Kilɛ wu ɲɛ Izirayɛli maravɔɔ ni wu shɔvɔɔ
43
Ayiwa nimɛ Yakuba,Tɛhɛnɛ Baa Kilɛ wemu wʼa ma yàa ge,
wee wemu wʼa mu Izirayɛli faanri ge,
yemu wʼa jo ge, yee yi wa mɛ:
«Ma ganha bu fya wɛ, bani nɛ ma ɲuŋɔ wolo.
Nɛ mu yiri ma mɛgɛ ki na, nɛ wo mu ɲɛ.
2 Ma ɲɛhɛ ba lɔhɔyɔ bɛ kɔɔn, nɛ na bye ni ma ni.
Ma ɲɛhɛ ba gba lɔhɔyɔ bɛ kɔɔn, yʼa da ma li wɛ.
Ma ɲɛhɛ ɲaari na bɛ ni, kʼa da ma fori wɛ.
3 Bani Tɛhɛnɛ Baa Kilɛ nɛ ɲɛ, mu wo Kilɛ we,
Izirayɛli wo Fɛfɛɛrɛ wo we, mu wo shɔvɔɔ we.
Nɛ Misira fiige ki kan, na pye mu wo ɲuwuuro ti saara.
Ecopi fiige ke ni Seba mara wu nɛ kan mu faara.
4 Ma kaa lʼa waha na mu.
Mʼa yaa ni baraga ni, bani ma dan na ni.
Lee wuu na nɛ na ba Adama nagoo kan ma faara,
na fiiye yi kan na pye ma munaa li wo ɲuwuuro ti pɛrɛmɛ.
5 Ma ganha bu fya wɛ, bani nɛ wa ni ma ni.
Nɛ na ba ma tirige shɛɛn pu tɛrɛŋɛ na pa na yìri Kilɛ-nɔhɔ ki na.
Nɛ na ba ma kemɛ binnɛ na yìri caŋatomɔ pu ni.
6 Nɛ na ba suumɔ kulo kacɛ ki pye: ‹Pu kan!›
Na woroo kulo kacɛ ki pye: ‹Ma ganha bu suri pu ni wɛ!›
Na jalaa pu yaha pa na yìri fiitɔɔngɔ ki ni,
mʼa na pushaa pu yaha pa na yìri ɲiŋɛ ki tɛhɛnɛ li na.
7 Nɛ wo mɛgɛ ki wʼa yiri pu bɛɛri na,
nɛ wa pu da, na pu yàa, na pu faanri,
na wo nɔɔrɔ wu wuu na.»
Izirayɛli wu ɲɛ Tɛhɛnɛ Baa Kilɛ wo sɛɛri we
8 Pii sipyii piimu pu wa ni ɲìi ni na ta pʼi ya ɲaa-i ge,
na ɲɛ ɲudunnɔɔ na ta ɲuwegee di ɲɛ pu mu ge,
yi pa ni pu ni.
9 Shi wu bɛɛri ya wuyɛ pinnɛ,
sipyiire ti bɛɛri ya tiyɛ ɲuŋɔ círi.
Wekɛ wʼa fɛnhɛ kii keree ki ɲa jo pu ni, na ta ki sanha bye-e wɛ?
Keree kiimu kʼa toro ge, jɔgɔ wu dʼa fɛnhɛ ki ɲa jo wɛ?
Peefɛɛ pu pa ni pu sɛɛrɛɛ ni, pʼi ba li nakaara xɔ.
Pʼi ba li shɛ na: «Can wu ɲɛ wii.»
10 Tɛhɛnɛ Baa Kilɛ ya jo na: «Yee pu wa nɛ wo sɛɛrɛɛ,
yee pu wa nɛ wo kapyebyii piimu nɛ shɔɔnri lɔ ge,
kɔnhɔ yʼi na cɛ, yʼi dà na na, wemu nɛ ɲɛ ge, yʼi lee bɛ cɛ.
Kilɛ wa shishiin ya pye wà nɛ ɲaha na wɛ,
Kilɛ watii bɛ di wa nige nɛ kadugo na wɛ.
11 Nɛ, nɛ wu ɲɛ Tɛhɛnɛ Baa Kilɛ we.
Ni nɛ bɛ wɛ, shɔvɔɔ wa nige wɛ.
12 Nɛ wʼa ɲuwuuro ti jomɔ jo,
nɛ wʼa sipyii pu ɲuŋɔ wo, nɛ wʼa kee keree ki pye kʼa logo.
Pɛɛŋɛ yaŋmuyɔ ye yi wa yee shɔhɔɔ ni ge, kee ka bɛ wɛ.
Yee pu wa nɛ wo sɛɛrɛɛ.
Nɛ wu ɲɛ Kilɛ we. Tɛhɛnɛ Baa Kilɛ wʼa jo mu.
13 Wee nɛ ɲɛ fo gbee.
Sipya wa shishiin wa da já wa shɔ nɛ na wɛ.
Nɛ bu lemu pye, jɔgɔ wu da já lee ɲɛri wɛ?
Tɛhɛnɛ Baa Kilɛ ya kuri wu wo koo li gbegele wu sipyii pu mu
14 Ayiwa, Tɛhɛnɛ Baa Kilɛ,
Izirayɛli wo Fɛfɛɛrɛ wo we, yi ɲuŋɔ wolovɔɔ we,
yemu wʼa jo ge, yee yi wa mɛ:
«Yee wuu na nʼa da ba wa yaha zhɛ Babilɔni fɛni,
wu shɛ kulo li gburaya yi shɔhɔshɔhɔyɔ yi bɛɛri kyɛɛgi.a
«Pu fundanga mɛxuguŋɔɔ ki ma ɲɛri pye tataara.
15 Nɛ ɲɛ Tɛhɛnɛ Baa Kilɛ, yee wo Fɛfɛɛrɛ wo we,
Izirayɛli wo yaavɔɔ we, yi saan we.
16 Tɛhɛnɛ Baa Kilɛ wemu wʼa koo wolo suumɔ lɔhɔ ki niŋɛ ni,
na tatorogo wolo logbɔhɔyɔ yi niŋɛ ni ge,
17 wee wemu wʼa bi kashɛn wotoriyo ni shɔnyɔ,
ni kashɛnŋmuu baraga wuu pye pʼa pinnɛ foro ge,
pee ya pinnɛ to, pu wa da yìri nige wɛ.
Pʼa sogi ba sokinna jugi ɲɛ wɛ, na fugi.
18 Yemu wee Tɛhɛnɛ Baa Kilɛ wʼa jo ge, yee yi wa mɛ:
«Yi ganha bu taashiinɛ li wo keree ki yaha yiyɛ funyɔ ni wɛ.
Yi ganha ba yi funyɔ shaa ni taatoronɔ li wo keree ki ni wɛ.
19 Li wii, kafonɔ nʼa da bye. Lee wa ɲuŋɔ yeege xɔ.
Yee wa li cɛ-ɛ ya?
Koo nʼa da wolo siwaga ki ni,
na gbalaa wolo kacaaga ki ni.
20 Naŋayaaya yi na ba nɛ pɛlɛ,
sige puun pu fara kɔnɔsogoyo yi na,
bani nɛ lɔhɔ yeege siwaga ki ni,
na gbalaa pye pu na fuu kacaaga ki ni,
kɔnhɔ na sipyii pʼi gba, pee piimu nɛ shɔɔnri lɔ ge.
21 Na yɛ mu nɛ pu faanri,
pu na ba na mɛsɔyɔ yi yiri.»
Tɛhɛnɛ Baa Kilɛ ya wu sipyii pu jaagi
22 Tɛhɛnɛ Baa Kilɛ ya jo:
«Ga nɛ wo mɛgɛ ki bɛ mu wa bi yiri wɛ dɛ Yakuba,
bani mu Izirayɛli ya kanha nɛ tàan.
23 Nɛ mu bɛ mu ya ma dubyaa pu wolo na pye saraga nizogoyo wɛ.
Mu ya ta nɛ pɛlɛ ni ma saraya yi ni wɛ.
Nɛ ta ma yakanya wo katahaŋaa taha yi na wɛ,
di wa nudanga yawurire keree taga ma kanha wɛ.
24 Mu ya ta nudanga wahagaan pɛɛwa wuu shɔ kan nɛ mu wɛ,
mu di ya ta saraya sìnmɛ taga na tin wɛ.
Ga mu ya ma jurumu wu taga nɛ tugo.
Mu ya ma tiibaara ti taga nɛ kanha.
25 «Ga nɛ, nɛyɛ pyaa kʼa da ma saliya kɛgɛrɛ ti yafa
nayɛ pyaa ki wuu na.
Nɛ da ga ba na funyɔ yaha nidogo nige
ni mu wo jurumu wu ni wɛ.
26 Na funŋɔ to nidorogoo ki na, wù kayuu li pinnɛ jo.
Lemu li wa ma wo kaɲii li tataga ge, mʼa lee jo.
27 Ma tolɛ nizhiimɛ we, wee ya jurumu pye,
a ma jomɔ pu torogovɛɛ pʼi ɲuŋɔ nari na na.
28 Lee wuu na nɛ Kilɛ-pɛɛŋɛ puga ki ɲahagbaa fɛɛ pu fanha,
na Yakuba le kakabyii keŋɛ ni,
na Izirayɛli le lawuuvɛɛ keŋɛ ni.»