Zheruzalɛmu na ba bye sanha Kilɛ wo kulo le
54
«Seganha we, ta fundanga sipyaa waa,mu wemu wu ɲɛ mu ya pya se ɲa-ɛ ge!
Ta fundanga ciire cee, ma da xhuulo,
mu wemu wu ɲɛ mu ya laa yama cɛ-ɛ ge!
Bani cee wemu ni pʼa foro ge,
wee wo nagoo pu na ba ɲɛhɛ na toro wewu tàan
wee wemu wu ɲɛ ni ná wu ni ge.a»
Tɛhɛnɛ Baa Kilɛ wʼa jo mu.
2 «Ma fàya puga ki funŋɔ ki pɛlɛ,
mʼa fàya puga ki fàya yi pii yʼi tagbɔhɔ lɔ,
ma ganha bu ɲɛtogoo le lee ni wɛ!
Mɛɛrɛ ti kile shɛ fo taliige ni,
mʼa sikaŋaa ki kemɛ kori!
3 Bani ma nagoo pu na ba ɲɛhɛ,
na jaaga kari xuu wu bɛɛri ni.
Ma kadugo shi nibama wu na ba
shi niɲɛhɛmɛ wa wo ɲiŋɛ co na pye pu wogo,
na diin diin pu kulogoo ki ni,
kee kiimu ki bye sipyii baa ge.
4 «Ma ganha ba fyagi wɛ, bani ma da ba zhiige wɛ.
Ma fungɔngɔ ki ganha bu wuregi wɛ,
bani ma ɲuŋɔ wa da ba sogi wɛ.
Shiige kemu kʼa ma ta ma lɛvɛɛrɛ ti tuun wu ni ge,
ma funŋɔ na ba wɔ kee na.
Ma funŋɔ wa da ba do nige
ni ma naxhugoshagara ti wo fanhara ti ni wɛ.
5 Bani wemu wʼa mu da ge, wee wu ɲɛ ma poo we.
Wu mɛgɛ ki ɲɛ na Kashɛn Keye yi Fɔɔ Tɛhɛnɛ Baa Kilɛ.
Izirayɛli wo Fɛfɛɛrɛ wo we,
wee wu ɲɛ ma ɲuŋɔ wolovɔɔ.
Wu mɛgɛ ki ɲɛ: «Ɲiŋɛ ki bɛɛri wo Kilɛ we.»
6 «Tɛhɛnɛ Baa Kilɛ wʼa kuri na ma yiri,
kanna cee wemu ni pʼa foro a wu zɔ di danha ge.
Ná ya cee wemu lɔ wu lɛvɛɛrɛ tuun wu ni ge,
ta wu na já wee wa?» Ma Kilɛ wu wʼa jo mu.
7 «Tɛɛrɛ nifɛnhɛfɛnhɛnɛ yɛ funŋɔ ni nɛ bi she ma ni.
Ga nɛ na ba ma kɛmɛ ni ɲiɲaara nigbɔɔrɔ ni.
8 Nɛ luu lʼa bi yìri fo xuuni ma tàan,
a nɛ ɲaha lɔ ma tàan tɛɛrɛ funŋɔ ni.
Ga na wo saama nixhɔbaama pu wuu na
nʼa da ba ɲuŋɔ ɲaari ma na.»
Tɛhɛnɛ Baa Kilɛ ma ɲuŋɔ wolovɔɔ wu wʼa jo mu.
9 «Lemu nɛ pye Nuxhun wo caŋa ɲii li ni ge,
lee shi nʼa da ba bye niɲaa:
Nɛ bi kaa jo Nuxhun wo logbɔhɔ ki ɲɔhɔ da ga
ɲiŋɛ ki tɔ nige wɛ.
Lee kaagana li na nɛ kaa sanha jo
nɛ da ga luu yirige nige ma tàan wɛ,
nʼa da ga ma fuguri nige wɛ.b
10 Ali faaboboyo yi mɛhɛ laha yi tatɛɛnyɛ ni,
ali yaŋaboyo yi mɛhɛ ba figi figi bɛ,
nɛ wo saama pʼa da ga laha ma shizhaa na wɛ,
nɛ wo ɲaɲiŋɛ kariɲɛɛgɛ ɲɔmɛɛ li bɛ wa da ga figi wɛ.
Tɛhɛnɛ Baa Kilɛ wʼa jo mu,
wee wemu wʼa ɲuŋɔ ɲaari ma na ge.
Zheruzalɛmufomɔ wu wo nɔɔrɔ we
11 «Ee, Zheruzalɛmu,
mu wemu wʼa kanha ge,
zanha kafɛɛgɛ ya ma ɲaha nɔhɔ,
ali sipya bɛ ya ta
wu loɲinɛ kan ma mu wɛ.
Li wii, nʼa da ba pɛɛwa kagereye taga ma yereŋɛ.
Nɛ na ba safiiri kagereye taga ma ɲidaa li yàa.
12 Nɛ na ba ma kasɔrɔyɔ yi fugba wu yàa
ni urubi kagereye ni,
na ma gburaya yi yàa ni ɛsikaribuli kagereye ni,
na ma maha maha kasɔrɔgɔ ki yereŋɛ
ni pɛɛwa kagereye ya bɛ ni.c
13 «Tɛhɛnɛ Baa Kilɛ na ba ma nagoo pu bɛɛri kalaa.
Ma nagoo pu ɲaɲiŋɛ ki na ba bɛlɛ.d
14 Ma na ba fanha ta tiimɛ ni.
Ma na ba shɔ sipyiire ti wo ɲaa wu na.
Fyaara da ba bye ma ni nige wɛ.
Ma na ba shɔ funbɛnkeree ki na,
kee sanha na ba lii ma na.
15 Pu bu shɛ do ma na, lee wa da bye nɛ kabee wɛ.
Sipya bɛɛri wʼa jo wu do ma na ge, wee na ba do ma fɛɛ ni.
16 «Tudun wu ma toŋɔ fɔ,
na yagboŋɔ yàa labye wa kaa na ge, nɛ wʼa wu da.
Wemu wu da ba kee yagboŋɔ ki kyɛɛgi ge, nɛ wee bɛ da.
17 Kashɛn yagboŋɔ bɛɛri kʼa yàa ma kaa na ge,
kee wa da yaaga ɲɔ wɛ.
Sipya bɛɛri wʼa jo wu tigire taha ma na kiiri ni ge,
jaagi na ba do weefɔɔ ɲuŋɔ ni.
Lee li wa Tɛhɛnɛ Baa Kilɛ wo kapyebyii pu wo cɛn we.
Lee kangana li na nɛ kaɲii kaan pu mu.»
Tɛhɛnɛ Baa Kilɛ wʼa jo mu.