Kilɛ ya Zheruzalɛmu shɔ
52
Ta yìri, Siyɔn ta yìri!Ma yatɛnyɛ yi waha!
Zheruzalɛmu kulo, fɛfɛɛrɛ kulo le,
ma fazaaya yi lɔ le!
Bani cekɔnbaa ni fɛfɛɛrɛ baa fɔɔ wa shishiin wa da ba jé nige ma ni wɛ.a
2 Yìri Zheruzalɛmu, mʼa kafunnuŋɔ ki pɔ laha mayɛ na,
ma ba diin ma tatɛɛngɛ ki ni.
Mu Siyɔn wemu pʼa co ge,
pɔɔrɔ ti kɔn wolo ma katige ki ni.
3 Bani yemu Tɛhɛnɛ Baa Kilɛ ya jo ge, yee yi wa mɛ: «Mamama ni pʼa yee pɛrɛ, yee ɲuŋɔ na ba wolo wari baa.» 4 Bani yemu Kafɔɔ Tɛhɛnɛ Baa Kilɛ ya jo ge, yee yi wa mɛ: «Ɲɔkɔɔnrɔ ti na, Misira fiige ki ni nɛ wo sipyii pʼa fɛnhɛ shɛ dɛɛn nadadɛɛnrɛ na. Lee kadugo na a Asiri shɛɛn di ba pu le kanhama ni gbɛrigbɛri ɲuŋɔ tàan. 5 Ayiwa, nɛ ma lekɛ pye nimɛ wɛ?» Tɛhɛnɛ Baa Kilɛ wʼa yu mu. «Mamama ni pʼa nɛ sipyii pu co kari. Pu covɛɛ pu wa na setaara mujoŋɔɔ waa.» Tɛhɛnɛ Baa Kilɛ wʼa jo mu. «Na mɛgɛ ki wa na gyɛɛgi ɲiga bɛɛri.b 6 Lee wuu na, nɛ sipyii pu na ba nɛ mɛgɛ ki cɛ. Pu na ba li cɛ kee caŋa na nɛ wʼa yu na: ‹Nɛ we!›»
Ɲuwuuro ti wo yɛrɛ le
7 Piimu pʼa ma ni Jozaama pu ni ge,
pee pama ya ɲɔ faaboboyo yi na.
Pee wa ɲaɲiŋɛ ki wo jomɔ pu yu,
na fɛrɛmɛ jomɔ pu yu,
na ɲuwuuro jomɔ pu yu, na Siyɔn pyi:
«Ma Kilɛ wu wa saanra ti na.»c
8 Yee kulo li kasɛɛgɛ pyevɛɛ pu mujoŋɔɔ ki wa kiiri.
Pʼa mujoŋɔɔ waa,
na fundanga mujoŋɔɔ pinnɛɛ na waa.
Bani pʼa li ɲa pu ɲìi ki na
na Tɛhɛnɛ Baa Kilɛ ya kuri na ma ba jé Siyɔn kulo li ni.
9 Zheruzalɛmu katahaya,
yʼa fundanga mujoŋɔɔ waa shiizhan!
Bani Tɛhɛnɛ Baa Kilɛ ya loɲinɛ kan wu sipyii pu mu,
na Zheruzalɛmu ɲuŋɔ wolo.
10 Tɛhɛnɛ Baa Kilɛ ya wu sefɛɛrɛ fɛfɛɛrɛ wuuro ti shɛ
shi wu bɛɛri ɲaha tàan.
Ɲiŋɛ ki tɛhɛnɛ li shɛɛn pu bɛɛri
na ba wèe wo Kilɛ wu wo ɲuwuuro ti ɲa.
Kilɛ na ba wu sipyii pu yeege Babilɔni ni
11 Yʼa se! Yʼa se! Yi foro naha!
Yi ganha bu gbɔn fɛfɛɛrɛ baa yaaga ka shishiin na wɛ.
Yee piimu pʼa Tɛhɛnɛ Baa Kilɛ wo pɛɛŋɛ yɛrɛyɛ yi luu ge,
yi yiyɛ pye fɛɛfɛɛ!d Yi foro Babilɔni ni!
12 Yi ganha bu gburogi voro tɔvuyo na wɛ.
Yi ganha ba fogolo da ɲaari ba kanfɛmɛɛ ɲɛ wɛ.
Bani Tɛhɛnɛ Baa Kilɛ wʼa da ba yee ɲaha co,
Izirayɛli wo Kilɛ wu na yi nɔhɔ tɔ na gaaŋi.
Tɛhɛnɛ Baa Kilɛ wo kapyebye nizaama we
13 «Li wii, nɛ wo kapyebye wu wo
labye wu na ba ɲaha ta.
Wu na ba durogo fo fugba wu ni,
wu na ba pɛɛŋɛ ta xuuni.
14 Wu ɲɛɲaa lʼa sipyiɲɛhɛmɛɛ cɔnri pu funyɔ ni.
Bani wu ɲaha ki bi ɲɛri foro sipyii wogo tàan.
Wu ɲɛwiinɛ li bi ɲɛri foro sipyiyawyii wuu tàan.
15 Lee pyeganunɔ li na wu da ba bye kakanhana
sipyiɲɛhɛmɛɛ mu.
Jomɔ na ba xhɔ saannaa ɲɔ na wu ɲaha tàan.
Bani lemu sanha jo ɲa pu mu wɛ, pu na ba lee ɲa.
Pu sanha lemu logo ɲa wɛ, pu na ba lee ɲaha cɛ.»