Kilɛ ya keree nivoŋɔɔ kaa jo
48
«Yakuba tirige shɛɛn,yee piimu na Izirayɛli mɛgɛ kʼa yiri ge,
yee piimu pʼa foro Zhuda ni ge,
yee piimu pʼa gari Tɛhɛnɛ Baa Kilɛ mɛgɛ ki na,
na Izirayɛli wo Kilɛ wu mɛgɛ ki yiri,
na ta yi wa lee pyi ni can ni tiimɛ ni-i ge,
yi ɲuwegee shan.
2 Yee wa yu na fɛfɛɛrɛ kulo li wo sipyii yee ɲɛ.
Yee wa yiyɛ tiiŋɛ Izirayɛli wo Kilɛ wu na,
wee wemu mɛgɛ ki ɲɛ Kashɛn Keye yi Kafɔɔ Tɛhɛnɛ Baa Kilɛ ge.
3 «Keree kiimu kʼa pye toro ge,
nɛ Tɛhɛnɛ Baa Kilɛ ya ki jo fo taatuunnɔ ni.
Nɛ ɲɔ ni yʼa foro, nɛ bi yi jo yee mu.
Taapile ni nɛ wee labye wu pye, a yee ɲɔ di fa.
4 Bani nɛ li cɛ na mu ɲuwyii lʼa waha.
Mu gaɲa kʼa shii ba tuubege ɲɛ wɛ.
Ma ɲuŋɔ kʼa waha ba daɲaa tɔɔrɔ ɲɛ wɛ.
5 Nɛ kii keree kii jo yee mu fo taatuunnɔ ni.
Nɛ ki jo yee mu na ta ki sanha bye wɛ,
kɔnhɔ yi ganha bu ba ye jo wɛ na:
‹Wèe wo yapɛrɛɛ ki kʼa le pye.
Pɛɛŋɛ yaŋmuyɔ yemu wèe ya tɛ wolo tiye ni,
na tɔɔrɔ ɲa na taga jaalaa piimu yàa ge,
yee yʼa kii keree kii bye koo kan.›
6 Yee ya ɲibaŋa keree kiimu logo ge,
yee ya ki ɲa, ki ɲɔ ya fa.
Ta yee bɛ da da ki yu wɛ?
Ayiwa, na co nimɛ na, nʼa da ba keree nivoŋɔɔ shɛɛ yi na.
Kaŋmɔhɔŋɔɔ ki wa kii, yʼa bi sanha yaaga cɛ ki ni wɛ.
7 Nimɛ kee keree kʼa da bye.
Ki wa taatuunnɔ wogoo wɛ.
Fo na pa nɔ niɲaa na,
yee bi sanha yaaga logo ki keree ni wɛ.
Kɔnhɔ yi ganha ba jo wɛ na: ‹Wèe bi kii cɛ!›
8 Yi wa sanha kii keree kii logo ɲa wɛ.
Yi wa yaaga cɛ ki ni wɛ.
Yi ɲuwegee ya fɛnhɛ ki logo ɲa wɛ.
Can na, nɛ li cɛ jo java wu ɲɛ yee nibyii.
Fo yee seduun wu ni yee mɛgɛ ya yiri na nʼa she fɛɛ.
9 «Na mɛgɛ ki wuu na nʼa da ba na luu li sinniŋɛ.
Na nɔɔrɔ wu wuu na nʼa da ba nayɛ co yi tàan,
kɔnhɔ di ganha bu yi kyɛɛgi wɛ.
10 Nɛ na taga yee ɲa, na yee pye fɛɛfɛɛ
ga nɛ ta yee ɲa ba warifyɛn ɲɛ-ɛ wɛ.
Kanhama wo na ki ni nɛ yee ɲa.
11 Nayɛ pyaa ki wuu na nɛ lee pye.
Nɛ da ga sɔɔ na mɛgɛ ki kyɛɛgi wɛ.
Nɛ da ga na wo pɛɛŋɛ ki kan watii mu wɛ.»
Kilɛ ya labye wemu kaa le Sirusi keŋɛ ni ge
12 A Tɛhɛnɛ Baa Kilɛ di jo:
«Yakuba, Izirayɛli, mu wemu nɛ yiri ge,
logo na ɲɔ na!
Nɛ wi! Nɛ wu ɲɛ nizhiimɛ we,
nɛ wu ɲɛ sanha bɛ kurogo wo we.a
13 Nɛyɛ pyaa keŋɛ kʼa ɲiŋɛ ke sin.
Nɛ kanige keŋɛ kʼa fugba wu pii.
Ba nɛ yi yiri wɛ, yʼa ba binnɛ taapile ni.
14 «Yi bɛɛri pu pa binnɛ yʼi logo na ɲɔ na!
Wemu wʼa taan Tɛhɛnɛ Baa Kilɛ mu geb,
wee wʼa da ba Kilɛ ɲidaan pye Babilɔni na.
Wu na ba wu keŋɛ ki yirige Kalide shɛɛn pu fɛni.
Jɔgɔ wu wa yee ni, wufɔɔ na kii keree kii jo
na ta ki sanha nɔ-ɛ wɛ?
15 Nɛ wi! Nɛyɛ pe, wʼa jo, na wu yiri.
Nɛ wʼa wu pye wʼa pa,
wu kaɲɔwuugoo ki bɛɛri kʼa da ba ɲaha ta.
16 «Yi fulo na na, yʼi ye logo:
‹Na co fo taashiinɛ li na,
nɛ sanha jo ɲa ŋmɔhɔrɔ ni wɛ.
Na co fo kii keree kii pyeduun wu na,
nɛ ɲɛ wà.›
Nimɛ Tɛhɛnɛ Baa Kilɛ ya wu munaa li tirige nɛ na
na nɛ tun.
Tɛhɛnɛ Baa Kilɛ ya tigire shan wu sipyii pu na
17 Tɛhɛnɛ Baa Kilɛ, yi ɲuŋɔ wolovɔɔ we,
Izirayɛli wo fɛfɛɛrɛ wo we,
yemu wʼa jo ge, yee yi wa mɛ:
‹Nɛ wu ɲɛ Tɛhɛnɛ Baa Kilɛ, yi Kilɛ we.
Wee wemu wʼa yi kalaa yiyɛ pyaa ki wo kuduun kaa na,
na yi leni yi kozhɛɛ ni ge.
18 Ee, yi da bi da yee ya kasɛɛgɛ yaha
nɛ wo ɲɔmɛjogoo ki na!
Yee ɲaɲiŋɛ ki bi da bye ba gba lɔhɔ ɲɛ wɛ,
yee wo tiimɛ pu na bye ba suumɔ lɔhɔ ɲɛ wɛ.
19 Yi kadugo shi nibama wu bi da ɲɛhɛ
ba gbazhɛnhɛ pya ɲɛ wɛ.
Pu mɛgɛ ki bi da ga dɔ wɛ.
Pu da ga gyɛɛgi laha wà nɛ ɲaha tàan wɛ.›»
Kilɛ wo sipyii pʼa da ba foro Babilɔni ni
20 «Yi foro Babilɔni ni,
yi paa foro Kalide shɛɛn pu shɔhɔɔ ni!
Yʼa fundanga mujoŋɔɔ waa yʼi da ye yu,
yʼi da yi caaga fo ɲiŋɛ ke tɛhɛnɛ le,
yʼa yi yu na:
‹Tɛhɛnɛ Baa Kilɛ ya wu kapyebye
Yakuba ɲuŋɔ wolo!›
21 «Wʼa pu ɲaha co na toro
lɔhɔ baa siwaga ki ni, waga ya pu ta wɛ.
Wʼa lɔhɔ pye kʼa fɔ na foro pu mu faaga ni.
Wʼa faaga ki yee, a lɔhɔ kʼi jɛnri foro.
22 «Ga sipyikuuyo kunni da ga ɲaɲiŋɛ ta wɛ.»
Tɛhɛnɛ Baa Kilɛ wʼa jo mu.