Kilɛ ya Sirusi shɔɔnri lɔ
45
Ayiwa, Tɛhɛnɛ Baa Kilɛ ya Sirusi wemu shɔɔnri lɔ ge,wʼa wu co wu kanige keŋɛ na,
kɔnhɔ wu fiiye yi shɛɛn pu tirige yaha wu wo fanha ki nɔhɔ ni,
wu saannaa pu wo saanra ti shɔ pu na,
wu kulogoo ki wo kuɲɔyɔ yi mugi wu mu,
kɔnhɔ wa shishiin ganha bu já yi tɔ wɛ.
Yemu Tɛhɛnɛ Baa Kilɛ ya jo wu mu ge,
yee yi wa mɛ:
2 «Nɛyɛ pyaa kʼa da ba doro ma ɲahagbaa na,
di boboyo yi ja di dirige.
Nɛ na ba daɲaa tɔɔrɔ gburaya yi kyɛɛgi,
di tɔɔrɔ shɔhɔshɔhɔyɔ yi kɛgi kɛgi.
3 Nɛ na ba naafuu niŋmɔhɔmɔ kan ma mu.
Naafuu wemu wu ɲɛ taŋmɔhɔŋɔ ni ge, nɛ na ba wee kan ma mu,
kɔnhɔ mʼa li cɛ na nɛ wu ɲɛ Tɛhɛnɛ Baa Kilɛ we,
Izirayɛli wo Kilɛ we, wee wemu wʼa ma lɔ ma mɛgɛ na ge.
4 Na kapyebye Yakuba,
Izirayɛli wemu nɛ shɔɔnri lɔ ge,
wee wuu na nɛ mu yiri ma mɛgɛ ki na.
Nɛ pɛɛŋɛ mɛgɛ taha ma na,
na ta mu ya nɛ cɛ bɛ wɛ.
5 Nɛ wu ɲɛ Tɛhɛnɛ Baa Kilɛ we, watii ɲɛ wà wɛ.
Li bu foro nɛ ni, Kilɛ wa nige wɛ.
Nɛ fanha le mu ni, na ta mu ya nɛ cɛ bɛ wɛ.
6 Kɔnhɔ sipyii pu bɛɛri di li cɛ,
ma lɔ Kilɛ-nɔhɔ na fo na shɛ nɔ caŋatomɔ na,
na li bu foro nɛ ni, yaaga ɲɛ wà nige wɛ.
Nɛ wu ɲɛ Tɛhɛnɛ Baa Kilɛ we,
watii ɲɛ wà nige wɛ.
7 Nɛ kpɛɛngɛ yeege, na nibiige leŋɛɛ.
Nɛ ɲaɲiŋɛ kaan, na bɔɔngɔ nɔni.
Nɛ Tɛhɛnɛ Baa Kilɛ wʼa kii bɛɛri pyi.
8 Fugba wu wu tiimɛ tirige ba mɛŋɛ ɲɛ wɛ,
ɲahaya ye di tiimɛ shan ba zanha ɲɛ wɛ.
Ɲiŋɛ ke ki ki ɲɔ mugi, kɔnhɔ ɲuwuuro tʼi fin,
tiimɛ pu bɛ di binnɛ fin ni ti ni.
Nɛ Tɛhɛnɛ Baa Kilɛ wʼa lee pye.»
Sipya ni wu yaavɔɔ
9 «Sipya wemu wʼa wu yaavɔɔ kaala ge,
bɔɔngɔ ki wa weefɔɔ wogo,
wee wemu wu ɲɛ cogo shɔɔ yɛ shɔhɔɔ kisaŋaa tɛ ni ge.
Ta cogo na já ki faanrivɔɔ pye: ‹Ɲaha mʼa byi wɛ?›
Yayaaga na já ki yaavɔɔ pye ya na: ‹Mu wa ni keye ni-i gɛ?›ab
10 Sipya wemu wʼa wu to pyi na: ‹Ɲaha ma dʼa se wɛ?›
Na wu nu pyi: ‹Ɲaha ma dʼa se wɛ?›
Bɔɔngɔ ki ɲɛ weefɔɔ wogo.
11 Tɛhɛnɛ Baa Kilɛ, Izirayɛli wo Fɛfɛɛrɛ wo we,
wu yaavɔɔ Kilɛ we, yemu wʼa jo ge, yee yi wa mɛ:
‹Yee na zɔɔ di nɛ yege ɲibaŋa keree na ya?
Ta yee pu wa da da nɛ wo nibyegee shɛɛ nɛ na
na nagoo pee, ni na keŋɛ yayaaya yi shizhaa na ya?
12 Nɛ wʼa ɲiŋɛ ki yàa, na ki sipyii pu bɛ yàa.
Nɛyɛ pyaa keye yʼa fugba wu pii.
Nɛ wʼa wu kashɛn keyec yi bɛɛri ɲaha ɲɛri.
13 Nɛ wʼa Sirusi shɔɔnri lɔ na wo tiimɛ pu funŋɔ ni.
Nɛ na ba wu korogoo ki bɛɛri taanna.
Wee wʼa da ba nɛ wo kulo li sinvonɔ sin.
Nɛ wo sipyii piimu pʼa bi co na kari ge,
wu na ba pee tɛrɛŋɛ ba.
Wu da ba ɲuwuuro pɛrɛmɛ,
kelee ma yakanga bɛ kaa yege pu mu wɛ.
Kashɛn Keye yi Fɔɔ, Tɛhɛnɛ Baa Kilɛ wʼa jo mu.»
Tɛhɛnɛ Baa Kilɛ wa wu sipyii pu niŋɛ ni
14 Yemu Tɛhɛnɛ Baa Kilɛ ya jo ge,
yee yi wa mɛ:
«Misira wo labye wu wo kuduun we, ni Kushe wo lada we, ni Seba shɛɛn,
yee sipyituunyɔ ye, yee bɛɛri na ba gɔn ɲɛri ma yíri,
na bye ma woyo.
Pee sipyii pii shɔnhɔyɔ wuu na ba ɲaari ma kadugo.
Pu na ba nuguro sinni ma fɛɛ ni, na ma ɲɛɛri na:
‹Mu yɛ nigin mu Kilɛ wu wa, watii ɲɛ wà nige wɛ.
Yasunyɔ yi ɲɛ yaaga bɛ wɛ.›»
15 Can na Kilɛ mu ɲɛ wemu ya ŋmɔhɔ ge,
Izirayɛli wo Kilɛ we, wemu wʼa sipya shuu ge.
16 Yapɛrɛɛ yaavɛɛ pu bɛɛri ya shiige fo na pu ɲuyɔ sogi.
Pu bɛɛri shiige wuu pʼa kuri.
17 Izirayɛli wi ge, Tɛhɛnɛ Baa Kilɛ na ba ɲuwuuro kan wu mu,
temu na gori yaha gbee ge.
Yi da ga zhiige wɛ,
yi ɲuyɔ da ga sogi nige bada bada wɛ.
Fugba ni ɲiŋɛ ki yaavɔɔ we
18 Tɛhɛnɛ Baa Kilɛ wʼa fugba wu yàa,
wee wu ɲɛ Kilɛ we, wemu wʼa ɲiŋɛ ki faanri,
na ki yàa, na ki kemɛ sin ge.
Wu ya ta ki yàa, na ki niwaga yaha wɛ.
Wʼa ki faanri, kɔnhɔ sipyii di diin ki na.
Yemu wʼa jo ge, yee yi wa mɛ:
«Nɛ wu ɲɛ Tɛhɛnɛ Baa Kilɛ we, watii ɲɛ wà nige wɛ.
19 Nɛ ta jo ŋmɔhɔrɔ ni,
kaluu nibiige wuu la shishiin ni ɲiŋɛ ke na wɛ.
Nɛ ta Yakuba shi wu pye jo
wʼa na shaa yaaga baa xuu ni wɛ.
Nɛ Tɛhɛnɛ Baa Kilɛ, yemu yʼa tii ge, yee nɛ yu.
Yemu yʼa saha ge, yee nɛ yu.»
Shi wu bɛɛri na ba Tɛhɛnɛ Baa Kilɛ cɛ
20 «Yee piimusamaa pʼa shɔ na foro fiiye yatii ni ge,
yi yiyɛ pinnɛ yʼi ba. Yi fulo shiizhan.
Piimu pʼa pu tiye yapɛrɛɛ ki tugoo na ɲaari ge,
kilɛ wemu da já pu shɔ-ɛ ge, na wee ɲɛɛri ge,
pee ya yaaga bɛ cɛ wɛ.
21 «Ayiwa yi pa baari, yʼi yi fiin jo.
Yi shɛ yiyɛ pinnɛ yʼi baari yiyɛ mu!
Keree kiimu kʼa byi niɲaa ge,
jɔgɔ wʼa fɛnhɛ ki jo fo taatuunnɔ ni wɛ?
Jɔgɔ wʼa kee keree ki bɛɛri jo na ta ki sanha bye-e wɛ?
Ta nɛ Tɛhɛnɛ Baa Kilɛ bɛ wɛ?
Ni nɛ yɛ bɛ wɛ, Kilɛ ɲɛ wà nige wɛ.
Kilɛ wemu wʼa tii na ɲɛ Shɔvɔɔ ge,
ni nɛ yɛ bɛ wɛ, watii ɲɛ wà nige wɛ.
22 Ɲiŋɛ ki sipyii pu bɛɛri,
yi ŋmahana ɲɛri nɛ yíri, yi na zhɔ.
Bani Kilɛ nɛ ɲɛ, watii di ɲɛ wà nige wɛ.
23 Nɛ kaa nayɛ pyaa mɛgɛ ki na,
jomɔ pe pʼa tii ge, pee pʼa fòro nɛ ɲɔ ki ni,
pee wa da ga já ɲɛri wɛ:
Sipyii pu bɛɛri na ba nuguro sin nɛ fɛɛ ni.
Ɲilee ki bɛɛri na ba gari nɛ mɛgɛ na,d
24 na yu: ‹Tɛhɛnɛ Baa Kilɛ yɛ nigin pe wu ni tiimɛ ni fanha ya daa.›
Piimu bɛɛri pʼa luu yirige wu tàan ge,
pee shiige wuu na ba ba wu mu.»
25 Tɛhɛnɛ Baa Kilɛ baraga ni
Izirayɛli shi wu bɛɛri da ba tiimɛ ta,
na bye ni fundangbɔhɔ ni.