Tɛhɛnɛ Baa Kilɛ ya ta she wu sipyii pu ni wɛ
50
Yemu Tɛhɛnɛ Baa Kilɛ ya jo ge, yee yi wa mɛ:«Gbaxɔɔrɔ sɛmɛ wemu nɛ taga yee nu Zheruzalɛmu gbaga ki xɔ ge,
mii wee sɛmɛ wʼi ɲɛ wɛ?
Kelee wekɛ wo foo lʼi bye nɛ na, a nɛ yee pɛrɛ weefɔɔ mu wɛ?
Yi wo katiibaagaa ki wuu na yee ya pɛrɛ.
Yee wo jurumu wu wuu na yee nu wu gbaga kʼa xɔ.
2 Nɛ pa ge, ɲaha na nɛ di ya ta sipya bɛ ɲa-ɛ wɛ?
Nɛ yire pye ge, ɲaha na sipya bɛ di ya ta nɛ ɲɔ shɔ-ɛ wɛ?
Ta nɛ keŋɛ ki yɛrɛ kʼa gbere ki já yee shɔ?
Ta fanha yɛrɛ wa nɛ ni nɛ wu já yee ɲuŋɔ wolo wɛ?
Li wii, nɛ vuguri wu yɛ wu ma suumɔ lɔhɔ ki waha,
na gbalaa pu ɲɛri pye siwaga.
Yi fyaa pu na fɔnhɔ lɔhɔ baara na, waga na pu gbo.
3 Nɛ wu ma fugba wu ɲahaya yi pye yʼa wɔ na pye kilɛwɔ,
na fugba wu bɛɛri tɔ ni bɔrɔyɔ fawɔhɔŋɔ ni.»
Tɛhɛnɛ Baa Kilɛ wo kapyebye nizaama we
4 Kafɔɔ Tɛhɛnɛ Baa Kilɛ ya nɛ taanni jomɔ jogana ni,
kɔnhɔ nɛ já da lowaa jomɔ yu kanhama fɛɛ mu.
Ɲisɔɔgɔ bɛɛri wʼa na ɲɛ,
wu ma na ɲɛ kɔnhɔ di ɲuwegee shan,
di jomɔ logo ba kalaapire ɲɛ wɛ.
5 Tɛhɛnɛ Baa Kilɛ ya nɛ ɲuwii li mugi,
a nɛ bye nɛ ta ɲuŋɔ nari wu na wɛ,
nɛ ta kuri kadugo wɛ.
6 Nɛ na kadugo ki kan na kpɔnvɛɛ pu mu,
na na jegereye yi tagi
na ɲahazhɔ wu shiire ti kɔɔngivɛɛ pu mu.
Piimu pʼa na shɛhɛlɛ, na ɲɔlɔhɔ waa na na ge,
nɛ ta na ɲaha ki lɔ laha pee tàan wɛ.a
7 Ga Kafɔɔ Tɛhɛnɛ Baa Kilɛ ya nɛ tɛgɛ,
lee lʼa nɛ pye nɛ ɲuŋɔ ya ta sogi wɛ.
Lee wuu na nɛ bɛ ya na ɲuŋɔ waha
ba faaga ɲɛ wɛ,
bani nɛ li cɛ jo na da ba zhiige wɛ.
8 Wemu wʼa kaɲii kaan nɛ mu ge, wee ya tɛɛŋɛ.
Jɔgɔ wu da já nɛ yiri kiiri na wɛ?
Wufɔɔ wu pa wù binnɛ shɛ kiiri wu na!
Jɔgɔ wu ɲɛ nɛ wo kiiri kɔnɲii wu wɛ?
wufɔɔ wu fulo na na!
9 Kafɔɔ Tɛhɛnɛ Baa Kilɛ na ba nɛ tɛgɛ.
Jɔgɔ wʼi da ba nɛ jaagi wɛ?
Nɛ wo pɛɛn pu bɛɛri na ba do do
ba fàsicuuro ɲɛ wɛ, dun ya temu li ge.
10 Jɔgɔ wu wa yee ni,
wufɔɔ na fyagi Tɛhɛnɛ Baa Kilɛ na wɛ?
Wufɔɔ wu ɲuwegee shan
ni wu kapyebye wu jomɔ pu ni!
Wufɔɔ mɛhɛ ba ɲaari bɛ nibiige ni,
kpɛɛngɛ di ɲɛ wu mu wɛ,
wufɔɔ wu Tɛhɛnɛ Baa Kilɛ wo mɛgɛ ki pye wu tadaŋa,
wʼi wuyɛ tiiŋɛ wu Kilɛ wu na!
11 Ga yee piimu bɛɛri pʼa na gbɛri,
na na ŋmaya kɔɔn yiyɛ mu ge,
yi shɛ jé yi nagbɛrɛgɛ ki ni,
yi na ŋmaya yi niŋɛ ki ni.
Nɛ wo keŋɛ kurogo lee wa nɔ yee na.
Ɲaa ni yee da ba shɛ sinnɛ.