Kilɛ pɛɛŋɛ pugbɔhɔ ki na ba bye koŋɔ ki bɛɛri wo Kilɛ-ɲɛrɛgɛ puga
56
Yemu Tɛhɛnɛ Baa Kilɛ ya yu ge, yee yi wa mɛ:«Kaa lemu lʼa saha ge, yʼa lee pyi.
Kaa lemu lʼa tii ge, yʼa lee pyi.
Bani nɛ wo ɲuwuuro ti wo tuun wʼa nɔ xɔ.
Nɛ wo tiimɛ pu shɛduun wʼa nɔ xɔ.
2 Sipya wemu wʼa lee koo li ɲaari ge,
sipyiyawyii lemu lʼa lee co xuuni,
na wu fungɔngɔ yaha cadɛɛngɛ ki na,
na bye wu ya ki katanhaŋaa pyi-i,
na wuyɛ co kakuuŋɔɔ tuuyo bɛɛri tàan ge,
weefɔɔ ɲɛ duba pya.»
3 Fiige katii shɛn wemu wʼa wuyɛ pɔ
Tɛhɛnɛ Baa Kilɛ na ge, wee ganha ba yu wɛ na:
«Nakaara baa Tɛhɛnɛ Baa Kilɛ na ba
nɛ niŋɛ kɔn wolo wu sipyii pu ni!»
Ná wemu ya foro namaa ni ge,
wee ganha ba yu na tiwaga wee ɲɛ wɛ!
4 Bani yemu Tɛhɛnɛ Baa Kilɛ ya jo ge, yee yi wa mɛ:
«Namaa piimu pʼa foro namaa ni ge,
piimu pʼa nɛ wo cadɛɛngɛ ki wo kodorogoo ki ɲaari,
na nɛ wo ɲidaan wu shɔɔnri lɔ,
na gori yaha nɛ wo kariɲɛɛgɛ ɲɔmɛɛ li na ge,
5 nɛ na ba fundogo yaaga ka yàa pu mu
na wo pɛɛŋɛ pugbɔhɔ ki ni, na kasɔrɔyɔ yi na,
na mɛgɛ nigbɔhɔ kan pu mu
kemu ya ye jalaa ni pushaa na ge.
Nɛ na ba mɛgɛ kan pu mu
kemu na ba gori yaha gbee ge, ki da ga biin bada wɛ.
6 «Fiiye yatii shɛɛn piimu bɛ
pʼa puyɛ pɔ Tɛhɛnɛ Baa Kilɛ na,
na labye pyi wu mu, wu mɛgɛ kʼi dan pu ni
a pʼi ɲɛri pye wu kapyebyii ge,
pee piimu bɛɛri pʼa cadɛɛngɛ ki kodorogoo ki ɲaari,
na puyɛ co ki tanhaŋa keree ki tàan,
na gori yaha nɛ wo kariɲɛɛgɛ ɲɔmɛɛ li na ge,
7 nɛ na ba shɛ ni pee ni na wo fɛfɛɛrɛ faaboboŋɔ ki na,
na pu ɲi fundanga na na wo ɲɛrɛgɛ puga ki ni.
Saraya nizogoyo ni saraya yemusaya pʼa wo
nɛ wo saraya yi tawologo ki ni ge, nɛ na ba yee bɛ shuu.
Bani nɛ puga ki na ba yiri:
‹Shi wu bɛɛri wo Kilɛ-pɛɛgɛ puga.›a
8 Pʼa Izirayɛli nagoo piimu co kari tɛyɛ ya ni ge,
Kafɔɔ Kilɛ, Tɛhɛnɛ Baa wo wemu
wʼa pu pinnɛ tanugo ni ge, wee ya jo:
‹Piimu nɛ pinnɛ xɔ ge,
nɛ na ba pii bɛ pinnɛ na fara pee na.›»
Kilɛ ya jaagi shan Izirayɛli ɲahagbaa fɛɛ pu na
9 «Sige yaŋmuyɔ ye, yi bɛɛri pu pa yʼi ba li,
yee sige yacoyo yi bɛɛri!
10 Izirayɛli wo ɲahagbaacomɔɔ
pu bɛɛri pu ɲɛ fyɛnmɛɛ. Pu ya yafiin bɛ cɛ wɛ.
Pu ɲɛ ba puun ɲɛ wɛ, piimu pu ɲɛ boboo ge,
pu ya já mɛhɛɛ su wɛ.
Pu ma sinnɛ na ŋmunuyɔ ŋmunɔɔ,
ŋmunumɔ pʼa dan pu ni.
11 Laara puun pu ɲɛ pii, pu ya dinni wɛ.
Yatɔɔnahamaa pu ɲɛ pii piimu ya yaaga cɛ wɛ.
Pu bɛɛri pʼa se pu ɲidaan tashɛyɛ ni.
Wa bɛɛri wʼa wuyɛ wo kuduun shaa.
12 Pu jomɔ pu ɲɛ na: «Yi pa, di shɛ duvɛn wa sha,
wù ba kafugo yagbaya gba!
Wu na ba niɲaa wuu li shi pye ɲiga bɛ na,
bani niɲɛhɛmɛ wʼa kori sanha!»