhɔ niŋɛ takpiiye shɛɛn,
yi fɛhɛ, yʼi logo na ɲɔ na.
Shi wu bɛɛri wu fanha nivoŋɔ le wuyɛ ni, wu fulo, wu jo.
Wù shɛ kiiri wu kɔn shiizhan.
2 Jɔgɔ wʼa se tavɔɔ wu pye wʼa yìri Kilɛ-nɔhɔ ki na na pa,
na wu pyi wu na se taa xuu wu bɛɛri ni wɛ?
Jɔgɔ wʼa shi wu bɛɛri le wu keŋɛ ni,
na saannaa pu kuu wu kan wɛ?
Wu ŋmɔpara li na ba pu ɲɛrɛgi ɲiŋɛ ki na ba pomyɛ ɲɛ wɛ.
Wu sindaa ki na ba pu caaŋa ba kafɛɛgɛ ya ɲawaya luu wɛ.a
3 Wu sanha dee shɛ ɲa koo lemu ni wɛ,
wu ma pu nɔhɔ niinɛ lee ni,
na se ta, na doro yaaga da wu ta wɛb.
4 Jɔgɔ wʼa kii keree kii pye, na ki ɲɔ fa wɛ?
Wemu wʼa lɛgɛɛ ki bɛɛri yiri fo taashiinɛ li ni ge, wee wi.
Nɛ Tɛhɛnɛ Baa Kilɛ, nɛ wu ɲɛ nizhiimɛ we.
Nɛ wu ɲɛ taxɔgɔ ki bɛ.
5 Suumɔ lɔhɔ niŋɛ takpiiye shɛɛn pʼa lee ɲa na fya.
Koŋɔ ki tɛhɛnɛ li shɛɛn pʼa jɛlɛ. A pʼi fulo.
6 Pʼa puyɛ tɛri, na yu ni puyɛ ni na:
«La le mayɛ ni!»
7 Tɛŋɛ pyevɔɔ wu ma lowaa le tɔɔɲɛɛrɛ ti yaavɔɔ wu ni.
Tɔɔrɔ ti wɔɔgɔvɔɔ wu ma lowaa le firige ki kpɔnvɔɔ wu ni.
Wu ma jo na: «Ki sogigana lʼa ɲɔ.»
Wʼa pontii taga lee yapɛrɛ li co, kɔnhɔ li ganha ba ɲɛri wɛ.
Tɛhɛnɛ Baa Kilɛ na ba wu sipyii pu tɛgɛ
8 Ayiwa, mu Izirayɛli wi ge, nɛ wo kapyebye we,
mu Yakuba wemu nɛ shɔɔnri lɔ ge,
nɛ naɲii Ibirayima wo tirige shɛn we,c
9 mu wemu nɛ co fo koŋɔ ki tɛhɛnɛ li na ge,
mu wemu nɛ yiri na yìri taliige ni ge,
mu wemu nɛ pye jo: «Nɛ wo kapyebye mu ɲɛ,
nɛ ma shɔɔnri lɔ, di ya ta ma wá-ɛ dɛ!»
10 Ma ganha bu fya wɛ, bani nɛ wa ni ma ni.
Ma ganha bu ma jaa wu yirige wɛ,
bani nɛ ɲɛ ma Kilɛ we.
Nɛ na baraga le ma ni, na ma tɛgɛ.
Nɛ na ba ma tɛgɛ ni na kanige keŋɛ tiimɛ wogo ki ni.
11 Li wii, piimu bɛɛri pʼa logoo yirige ma tàan ge,
pee na ba zhiige fo na pu ɲuyɔ sogi.
Piimu pʼa yiri ma fɛni ge, pee na ba gyɛɛgi na pu xɔ.
12 Piimu pʼa yogo kɔɔn ma na ge,
ma na ba pee sha na ganha, ma da pu ɲa wɛ.
Piimu pʼa kashɛn kɔɔn ma na ge,
pee na ba gyɛɛgi na pu xɔ.
13 Bani Tɛhɛnɛ Baa Kilɛ nɛ ɲɛ, ma Kilɛ we.
Ma kanige keŋɛ ki na nɛ ma co.
Nɛ mu pye jo: ‹Ma ganha bu fya wɛ, nɛ wʼa da ma tɛgɛ.›»
14 Yakuba, mu wemu wu ɲɛ fyɛngɛ ge,
Izirayɛli, mu wemu wu ɲɛ baraga baa ge,
Ma ganha bu fya wɛ.
Nɛ wʼa ma ba ma tɛgɛ, Tɛhɛnɛ Baa Kilɛ wʼa jo mu.
Wemu wʼa da ma ɲuŋɔ wolo ge,
wee ɲɛ Izirayɛli wo Fɛfɛɛrɛ wo we.
15 Li wii, nɛ na ba ma pye shinmasaŋa,
ki nivoŋɔ, kemu ganhaa ya firigi ge.
Ma na ba faaboboyo yi ja ja, na yi tɔnhɔnɔ tɔnhɔnɔ.
Ma na ba yaŋaboyo yi pye ba ɲawaya ɲɛ wɛ.
16 Ma na ba yi foolo, kafɛɛgɛ na gari ni yi ni,
kafɛɛgbɔɔ na yi caaga.
Mu wi ge, ma fundanga ki kaɲuŋɔ na ba bye Tɛhɛnɛ Baa Kilɛ.
Ma na ba Izirayɛli wo Fɛfɛɛrɛ wo wu sɔni.
Kilɛ na ba siwaga ki ɲɛri na pye lɔhɔ sige
17 Ɲaafɛɛ ni funmɔ fɛɛ wa lɔhɔ shaa, ga lɔhɔ di ɲɛ wɛ.
Pu geŋmaya yʼa waha waga keŋɛ ni.
Nɛ Tɛhɛnɛ Baa Kilɛ, nɛ na ba pu ɲɔ shɔ.
Nɛ Izirayɛli wo Kilɛ we, nɛ da ga pu yaha wɛ.
18 Nɛ na ba gba lɔhɔyɔ pye yʼa cɛnri foro faaɲuŋmaya yi ni,
na lobulowegee pye kʼa cɛnri foro dudɛɛyɛ yi ni.
Nɛ na ba siwaga ki ɲɛri na pye dugo kemu ya ɲi ge,
na waga ɲiŋɛ ki pye lobulowegee na jɛnrɛni na foro ki na.
19 Nɛ na ba tigbɔyɔ pye yʼa fin siwaga ki ni,
ma na jo sɛdiri tiye, ni kasha tiye,
ni miriti tiye, ni oliviye tiye.
Nɛ na ba sipɛrɛ tiye ni ɔrimu tiye,
ni buwi tiye pye yʼa fin kacaaga ki ni.
20 Kɔnhɔ sipyii di li ɲa, pʼi li cɛ,
pʼi li sɛɛri, pʼi li ɲaha cɛ na
Tɛhɛnɛ Baa Kilɛ wo keŋɛ kʼa li pye,
na Izirayɛli wo Fɛfɛɛrɛ wo wu wʼa lee da.
Kaɲɔɔ ɲɛ yasunyɔ yi na wɛ
21 Tɛhɛnɛ Baa Kilɛ ya yasunyɔ yi pye na:
«Yi yi wo fiin wu jo.
Pemu pu wa yi mu na baari ge, yi pu paari.»
Yakuba wo saan wu wʼa jo mu.
22 Keree kiimu na ba bye ge,
yi pa kee shɛ wù na, yʼi ki ɲaha paari wù mu.
Yee ya keree kiimu ɲa taatuunnɔ ni ge,
yi kee ɲaha jo wù mu.
Kɔnhɔ wù wù funyɔ kɔn ki na, ki bu da kʼa fa foro.
Kelee yi ɲibaŋa keree jo wù mu.
23 Keree kiimu ki da ba bye ge, yi kee jo wù mu,
wù na li cɛ lee na na kilɛlɛɛ yi ɲɛ.
Yi kasaana la yɛ pye, kelee kakuunɔ la yɛ,
kɔnhɔ wù lee ɲa, lee di bye wù mu kakanhana.
24 Ga yee ɲɛ yafiin bɛ wɛ,
Yee kapyegee ki bɛ ɲɛ ɲuŋɔ baa wogoo.
Wa bu yee shɔɔnri lɔ, tanhaŋa kaa wufɔɔ ya pye.
25 Nɛ sipya wa yirige, na yìri suumɔ kulo kacɛ ki na.
Wʼa pa.
Na wu yaha fo Kilɛ-nɔhɔ ki na,
wʼa nɛ mɛgɛ ki yiri.d
Wʼa fanhafɛɛ pu forogi wu tɔɔyɔ yi ni,
ba pʼa puuro tɔnri wɛ,
ba cogo fɔɔ ya wu cogo tɔnri ni tɔɔyɔ ni wɛ.
26 Jɔgɔ wʼa kii keree kii jo fo taashiinɛ li ni,
kɔnhɔ wèe di ki cɛ wɛ?
Jɔgɔ wʼa fɛnhɛ ki bye jo na ta ki sanha bye-e,
kɔnhɔ wù jo na can wʼa jo wɛ?
Sipya wa shishiin ya yi jo wɛ.
Yee wa shishiin ya yi jo ɲa sipya bɛ mu wɛ.
Sipya wa shishiin ya yi logo ɲa yee ɲɔ na wɛ.
27 Fo nɛ, nɛ wʼa pye shishiimɛ na Siyɔn pye jo:
Pu piiri, pu piiri.
Nɛ Jozaama jovɔɔ tun Zheruzalɛmu ni.
28 Nɛ wii, nɛ ta sipya ɲa wɛ.
Yɛrɛ kanvɔɔ wa shishiin ya ta ye yasunyɔ ye ni,
nɛ na já yegeŋɛ kan kemu mu kʼi na ɲɔ shɔ wɛ.
29 Yi bɛɛri yi ɲɛ kaɲuu baa.
Yi kapyegee ki ɲɛ yafiin bɛ wɛ.
Yi jaalaa pu ɲɛ kafɛɛwaga yɛ.