Tɛhɛnɛ Baa Kilɛ na ba baraga le Izirayɛli nagoo pu ni
44
«Ga nimɛ, Yakuba, na kapyebye we,Izirayɛli, mu wemu nɛ shɔɔnri lɔ ge, ye logo.
2 Tɛhɛnɛ Baa Kilɛ wemu wʼa mu yàa,
na mu faanri ma nu wu funŋɔ ni, na ɲɛ ma tɛgɛvɔɔ ge,
yemu wee ya jo ge, yee yi wa mɛ:
‹Na kapyebye Yakuba, mu Yeshuruna wemu nɛ shɔɔnri lɔ ge,
ma ganha bu fya wɛ.›
3 Bani nɛ na ba lɔhɔyɔ turi waga ɲiŋɛ ki na.
Di dugorogoo wolo ɲiwaga ki na.
Nɛ na ba na Munaa li turi ma tirige shɛɛn pu na,
di na duba wu tirige ma kadugo shɛɛn pu na.
4 Pu na ba lɛgi ba fa ɲà ɲɛ wɛ,
ba dugo ɲɔ tiire ɲɛ wɛ.
5 «Wa na ba jo: ‹Tɛhɛnɛ Baa Kilɛ wo nɛ ɲɛ.›
Wa bɛ na ba jo na Yakuba wo tirige shɛn wee ɲɛ.
Wabɛtii na ba yi ka wu keŋɛ na na: ‹Tɛhɛnɛ Baa Kilɛ wo›.
Wʼa ganha na Izirayɛli wo mɛgɛ ki kaa taga na wuyɛ pɛlɛ.»
Kilɛ watii ɲɛ nige Tɛhɛnɛ Baa Kilɛ kadugo na wɛ
6 «Tɛhɛnɛ Baa Kilɛ, Izirayɛli wo saan we,
wu ɲuŋɔ wolovɔɔ we, Kashɛn Keye yi Fɔɔ we,
yemu wʼa jo ge, yee yi wa mɛ:
‹Nɛ wu ɲɛ nizhiimɛ we, nɛ wu ɲɛ taxɔgɔ keb.
Li bu foro nɛ ni, Kilɛ wa wɛ.
7 Jɔgɔ wu ɲɛ ba nɛ ɲɛ-ɛ wɛ?
Wufɔɔ wu mujuu wá, wu li shɛ na na.
Wekɛ wʼa ɲibaŋa keree ɲa
fo taashiinɛ li ni na ki jo nɛ mu wɛ?
Keree kiimu kʼa ma ge, wufɔɔ wu kee ɲaha jo.
8 « ‹Yi ganha bu fya wɛ, Yi jaalaa ganha bu yìri wɛ.
Ta nɛ yee jo yee mu fo lʼa mɔ wɛ?
Ta yee ya yi logo wɛ? Yee pu ɲɛ nɛ wo sɛɛrɛɛ.
Ta Kilɛ watii wa nɛ kadugo na?
Ahayi, Faaga katii ɲɛ wa nige wɛ. Nɛ katii kaa cɛ wɛ.› »
Yasunyɔ yi kanvɛɛ pu na ba zhiige
9 Piimu pʼa yapɛrɛɛ ki yari ge, pee bɛɛri pu ɲɛ kaɲuu baa.
Yaŋmuyɔ yemu pʼa yari, yi keree dʼa waha pu mu ge,
yi ɲɛ yafiin bɛ wɛ.
Pee piimu pu ɲɛ ki sɛɛrɛɛ pu ge, pu wa yaaga ɲaa wɛ,
pʼi wa yaaga cɛ wɛ. Lee wuu na pu da ba zhiige.
10 Jɔgɔ wu da yapɛrɛ yàa, kelee di tɔɔrɔ ɲa di bye jaa,
na ta kaɲuu di ɲɛ yi na-ɛ wɛ?
11 Li wii, piimu bɛɛri pʼa pɛɛŋɛ tɛri yi na ge, pee na ba zhiige.
Yi yaavɛɛ pu ɲɛ piitiilee wɛ fo sipyii yɛ.
Pu bɛɛri pu puyɛ pinnɛ, pʼi ba yere.
Pu bɛɛri jaalaa pu da yìri, pʼa zhiige.
12 Tudun ma tɔɔrɔ lɔ, na ti le na ni,
na madaric taga ti yàa.
Fanha ke ki wa wu keŋɛ ki ni ge, kee ni wu ma ti yàa.
Ga wee labye we na xuugo shɔ wu ni, wu fanha na xhɔ.
Wu bye wʼi ya lɔhɔ gba wɛ, wʼa nɔ wu tɛhɛnɛ na.
13 Titɛmɛ ma mii shan tige na, na ki taanna,
na jaa yàa ki na ni kamagaan ni, na wu jegele wolo ni katɛnɛ ni,
na wu tɛ, na wu wɔɔgɔ, na wu pye ba sipya ɲɛ wɛ,
na wu yàa ɲɔ ba sipyiyawyii ɲɛ wɛ, na wu yaha gbaha ka ni.
14 Sɛdiri tiye wu ma gɔn, kelee wʼa shɛni tiye,
kelee terebɛnti tiye ya shɔɔnri, na yee yaha yi na lɛgi taha ki tiire ti tɛ ni.
Kelee wʼa pɛn tige ka nɔri, zanhaya ma ganha na ki lɛgi.
15 Sipyii wa yee tiye ye pyi kajiiye.
Ma na gbɛri ni yi ni na wahani, na pu yaligee sori ni yi ni.
Yee ninuyɔ pu ma yàa na pye kilɛ, na nuguro sinni wee fɛɛ ni,
ma ki tɛ na pye yapɛrɛ, na lee pɛlɛ.
16 Wʼa kee tige ki taaga ka sòrogo,
na xaara fɔ ni ki ni, na tee xa na din.
Kelee wʼa ganha na ki wahani, na yu:
«Le kafuro le ya bɛ dɛ! Nɛ ɲii wa naɲiŋɛ ki ni.»
17 Wʼa tige kisaŋa yàa na pye kilɛ,
na pye wu wo yapɛrɛ.
Wʼa ganha na nuguro sinni lee fɛɛ ni,
na li pɛlɛ, na li ɲɛɛri na yu:
«Na shɔ, bani mu wu wa nɛ wo kilɛ we.»
18 Pee sipyii pii ya yaaga cɛ wɛ, pu ya kaa cɛ wɛ,
bani pu ɲìi kʼa tɔ, kɔnhɔ pu ganha ba ɲaa wɛ.
Pu zɔlɔɔ pu bɛ ya tɔ, kɔnhɔ pu ganha bu yaaga ɲaha cɛ wɛ.
19 Wa shishiin ya wu funŋɔ shaa wɛ,
Wa shishiin ya go wu li kɔn wuyɛ funŋɔ ni,
kelee wu fungɔngɔ ta wu jo:
«Nɛ ke tige ke taaga ka sòrogo,
na na yalige shɔhɔ ki naganhaa na,
na xaara fuu ki na na xhaa.
Di na keesaŋa lɔ di yàa di bye tanhaŋa yaaga!
Tige ɲunɔ fɛɛ ni nɛ nuguro sinni mɛ!»
20 Wemu wʼa lee pyi ge, shɔɔnrɔ weefɔɔ ya li.
Wu fungɔnpɛɛngɛ kʼa wu le piinŋɛ ni.
Yapɛrɛ li wa da wu shɔ wɛ.
Wu bɛ di wa da ga ye jo ni wuyɛ ni wɛ na:
«Yaaga ke ki wa nɛ keŋɛ ni ge, ta ki wa nɛ faanna wɛ?»
Kilɛ ya Izirayɛli ɲuŋɔ wo
21 «Yakuba, ma funŋɔ yaha nidogo le na,
bani mu Izirayɛli wu ɲɛ nɛ wo kapyebye we.
Nʼa ma faanri kɔnhɔ mʼa bye na kapyebye.
Izirayɛli, nʼa da ga funŋɔ wɔ ma na wɛ.
22 Nɛ ma tiibaara ti jɔgɔ laha wà, ba ɲahaŋa ma biin mɛ wɛ.
Nɛ ma jurumu wu jɔgɔ laha wà ba kakunnuŋɔ ma biin mɛ wɛ.
Kuri pa na mu, bani nʼa ma ɲuŋɔ wolo.»
23 Fugba we, ta fundanga mujoŋɔɔ waa,
bani Tɛhɛnɛ Baa Kilɛ wʼa li pye!
Ɲiŋɛ ki nɔhɔdaan we, ta fundanga sipyaa xuulo!
Faaboboyo ye, yʼa fundanga mujoŋɔɔ waa,
na fara taha ke ni ki funŋɔ tiire ti bɛɛri na!
Bani Tɛhɛnɛ Baa Kilɛ ya Yakuba ɲuŋɔ wolo,
na wu nɔɔrɔ wu shɛ Izirayɛli ni.
24 Tɛhɛnɛ Baa Kilɛ, ma ɲuŋɔ wolovɔɔ we,
wee wemu wʼa ma faanri ma nu wu funŋɔ ni ge,
yemu wʼa jo ge, yee yi wa mɛ:
«Nɛ Tɛhɛnɛ Baa Kilɛ, nɛ wʼa yaŋmuyɔ yi bɛɛri yàa.
Nɛ wʼa fugba wu pii na yɛ,
nɛ wʼa ɲiŋɛ ki yàa na yɛ ni.
25 Nʼa da tudunmɔɔ kafinɛjuu pu wo shɛmɛ pu kyɛɛgi,
di celɔbyii pu ɲɛri fungɔnyɔ baa fɛɛ.
Di fungɔnyɔ fɛɛ pu tɛrɛŋɛ kadugo,
di pu lajɛ wu ɲɛri nahanahara.d
26 Ga yemu nɛ wo kapyebye wʼa yu ge, di yee ɲɔ fa,
yemu nɛ wo tudunmɔɔ pʼa yu ge, di yee ɲɔ fa.
Zheruzalɛmu shizhaa na, nɛ wʼa yu jo:
«Sipyii na ba diin ma ni sanha.»
Zhuda wo kulogoo ki shizhaa na, na yu:
‹Pu na ba ki yaavonɔ yàa.›
Nɛ na ba ki katahaya yi bɛɛri yirige.
27 Nɛ na ba locogoyo yi pye jo:
‹Yi waha, nɛ na ba yi gbalaa pu lɔhɔyɔ yi waha.›
28 Nɛ na ba Sirusi pye:
‹Nɛ dubyaa pu nahavɔɔ wu ɲɛ wii.›
Wu na ba nɛ wo ɲidaan wu bɛɛri pye na wu fa.
Zheruzalɛmu shizhaa na, wu na ba jo:
‹Yi wu yaavonɔ yàa!›
Kilɛ-pɛɛŋɛ pugbɔhɔ ki shizhaa na wʼa jo:
‹Yi ki nɔhɔ shanvonɔ shan!›»e