Babilɔni ya to
47
A Tɛhɛnɛ Baa Kilɛ di jo:«Babilɔni poro, tigi laha ma saanra koro li na,
mʼa diin ɲiŋɛ na.
Tiin ɲiŋɛ na, Kalide shɛɛn poro,
bani saanra koro wa nige ma mu wɛ.
Pu da ba ma pyi nige ‹Ɲaɲiŋɛ kulo, fɛrɛmɛ kulo› wɛ.
2 Tira shan mʼa myɛ tire.
Kapadahaŋa ki laha ma ɲaha ki na.
Ma cewaŋa ki kuri, mʼa ma shegee ki yeege, mʼa gba wu kɔn.
3 Ma ceepile wo wu na ba ɲa,
ma nɔhɔ ki na ba ɲa.
Nɛ na ba na wuu li gɔɔrɔ wolo ma na.
Sipya wa shishiin wa da ba já lee koo pari wɛ.
4 «Wèe wo ɲuŋɔ wolovɔɔ wu mɛgɛ ki ɲɛ na
Kashɛn Keye yi Fɔɔ Tɛhɛnɛ Baa Kilɛ.
Izirayɛli wo fɛfɛɛrɛ wo wu ɲɛ wii.
5 Kalide shɛɛn poro we, tiin, mʼa cari mayɛ na, jé nibiige ki ni.
Pu da ba ma yiri nige na ‹Shi wu wo saanzhɔ› wɛ.
6 Nɛ luu li bi yìri na sipyii pu tàan.
Nɛ bi she na wo cɛn wu ni, na wu le mu keŋɛ ni.
Ga mu ya ta ɲuŋɔ ɲaari wu na wɛ.
Mu ya ma zhu wu fanha ki digi fo xuuni nɔhɔlɛɛ pu na.
7 Mu bi yu na: ‹Nɛ na ba bye yaha saanzhɔ fo gbee.›
Mu ya ta ma funŋɔ kɔn ni kii keree kii ni wɛ.
Ki na ba xhɔ xɔgana lemu bɛ na ge,
mu ya ta ma funŋɔ kɔn lee bɛ na wɛ.
8 «Ayiwa nimɛ, ye logo, mu wemu wʼa pushaga pyi ge,
mu wemu wʼa saanra ti pyi ɲaɲiŋɛ na ge,
mu wemu wʼa yu mayɛ funŋɔ ni ge na:
‹Nɛ, nɛ, watii ɲɛ wa wɛ, fo nɛ.
Nɛ da ga bye naxhugoshɔ wɛ,
nɛ da ga buun na nagoo bɛ ni wɛ.›
9 Ayiwa, kii keree shuun we na ba gɔn do ma ɲuŋɔ ni
taapile ni, caŋa nigin:
Ma nagoo pu na ba xhu, ma poo wu bɛ na xhu.
Kee bɔɔngɔ ke na ba ma ta fo na golo,
ma ni ma siganma nigbɔ pe ni ma dabari wu bɛɛri ni.
10 Ma wo kuumɔ pe mu bi pye ma tadaŋa,
na yu na: ‹Sipya bɛ ya nɛ ɲaa wɛ.›
Ma wo fungɔngɔ fɛɛrɛ te ni ma wo lajɛ we, yee yʼa mu piinŋɛ.
Mu bi yi yu mayɛ funŋɔ ni na: ‹Nɛ, nɛ, watii ɲɛ wa wɛ, fo nɛ.›
11 Bɔɔngɔ ka na ba nɔ ma na, ma da ga já ki ɲuŋɔ círi wɛ.
Gyɛɛgi wa na ba nɔ ma na, ma da ga já viin voro wu tàan wɛ.
Kakara na ba gɔn do ma ɲuŋɔ ni, na ta ma ya ti soŋi wɛ.
12 «Ɲaha le mʼa ma dabari wu pyi, ni ma siganma pu ni.
Mu ya mayɛ kanha na ye taanni fo ma nɔhɔpiire ti tuun wu ni.
La wa la ni ma na ba kuduun ta li ni.
La wa la ni ma na ba bye fyaara yaaga.
13 Mu ya celɔbyii taga mayɛ kanha.
Pee celɔbyii piimu pʼa fugba wu wo shɛmɛ pu cɛ,
na wɔrɔɔ ki wo shɛmɛ pu cɛ,
keree kiimu kʼa ma taa ge,
na yevorovoyo yi wii na kee yu ma mu ge,
na pu yìri pʼi ba ma shɔ!
14 Li wii, pee bɛɛri na ba bye ba ɲawaara ɲɛ wɛ.
Na na ba ti sòrogo. Pu da ga já zhɔ kee na ki wɛ.
Na kemu pu ma gbɛri na sori, kelee na wahani ge,
ki wa da ba bye kee ka wɛ.
15 Piimu wuu na mu bi mayɛ kana ge,
mumɛ na pee wa da ba xhɔ.
Piimu pʼa bi bye ma kariɲiinɛɛ pee fo ma nɔhɔpiire ti tuun wu ni ge,
pee bɛɛri na ba baa jaaga pu yɛ pu yɛ.
Pu shɛn nigin bɛ wa da ba ma shɔ wɛ.»