Tɛhɛnɛ Baa Kilɛ wo kapyebye nizaama we
42
Tɛhɛnɛ Baa Kilɛ ya jo:«Nɛ kapyebye wu we, nɛ wemu tɛri ge.
Nɛ wʼa wu shɔɔnri lɔ, wu kaa lʼa dan na ni.
Nɛ na munaa li tirige wu na.
Wu na ba tiimɛ koo li shɛɛ shi wu bɛɛri na.
2 Wʼa da ba mujuu waa wɛ.
Wʼa da ba wu mujuu ɲuŋɔ yirige wɛ.
Wu mujuu wa da ba fòro kpɛɛngɛ na wɛ.
3 Waha gaan lemu lʼa kuri ge,
wʼa da ba leesana kɛgi wɛ.
Sokinna wemu kpɛɛngɛ kʼa diri ge,
wʼa da ba weesama fugi wɛ.
Wu na ba tiimɛ koo li shɛɛ na saha ni can wu ni.
4 Wu fanha wʼa da ga xhɔ wɛ, wu yatɛnyɛ da ga xhu wɛ,
fo wu ba shɛ tiimɛ pu teŋɛ ɲiŋɛ ki bɛɛri na.
Suumɔ lɔhɔ niŋɛ takpiiye yi na ba wu saliya wu pye pu tadaŋaa.»
5 Tɛhɛnɛ Baa Kilɛ,
Kilɛ wemu wʼa fugba wu yàa, na wu pii ge,
yara yara lʼa fin ɲiŋɛ ki na ge,
na ki pii ni lee bɛɛri ni ge,
na ŋmɔgara le ɲiŋɛ ki sipyii pu ni,
na munaa le ɲiŋɛ ki ɲaarivɛɛ pu ni ge,b wee ya jo:
6 «Nɛ Tɛhɛnɛ Baa Kilɛ wʼa mu yiri tiimɛ kaa na.
Nɛ na ba ma co keŋɛ na, na kasɛɛgɛ yaha ma na.
Nɛ na ba ma pye kariɲɛɛgɛ ɲɔmɛɛ sipyiire ti mu,
mʼa bye shi wu bɛɛri wo kpɛɛngɛ.c
7 Kɔnhɔ fyɛnmɛɛ di da ɲaa,
kasolemɛɛ pʼi foro kaso wu ni,
piimu pu wa nibiige ni ge,
pee di foro nibiige ki nid.
8 Nɛ wu ɲɛ Tɛhɛnɛ Baa Kilɛ we,
nɛ mɛgɛ ki ɲɛ kere.
Nɛ da ga na wo nɔɔrɔ wu kan watii mu wɛ.
Pɛɛŋɛ ke kʼa yaa ni nɛ ni ge,
nɛ da ga ki kan pɛɛŋɛ yaaya yatii mu wɛ.
9 Keree kiimu kaa lʼa jo taashiinɛ li ni ge,
kee ya pye xɔ.
Kafoŋɔɔ nʼa da ba jo yi mu,
nʼa da ki jo yi mu yani ki pa bye ge.»
Kilɛ masɔŋɔ yogo
10 Yee piimu pʼa ɲaagaa pyi suumɔ lɔhɔ ki na ge,
ni suumɔ lɔhɔ ki yaŋmuyɔ yi bɛɛri,
na fara lɔhɔ niŋɛ takpiiye ye, ni yi sipyii pu na.
Yi yogo nivoŋɔ cɛɛ Tɛhɛnɛ Baa Kilɛ mu!
Yʼa wu masɔŋɔ yogo cee,
na co fo ɲiŋɛ ki tɛhɛnɛ li na.
11 Siwaga ke ni ki sipyii pee,
ni Kedari ya tiin kulogoo kiimu ni ge,
pee pu pu mujoŋɔɔ yirige!
Sipyii piimu pu ɲɛ Sela faaya yi ni ge,
pee pʼa fundanga mujoŋɔɔ waa,
pu da sɛlɛ fundanga keŋɛ ni faaboboyo yi ɲidegee ki ni!
12 Pu pɛɛŋɛ taha Tɛhɛnɛ Baa Kilɛ na,
pu da wu sɔni lɔhɔ niŋɛ takpiiye yi na!
13 Tɛhɛnɛ Baa Kilɛ na ba foro ba kashɛn naŋmere ɲɛ wɛ.
Wu faa wʼa pe kashɛn ki fɛni ba kashɛnŋmɔ ɲɛ wɛ.
Wu na ba kashɛn mɛxuguŋɔɔ yu,
wu na ba li shɛ wu pɛɛn pu na na naŋmere wee ɲɛ.
Tɛhɛnɛ Baa Kilɛ na ba wu labye wu ɲɔ fa
14 A Tɛhɛnɛ Baa Kilɛ di jo:
«Nɛ sii mɔ nɛ da jo wɛ, na cari nayɛ na,
nɛ ya nayɛ ɲɛhɛ kaa la shishiin bye kaa na wɛ.
Ga nimɛ nʼa da ba xhuulo ba layama ɲɛ wɛ.
Nɛ na ba ŋmɔgaŋa yeege, na ŋmɔni na duri.
15 Nɛ na ba faaboboyo ye ni yaŋaboyo yi kyɛɛgi,
na yi tiire te ni ɲa ki bɛɛri waha.
Nɛ na ba gbalaa pu ɲɛri ɲiwaga, na duyo yi waha.
16 Nɛ na ba fyɛnmɛɛ pu ɲaha co koo la ni
pu sanha shɛ ɲa lemu ni-i ge.
Nɛ na ba pu pye pʼa toro kuuro la ni,
lemu li ɲɛ pu tacɛŋɛ bɛ ɲɛ li na-ɛ ge.
Nɛ na ba nibiige ki ɲɛri na pye kpɛɛngɛ pu mu,
na koo li takokaya yi bɛɛri ɲɔ taanna.
Kaa lemu nʼa da ba bye ge, lee li wa le.
Lee nʼa da ba bye, viin wa li ni wɛ.
17 Piimu pʼa yapɛrɛɛ pye pu tadaŋa,
na pɛɛŋɛ yaŋmuyɔ yi wo jaalaa pu pyi ge na:
‹Yee pu ɲɛ wèe wo kilɛlɛɛ pee,›
pee shiige wuu na ba guri kadugo.»
Izirayɛli nagoo pu ɲɛ ba fyɛnmɛɛ ni ɲudunnɔɔ ɲɛ wɛ
18 Tɛhɛnɛ Baa Kilɛ ya jo na:
«Yee ɲudunnɔɔ, yee pʼa nuri!
Yee fyɛnmɛɛ, yi wii, yʼi da ɲaa!
19 Jɔgɔ wu ɲɛ fyɛn nɛ wo kapyebye wu kadugo na wɛ?
Jɔgɔ wu ɲɛ ɲudunnɔ ba nɛ wo tudunmɔ wu ɲɛ wɛ,
nɛ wemu tun ge?
Nɛ wemu shɔɔnri lɔ na wo labye wu kaa na ge,
jɔgɔ wu ɲɛ fyɛn ba wee ɲɛ-ɛ wɛ?
Jɔgɔ wu ɲɛ fyɛn ba Tɛhɛnɛ Baa Kilɛ wo kapyebye wu ɲɛ-ɛ wɛ?
20 Mʼa yaŋmuyɔ niɲɛhɛyɛ ɲa,
ga mu ya ta kasɛɛgɛ yaha yi na wɛ.
Ma ɲuwegee ya taan, ga ma ya yaaga logo wɛ.»
21 Tɛhɛnɛ Baa Kilɛ wo tiimɛ pu wuu na,
lʼa taan wu ni wu pɛɛŋɛ ni nɔɔrɔ taha wu wo saliya wu na.
22 Ga pʼa we shi we yaŋmuyɔ kuu,
na wu keŋɛ yaŋmuyɔ yi shɔ wu na.
Pʼa pu bɛɛri tɔ wegeye ni,
pʼa pu ŋmɔhɔ kasogbaya ni. Pʼa pu kuu.
Sipya ya ta wemu na pu shɔ wɛ.
Pʼa pu yaŋmuyɔ shɔ pu na.
Sipya ya ta wemu ya jo pu yi tɛrɛŋɛ wɛ.
23 Jɔgɔ wu da ba ɲuwegee shan yee ni wɛ?
Jɔgɔ wu da ba kasɛɛgɛ shan wu logo cabaya yi na wɛ?
24 Izirayɛli, Yakuba wo shi we,
jɔgɔ wu da wu le wu yaŋmuyɔ yi lɔvɛɛ pee,
ni wu kuuvɛɛ pu keŋɛ ni wɛ?
Wèe ya jurumu pye Tɛhɛnɛ Baa Kilɛ wemu na ge,
ta wee bɛ wɛ?
Wèe ya she wu korogoo ki ɲaari wu ni,
na wu saliya wu logo she.
25 Lee wuu na wʼa wu loyire nigbɔɔ li shan Izirayɛli ɲuŋɔ ni,
na kashɛn niguuŋɔ yirige wu fɛni.
Lee loyire lʼa pye ba na ɲɛ wɛ, na Izirayɛli maha círi.
Ga Izirayɛli ya ta li ɲaha cɛ wɛ.
Na kʼa wu sòrogo,
ga Izirayɛli ya ta kasɛɛgɛ yaha ki na wɛ.