53
Yemu yʼa jo wèe mu ge, jɔgɔ wʼa dà yi na wɛ?Jɔgɔ na Tɛhɛnɛ Baa Kilɛ dʼa wu sefɛɛrɛ ti shɛ wɛ?a
2 Wʼa lɛ Tɛhɛnɛ Baa Kilɛ ɲaha tàan ba maraa ɲɛ wɛ,
ba tige ɲɛ wɛ kemu ya fin na foro ɲiwaga na ge.
Wu bye saana fɔɔ wɛ, ɲafɛ bye wu na
wèe pu ta wʼà wu wii wɛ.
Wu ɲɛwiinɛ li bye ni tasaaŋa ka shishiin ni,
wù ɲii li ta foro wu fɛni wɛ.
3 Sipyii pʼa wu fanha, na zhe wu ni.
Sɛɛtanhaŋa fɔɔ wu bye wii,
wu ni kanhama pu bye puyɛ na.
Sipya wemu ɲaha na sipyii ya pu ɲaha tɔni ge,
wu bye ba wee wa ɲɛ wɛ.
Pʼa bi wu fanri, wèe bi wii wu yíri wɛ.
4 Na li ta bɛ,
wèe wo kanhama tàan wʼa wu ɲuŋɔ le,
wèe wo yama tàan wʼa ɲuŋɔ le.
A wèe di ganha na giin na gɔɔrɔ pʼa wolo wu na,
na Kilɛ wʼa wu kpɔn, na wu tirige.b
5 Ga wèe wo jurumu wu wuu na wʼa su firi.
Wèe wo tiibaara ti wuu na wʼa tɔnhɔnɔ.
Tɔɔri wemu wu da ɲaɲiŋɛ nɔ wèe na ge,
wee wʼa to wu ɲuŋɔ ni.
Nɔɔyɔ yemu yʼa kɔn wu na ge,
yee baraga ni wèe ya cuuŋɔ.
6 Wèe bɛɛri pu bi ɲaari wùyɛ ɲuŋɔ fɛni
ba dubyaa ɲɛ wɛ.
Wa bɛɛri bi se wu ɲidaan xuu ni.
Ga a Tɛhɛnɛ Baa Kilɛ di wèe bɛɛri wo
tiibaara ti shan wu ɲuŋɔ ni.c
7 Pʼa kanhama wo wu na, a wu lee xu wuyɛ ni
wu ya yaaga jo wɛ.
Wu bye ba dubya ɲɛ wɛ,
pʼa wemu co na se zhɛ gbo ge,
ba dubyashɔ ɲɛ wɛ,
wemu wʼa co wuyɛ na, pʼi wu shiire kɔɔn ge.
Wu ya yaaga jo wɛ.d
8 Fanha na pʼa wu co,
na wu kiiri kɔn.
Lee tɛɛ li wo sipyii pu ni, jɔgɔ wu bi wu funŋɔ shaa pu ni,
na wu wo sipyii pu wo jurumu wu wuu na
pʼa wu niŋɛ wolo ɲiŋɛ ki sipyii pu ni, na wu gbo wɛ?e
9 Sipyikuuyo wo faya yi tɛ ni pʼa wu faŋa ki kɔn.
Naafuu fɛɛ wo xuu taleŋɛ ni pʼa wu nixhugo ki le,
na ta wu ya kakuunɔ pye wɛ,
nafaanra jomɔ pa shishiin di ya foro wu ɲɔ ni wɛ.f
10 Ga Tɛhɛnɛ Baa Kilɛ wo ɲidaan wu bye
na kanhama taga wu tɔnhɔnɔ.
Wu bu wu munaa li kan na pye jurumu yafa wo
yaaŋa ki wo saraga,
wu kadugo shi nibama wu na ba ɲɛhɛ,
la ma fara wu shi wu caya yi na.
Wee keŋɛ fɛni Tɛhɛnɛ Baa Kilɛ wo
ɲidaan wu ɲɔ da ba fa.
11 Wu wo kanhama pu bɛɛri ba doro ɲɛri,
wu na ba ɲiifɛɛrɛ ti wo kpɛɛngɛ ki ɲa sanha,
fo na wu funŋɔ ɲiŋɛ.
Nɛ wo kapyebye we, tiimɛ fɔɔ we,
wu na ba sipyiɲɛhɛmɛɛ pye tiimɛ fɛɛ,
na dugo pu wo tiibaara ti tàan.
12 Lee wuu na nʼa da ba wu taa kan wu mu
sipyigbɔɔ pu niŋɛ ni.
Wu ni mɛgbɔhɔ fɛɛ pu na ba naafuu wu taa taa puyɛ na,
bani wʼa wuyɛ kan na xhu,
a pʼi wu tɔrɔ le kakuubyii ni,
na ta wu da wu ɲuŋɔ le sipyiɲɛhɛmɛɛ wo jurumu tàan,
na ɲɛ kakuubyii wo susuro tɛgɛ vɔɔ.g