Babilɔni wo yapɛrɛɛ kʼa to
46
Yapɛrɛɛ Bɛli ya kuri, a yapɛrɛɛ Nebo di do.Yapɔrɔyɔ ni yaboboyo na pʼa kii yapɛrɛɛ kii tɛri.
Kee yapɛrɛɛ kiimu yee bi dugoo ge,
kee ya ɲɛri nimɛ tuguro yapɔrɔyɔ yi ɲuŋɔ ni fo na yi kana.
2 Ki bɛɛri kʼa to shiizhan, na guri.
Kʼa da já kiyɛ ɲuŋɔ wolo wɛ.
Kiyɛ pyaa kʼa gaaŋi bulooro ni.
3 A Tɛhɛnɛ Baa Kilɛ di jo: «Yakuba tirige shɛɛn,
yee Izirayɛli tirige shɛɛn piimusamaa pʼa kori ge,
yi logo na ɲɔ na.
Nɛ yee ɲuŋɔ tuguro lɔ, na ta yee sanha se wɛ.
Nɛ yee lɔ, na co fo yi cazege ki na.
4 Nɛ na gori yaha na siimɛ na,
fo na shɛ yi pye yʼa lɛ.
Nɛ na ba yere ni yi ɲuŋɔ tuguro ni,
fo na shɛ yi pye yʼa ɲuyɔ fiinŋɛ.
Nɛ lee pye na xɔ. Nɛ na ba yi ɲuŋɔ tuguro luu.
Nɛ na ba yi lɔ, na yi ɲuŋɔ wolo.
5 «Jɔgɔ ni yʼa da na taanna, nɛ ni weefɔɔ di bye nigin wɛ?
Jɔgɔ ni yʼa da na saha, nɛ ni weefɔɔ di bye ninumɔɔ wɛ?
6 Pii ma pu sanni bɔɔgɔɔ ki wo sanni wu wolo,
na warifyɛn taanna,
na sanni shɔhɔvɔɔ wa saraa,
kɔnhɔ wu kilɛ wa yàa pu mu.
Pʼa ganha na sogolo wee fɛɛ ni, na wu pɛlɛ.
7 Pʼa ganha na wu luu kapaya na, na wu yɛri wu tayahaŋa ki ni.
Wʼa gori yaha wà, wu da já ɲɛhɛ wɛ.
Wa mɛhɛ mɛyire wá bɛ wu mu, wu da wufɔɔ ɲɔ shɔ wɛ.
Wu ya já sipya wolo cɔnrɔmɔ ni wɛ.
8 Yi yi funyɔ yaha nidogo lee na, yʼi kasɛɛgɛ yaha li na.
Yee nʼa she fɛɛ piiri, yʼi da yi funyɔ kɔɔn li na.
Kilɛ na ba wu sipyii pu ɲuŋɔ wolo
9 «Yi yi funyɔ yaha nidogo taa toronɔ li wo keree ki na,
bani Kilɛ nɛ ɲɛ, watii di ɲɛ wà nige wɛ.
Kilɛ nɛ ɲɛ, nɛ ɲɔhɔ wa shishiin di ɲɛ wɛ.
10 Kaa lemu na ba bye ɲibaŋa na ge,
nɛ lee yu fo taashiinɛ ni.
Kaa lemu li ɲɛ li sanha bye-e ge,
nɛ ma lee jo fo taatuunnɔ ni.
Nɛ jo: «Nɛ keree kiimu tagi yaha ge, ki na ba fa voro.
Keree kiimu bɛɛri kʼa taan nɛ mu ge, kee nɛ da ba bye.
11 Nɛ shazhiga ka yiri na yìri Kilɛ-nɔhɔ kacɛ ki na,
kemu ya xaara coni ge.
Kee shazhiga ki ɲɛ ná wa wemu wu da ba nɛ wo katɛgɛŋɛɛ ki fa ge.
Nɛ wee yiri na yìri taaliige fiige ka ni.
Yemu nɛ jo ge, nɛ na ba yee yaha yʼi bye.
Keree kiimu nɛ tagi ge, nɛ na ba kee yaha kʼi fa foro.
12 «Yi ɲuwegee shan ni na jomɔ pu ni,
yee ɲuwewagaa wuu piiri,
yee piimu sanha kʼa lii tiimɛ na ge.
13 Nɛ na wo tiimɛ pu pyi pu na fuloo,
pu sanha wa lii wɛ.
Nɛ wo ɲuwuuro tʼa tɛɛŋɛ.
Nɛ na ba Siyɔn ɲuŋɔ wolo,
na nɔɔrɔ taha Izirayɛli na.»