Tɛhɛnɛ Baa Kilɛ wo kapyebye nizaama we
49
Yee suumɔ lɔhɔ niŋɛ takpiiŋɛ shɛɛn,yi logo na ɲɔ na!
Yee taliige shɛɛn, yi ɲuwegee shan!
Tɛhɛnɛ Baa Kilɛ ya nɛ yiri,
ma na yaha na nu wu funŋɔ ni.
Wʼa na mɛgɛ ki yiri ma na ta di sanha se wɛ.
2 Wʼa na ɲɔ ki wolo
ba ŋmɔpara ɲɔtaan wuu ɲɛ wɛ.
Wʼa wu keŋɛ ki ɲimɛ pu tɔ nɛ na.
Wʼa na pye ba ŋmaga ɲɛ wɛ,
kemu munaa lʼa firigi ge.
Wʼa na ŋmɔhɔ wu ŋmakɔŋɔ ki ni.a
3 Wʼa nɛ pye: «Mu wu ɲɛ nɛ wo kapyebye Izirayɛli we,
mu keŋɛ kurogo nʼa da ba na wo nɔɔrɔ wu shɛ.»
4 Ga, a nɛ jo: «Tawaga ni nɛ nayɛ kanha.
Gbɛrigbɛri ɲuŋɔ tàan nɛ na fanha ki xɔ, kaɲuŋɔ baa.»
Na ta, nɛ yaa ni lemu ni ge,
lee ɲɛ Tɛhɛnɛ Baa Kilɛ keŋɛ ni.
Nɛ wo kuduun wu wa Kilɛ keŋɛ ni.
5 Nimɛ, Tɛhɛnɛ Baa Kilɛ ya jo,
wee wemu wʼa nɛ faanri na nu wu funŋɔ ni ge,
kɔnhɔ nɛ ba bye wu kapyebye,
di Yakuba kuruŋɔ di ba wu mu,
di Izirayɛli pinnɛ wu ɲaha tàan.
Nɛ na ba pɛɛŋɛ ta Tɛhɛnɛ Baa Kilɛ ɲaha tàan.
Kilɛ wu ɲɛ nɛ wo baraga ke.
6 Wʼa jo: «Na pye nɛ wo kapyebye,
na Yakuba wo gbaweye yi yirige,
na Izirayɛli nagoo pusamaa kuruŋɔ pa,
mʼa da ba da lee yɛ na wɛ.
Nʼa da ba ma teŋɛ na pye shi wu bɛɛri wo kpɛɛngɛ,
kɔnhɔ nɛ wo ɲuwuuro tʼi nɔ
fo ɲiŋɛ ki tɛhɛŋɛɛ ki bɛɛri na.»b
7 Wemu pʼa fanri ge, fiige ki shɛɛn pʼa wemu kɔ ge,
wemu wu ɲɛ fanhafɛɛ pu wo bulo wu ge,
yemu Tɛhɛnɛ Baa Kilɛ, Izirayɛli wo ɲuŋɔ wolovɔɔ,
ni wu fɛfɛɛrɛ wo wʼa jo wu mu ge, yee yi wa mɛ:
«Saannaa pu ba ma ɲa, pu na yìri yere.
Ɲuŋɔfɛɛ pu ba ma ɲa, pu na ba nuguro sin ma fɛɛ ni
Tɛhɛnɛ Baa Kilɛ wuu na,
wee wemu wu ɲɛ ɲɔmɛɛ fɔɔ ge,
Izirayɛli wo fɛfɛɛrɛ wo we,
wee wemu wʼa ma shɔɔnri lɔ ge.»
Izirayɛli nagoo pʼa kuri pa na yìri taliige ni
8 Yemu Tɛhɛnɛ Baa Kilɛ ya jo ge, yee yi wa mɛ:
«Nɛ mu ɲɔ shɔ na ɲidaan tuun ni,
nɛ mu tɛgɛ ɲuwuuro ti caŋa ki na.
Nɛ na ba ma marac,
na ba ma teŋɛ na pye kariɲɛɛgɛ ɲɔmɛɛ na ni sipyiire ti tɛ ni,
di fiige ki yirigevonɔ yirige, kee kemu kʼa kyɛɛgi ge,
di ki taa taa sipyiire ti na sanha,
9 di yi jo kasolemɛɛ pu mu na:
‹Yi foro!› Piimu pu wa nibiige ki ni ge,
di pee pye: ‹Yi foro nibiige ki ni!›
Pu na ba pu ɲɔlige taa korogoo ki ɲɔ na,
ni yaŋaboyo yi na, ba yapɔrɔyɔ ɲɛ wɛ.
10 Xuugo wa da ba pu taa nige wɛ, waga wa da ba pu taa wɛ.
Siwaga ki wo kafugo ke,
kelee caŋa ki wo kafugo ki wa da ba pu sori wɛ,
bani wemu wʼa ɲuŋɔ ɲaari pu na ge,
wee na ba doro pu ɲaha na,
na se ni pu ni lobulowegee xuu ni.d
11 Nɛ na ba korogoo wolo na faaboboyo yi bɛɛri na,
nɛ na ba kogboroyo yi bɛɛri yàa.
12 «Pu piiri, pu pii ma na yìri talige ni.
Pii wa ma na yìri suumɔ kulo kacɛ ke, ni caŋatomɔ kacɛ ki na.
Pii wa ma na yìri Sinimu fiige ki ni.»
13 «Fugba we, ta xhugulo fundanga keŋɛ ni!
Ɲiŋɛ ke, mu wu funŋɔ tàan!
Faaboboyo ye, yee pu cɛnri fundanga keŋɛ ni!
Bani Tɛhɛnɛ Baa Kilɛ ya wu sipyii pu logoo ɲiŋɛ.
Wʼa ɲuŋɔ ɲaari wu kanhama sipyii pu na.»
Kilɛ ya funŋɔ wuu wu sipyii pu na wɛ
14 «Siyɔn bi yu na: ‹Tɛhɛnɛ Baa Kilɛ ya nɛ yaha!
Kafɔɔ ya funŋɔ wɔ nɛ na!›
15 Ta cee funŋɔ ya wuu wu puŋmaraga na?
Pya wemu na wʼa tigi ge, ta wu ya ɲuŋɔ ɲaari wee na wɛ?
Ali wu funŋɔ mɛhɛ wɔ wu na bɛ,
nɛ kunni funŋɔ da ga wɔ mu na wɛ.
16 Nɛ mu mɛgɛ ki ka na kadaa li funŋɔ ni.
Ma kulo li maha maha kasɔrɔyɔ yi wa
nɛ ɲaha tàan tuun bɛɛri ni.
17 Ma nagoo pu wa fe na ma.e
Piimu pʼa ma kulo li ja, na li kyɛɛgi ge, pee na ba foro ma ni.
18 Ma ɲuŋɔ ki yirige, mʼa wii mayɛ maha.
Ma nagoo pu bɛɛri pʼa pa binnɛ, pʼa ma ma yíri.
Nɛ kaa nayɛ pyaa ki na jo ma na ba pu le ba yalere ɲɛ wɛ.
Ma na ba pu pɔ mayɛ na ba cenabun ma wuyɛ to wɛ.
Tɛhɛnɛ Baa Kilɛ wʼa jo mu.
19 Oo dɛ, ma kataha ke, ma katapiye ye,
ma fiige ki kʼa kyɛɛgi ge,
yee tɛyɛ yi na ba jɛrɛ ma sipyii pu ni nimɛ.
Piimu pʼa bi ma shɛɛngi na juuri ge,
pee na ba baa voro ma ni, na lii ma na.
20 Mʼa bi ma nagoo piimu wii na ma buun pu ni ge,
pee na ba yi yu na dɛri ma mu na:
‹Ke kpɛɛngɛ ke ya cɛrɛ wèe ni,
xuu wa gbegele wù mu, kɔnhɔ wù shɛ diin wà.›
21 Yi na ba yu yiyɛ funyɔ ni wee tuun wu ni na:
‹Jɔgɔ wʼa pii bɛɛri se nɛ mu wɛ?
Bani pya bye nɛ mu wɛ, nɛ bye seganha.
Nɛ bi co kari fiige katii ni.
Jɔgɔ wʼa pii bii wɛ?
Nayɛ nɛ bye. Mii pii di bi bye wɛ?›»
22 Yemu Tɛhɛnɛ Baa Kilɛ ya jo ge,
yee yi wa mɛ:
«Nɛ na ba na keŋɛ ki ɲahana shi wu bɛɛri na,
na na wo tuugushɛmɛ pu yirige fiiye yi mu,
kɔnhɔ pu da ma ni ma jalaa pu ni na pu co pu keye yi ni,
na ma pushaa pu taha pu kapaya yi na.
23 Saannaa na ba yaligee kaan ma nagoo pu mu.
Saannaa cèe pu na bye pu biivɛɛ.
Pu na ba nuguro sin ma fɛɛ ni,
na ɲahaya ye buri ɲiŋɛ ke na,
na ma tɔɔyɔ yi kafunnuŋɔ ki laala.
Ma na ba li cɛ lee funŋɔ ni na Tɛhɛnɛ Baa Kilɛ nɛ ɲɛ.
Piimu pʼa nɛ pye pu tadaŋa ge, pee da ga zhiige wɛ.
24 Kashɛn naŋmaga ya yaŋmuyɔ yemu ta kashɛn sige ni ge,
ta yee na já zhɔ wu na?
Fanha-ɲɛhɛ-ŋmani ya sipyii piimu co ge,
ta pee na já zhɔ wu na?»
25 Ga yemu Tɛhɛnɛ Baa Kilɛ ya jo ge,
yee yi wa mɛ:
«A go kashɛn naŋmaga ki wo
sipyicomɔɔ pu na ba shɔ wu na.
Piimu fanha-ɲɛhɛ-ŋmani wʼa co ge, pee na ba yaha!
Piimu pʼa kashɛn ŋmuu yi na ge,
nɛyɛ pyaa ki da ba kashɛn ki ŋmɔ pee na
na yee nagoo pu ɲuŋɔ wolo.
26 Piimu pʼa ma kana ge,
nɛ na ba pee pye pu na puyɛ xaara xaa,
na puyɛ shishan gbuu fo na ɲawɔhɔ wuu puyɛ na
ba duvɛnfomɔ ɲɛ wɛ.
Sipyiire ti bɛɛri na ba li cɛ lee funŋɔ ni na
Tɛhɛnɛ Baa Kilɛ nɛ ɲɛ, ma Shɔvɔɔ,
ni ma ɲuŋɔ wolovɔɔ we, Yakuba wo Se Bɛɛri Fɔɔ we.»