Mamama ni Kilɛ ya wu wo saama pu pyi
55
«Waga wa yee piimu bɛɛri na ge, yi pa lɔhɔ ki mu,ali yee piimu bɛɛri pu ɲɛ wari baa ge!
Yi pa, yʼi ba shɔ yʼi li!
Yi pa yʼi ba duvɛn ni nujirimɛ shɔ
mamama ni, wari baa.a
2 Yaaga kemu ɲɛ yalige wɛ,
ɲaha na yee di wari leni kee ni wɛ?
Yaaga kemu ya dinni wɛ,
ɲaha na yee di yi cere kana kee fɛni wɛ?
Yi ɲuwegee shan yʼi logo na ɲɔ na,
kemu kʼa ɲɔ ge, yi na ba kee li.
Yi na ba yalidangaa li kiimu kaa ya taan yi ni ge.
3 Yi ɲuwegee shan, yʼi ba na mu!
Yi logo na ɲɔ na, kɔnhɔ yi ɲiifɛɛrɛ pye.
Nɛ na ba kariɲɛɛgɛ ɲɔmɛɛ lɔ yi mu
lemu na gori yaha gbee ge.
Ɲɔmɛɛ lemu nɛ lɔ Dawuda mu ge,
nɛ na ba lee ɲɔ fa yi mu.b
4 Nɛ bi wu pye sɛɛri sipyiire ti bɛɛri mu.
Nɛ bi wu pye ɲuŋɔfɔɔ ni fanhafɔɔ sipyiire ti ɲuŋɔ ni.
5 Li wii, shi wemu wu ɲɛ mu ya wu cɛ-ɛ ge,
ma na ba wee yiri.
Shi wemu wu ɲɛ wu ya ma cɛ-ɛ ge,
wee na ba baa ba ma mu.
Tɛhɛnɛ Baa Kilɛ wuu na pu da ba ba,
ma Kilɛ we, Izirayɛli wo fɛfɛɛrɛ wo we,
wee wemu wʼa ke baraga ke taha ma na ge.»
Kilɛ wo ɲɔmɛhɛɛ ki bɛɛri na ba fa
6 «Yʼa Tɛhɛnɛ Baa Kilɛ shaa wu taduun ni.
Yʼa wu yiri na wu yaha yi tàan.
7 Sipyikuuŋɔ di ki koo niguunɔ yaha.
Kakuubye di wu fungɔnkuuyɔ yi yaha,
wu guri pa Tɛhɛnɛ Baa Kilɛ mu, wee na ba ɲuŋɔ ɲaari wu na.
Wu guri pa wèe wo Kilɛ wu mu,
wee ya yafa pyi na ɲɛhɛŋi.
8 «Nɛ wo fungɔngɔ ke, ni yee wo fungɔngɔ ki ɲɛ nigin wɛ.
Yee wo korogoo kee ni nɛ wo korogoo ki ɲɛ nigin wɛ.»
Tɛhɛnɛ Baa Kilɛ wʼa jo mu.
9 «Ba fugba we ni ɲiŋɛ ke ya lii yiyɛ na mɛ wɛ,
mu na nɛ wo korogoo ki wa yee wogoo ki fugba wu ni,
a nɛ wo fungɔngɔ ki bɛ di bye yee woyo yi fugba wu ni.
10 «Zanha ni nɛzhi ya yìri fugba we ni na dun.
Yi ya guroo na duri fugba wu ni na ta yi ya ɲiŋɛ ki kan lɔhɔ,
na shinma wu fin, na wu lɛ,
na nuguzhi kan yenugumɔ wu mu,
na yalige kan lilii pu mu wɛ.c
11 Jomɔ pe pʼa fòro nɛ ɲɔ ni ge, mu na pee bɛ ɲɛ.
Pu da ga guri ba nɛ mu lapyebaa wɛ.
Lemu lʼa taan nɛ mu ge, lee pu da bye.
Lemu na nɛ pu tun shɛ ge, pu da lee ɲɔ fa.
12 «Oo dɛ, yi fundangbɔhɔ wuu na ba foro na gaaŋi.
Yi ɲaha na ba jo na kari ɲaɲiŋɛ na.
Faaboboyo ye ni yaŋaboyo yi na ba fundanga sipyaa waa
yi ɲahagbaa na.
Sige ki tiire ti bɛɛri na ba kadahara kpɔɔn.d
13 Sipɛrɛ tiire na ba fin xhuyo tɛgɛ ni.
Miritee tiire na ba fin xhuyo tiriye tɛgɛ ni.
Lee na ba pɛɛŋɛ taha Tɛhɛnɛ Baa Kilɛ mɛgɛ na,
na bye fɛ nixhɔbaama pemu da ga biin bada wɛ.»