Siyɔn na ba loɲinɛ ta
51
Tɛhɛnɛ Baa Kilɛ ya jo na:«Yee piimu pʼa taha tiimɛ pu fɛni ge,
yee piimu pʼa Tɛhɛnɛ Baa Kilɛ shaa ge,
yi logo na ɲɔ na!
Faaga kemu ni yee ya tɛ na wolo ge, yi kee wii.
Faaga wege kemu ni yee ya tugi wolo ge, yi kee wii.
2 Yi to Ibirayima ni Sara wemu wʼa yi se ge, yi pee wii.
Tuun wemu ni nɛ Ibirayimu yiri ge, wu yɛ wu bye.
A nɛ baraga le wu ni, na wu nagoo pu ɲɛhɛ.»
3 Nakaara baa Tɛhɛnɛ Baa Kilɛ na ba loɲinɛ kan Siyɔn mu,
na ɲuŋɔ ɲaari wu takyɛɛgɛyɛ yi bɛɛri na.
Wu na ba wu siwaga ki ɲɛri
ba Edɛni tiire kɛrɛyɛ yi ɲɛ wɛ,
na wu kacaaga ki ɲɛri
ba Tɛhɛnɛ Baa Kilɛ wo tiire kɛrɛyɛ yi ɲɛ wɛ.a
Fundanga ni lotaan na ba daa wà,
ni masɔŋɔ yoyo ni ciire mujoŋɔɔ.
4 «Yi logo na ɲɔ na, na sipyii!
Nɛ wo shi we, yi ɲuwegee shan!
Bani nɛ yíri saliya wʼa da ba yìri.
Nɛ na ba na wo tiimɛ pu pye kpɛɛngɛ sipyiire ti bɛɛri mu.
5 Nɛ wo tiimɛ pʼa tɛɛŋɛ,
nɛ wo ɲuwuuro ti tuun wʼa nɔ.
Nɛyɛ pyaa kʼa da ba kiiri kɔn sipyiire ti na.
Taliige shɛɛn pu na ba nɛ pye pu tadaŋa.
Pu na ba nɛ ɲaha wii.
6 «Yi ɲuyɔ yi yirige yʼi wii fugba wu ni,
yʼi xhɔ yʼi ɲuyɔ yi sogi yʼi ɲiŋɛ ki wii.
Can wi, fugba wu na ba biin ba wurege ɲɛ wɛ,
ɲiŋɛ ki na ba yɛrɛ ba fàŋa ɲɛ wɛ,
ki sipyii pu na xhu ba susomɔɔ ɲɛ wɛ.
Ga nɛ wo ɲuwuuro ti na ba gori yaha gbee,
nɛ wo tiimɛ pʼa da ga xhɔ wɛ.
7 Yee piimu pʼa tiimɛ pu cɛ ge,
yee piimu wo zɔlɔɔ pu na nɛ saliya wu wa ge, yi logo na ɲɔ na!
Yi ganha ba fyagi sipyii pu wo fanhara ti na wɛ,
pu wo shɛhɛɛ ki ganha bu yi jaalaa pu yirige wɛ.
8 Bani dun wʼa da ba pu li ba fàŋa ɲɛ wɛ.
Tako na ba pu li ba dubya shiire ɲɛ wɛ.
Ga nɛ wo tiimɛ pu na ba gori yaha fo gbee.
Nɛ wo ɲuwuuro ti na ba gori yaha shi nibama wu bɛɛri mu.»
Ta yiri Tɛhɛnɛ Baa Kilɛ, ta yiri!
9 Ta yiri Tɛhɛnɛ Baa Kilɛ, ta yiri!
Mʼa ma sefɛɛrɛ ti shɛ.
Yiri, ma na jo ba mʼa li pye taatoronɔ li ni,
tɛɛlɛɛ li wo sipyii pu pu wɛ.
Ta mu bɛ wʼa Araxavu† kyɛɛgi,
na suumɔ lɔhɔ yakanhaŋab ki gbo wɛ?
10 Ta mu bɛ wʼa suumɔ lɔhɔ ki pye kʼa waha,
na logbɔhɔ ki wo locogoyo yi pye yʼa waha wɛ?
Ma sipyii piimu ɲuŋɔ mʼa wolo ge,
ta mu bɛ wʼa koo wolo pee mu suumɔ lɔhɔ ki niŋɛ ni, a pʼi doro wɛ?
11 Tɛhɛnɛ Baa Kilɛ ya piimu ɲuŋɔ wolo ge,
pee na ba guri ba mu lee pagana li na.
Pu na ba jé Siyɔn ni ni fundanga sipyaa ni.
Fundanga tɛhɛnɛ baa wogo na ba dɔ pu ɲuyɔ ni.
Fundanga ni lotaan na ba pu ɲuŋɔ círi.
Ɲatanhaŋa ni shiinnɛ li na ba xhɔ.
Kilɛ wu ɲɛ wu sipyii pu wo tadaŋa
12 «Nɛ wi, nɛ wʼa loɲinɛ kaan yee mu.
Ɲaha na yee di fyagi sipyiyawyii na wɛ,
lee lemu lʼa xhuli ge, lee lemu li ɲɛ ba ɲà ɲɛ-ɛ ge?
13 A go yee funŋɔ kʼa wɔ mɛ Tɛhɛnɛ Baa Kilɛ na,
wee wemu wʼa yee da ge,
wee wemu wʼa fugba wu pii, na ɲiŋɛ ki sin ge!
Yee wa na jɛlɛ gbee ɲiga bɛɛri
yi ɲaavɛɛ pu wo loyire niguunɔ li ɲaha na,
pee piimu pʼa gbegele pʼi yi kyɛɛgi ge.
Wee tuun wu ni, a yee wo ɲaavɛɛ pu wo loyire niguunɔ lʼi gori mii wɛ?
14 Jɛɛrɛ yɛ funŋɔ ni kasolemɛɛ pʼa da voro kaso wu ni.
Pu wa da xhuu kaso wu ni wɛ.
Yalige wa da ba pu xuuŋɔ nige wɛ.
15 Nɛ wu ɲɛ Tɛhɛnɛ Baa Kilɛ we,
yee wo Kilɛ we,
wee wemu wʼa ma suumɔ lɔhɔ ki pye
ki na lokuruyo yirige, na tunmɔ pyi ge.
Nɛ mɛgɛ ki ɲɛ Kashɛn Keye yi Fɔɔ, Tɛhɛnɛ Baa Kilɛ.
16 Nɛ na jomɔ pu le ma ɲɔ ki ni,
na na keŋɛ ki ɲimɛ pu tɔ ma na.
Nɛ wʼa fugba wu pii, na ɲiŋɛ ki sin,
na Siyɔn pye: ‹Mu wu ɲɛ nɛ wo shi we.›»
Kilɛ na ba Zheruzalɛmu kulo li yereŋɛvonɔ yereŋɛ
17 Ta yìri Zheruzalɛmu ta yiri! Yìri yere!
Mu wemu mu Tɛhɛnɛ Baa Kilɛ ya wu loyire cɛɛgbuu li kan mʼa gba ge!
Mu ya cɛɛgbuu li ɲawɔhɔ ki bɛɛri gba
fo na shɛ nɔ li fɛrɛyɛ yi na.c
18 Nagoo piimu bɛɛri mu ya ta ge,
nigin bɛ ya ta pu ni wu ma ɲaha co wɛ.
Nagoo piimu bɛɛri mu ya bii ge,
nigin bɛ ya ta pu ni wu ma co keŋɛ na wɛ.
19 Kapegee tɛhɛɛ shuun wʼa to ma ɲuŋɔ ni.
Jɔgɔ ni ma ɲiɲaara di wa da ba jé wɛ?
Kakara ni bɔɔngɔ, xuugo ni ŋmɔpara li wa yi fɛni.
Jɔgɔ wʼi da ba ma luu ɲiŋɛ wɛ?
20 Ma nagoo pu fanha baa wuu nidoyo yi wa kakuutoroyo yi ni,
ma na jo ba jɔ ma sɔ co mɛ wɛ.
Tɛhɛnɛ Baa Kilɛ wo loyire li wa pu ɲuŋɔ ni.
Ma Kilɛ wu wo jaagi wʼa to pu ɲuŋɔ ni.
21 Lee wuu na, mu wemu wʼa ɲaani ge,
mu wemu wʼa figi ɲawɔhɔ keŋɛ ni,
kemu ɲɛ duvɛn wogo-e ge, logo na ɲɔ na nimɛ.
22 Ma Kafɔɔ we, Tɛhɛnɛ Baa Kilɛ, ma Kilɛ we,
wee wemu wʼa yogo yu wu sipyii pu kaa na ge,
yemu wee ya jo ge, yee yi wa mɛ:
«ɲawɔhɔ cɛɛgbuu le li wa ma keŋɛ ki ni ge,
nɛ li wolo ma keŋɛ ki ni.
Ma da gba nige nɛ wo loyire li cɛɛgbuu li ni wɛ.
23 Piimu pʼa yi kana ge, nɛ na ba li le pee keŋɛ ni,
pee piimu pʼa bi ma pyi ge na:
‹Yi buri ɲiŋɛ ke na, wù ɲaari toro yi ɲuŋɔ ni!›
Wee tuun wu ni mu bi ma kadogo ki kan pu mu na pye ba ɲiŋɛ ɲɛ wɛ,
ba koo ɲɛ mɛ kodooloo mu wɛ.»