Kilɛ ya Izirayɛli nagoo pu jaagi pu yapɛɛgaan li na
57
Sipya wemu wʼa tii ge, wee ya xhuli,sipya di ya wu funŋɔ shaa ni lee ni wɛ.
Sipyicemɛɛ pu wa xhuli, ga sipya bɛ ya li cɛ,
na piimu pʼa tii ge, na pee ya xhuli
kɔnhɔ pʼi shɔ bɔɔngɔ na wɛa.
2 Pu na ba jé ɲaɲiŋɛ ni.
Piimu pʼa tiimɛ koo li ɲaari ge,
pee na ba ŋmɔni pu tasinniyɛ nib.
3 Ga yee pi ge, yi fulo naha,
sigaanfezhɔ nagoo, dɔdɔ navaragaa!
4 Jɔgɔ la yʼi wa wo wɛ?
Jɔgɔ na yʼi wa ɲɔ pahani na waa, na ɲilee taga na wu la wo wɛ?
Yee kafinɛjuu piiri, ta nʼa she fɛɛ bɛ yee ɲɛ wɛ?
5 Ta yapɛrɛɛ dɔdɔɔrɔ bɛ yee wa byi
tigbɔyɔ ye ni titɔyɔ yi nɔhɔ ni,
na yi nɔhɔpiire wo saraya duyo ɲɔ na, ni faaya wegeye ni wɛ?
6 Duyo yi wo faapinŋɛɛ kiimu kʼa wɔɔgɔ ge,
yee wa kee pɛlɛ, kee ki ɲɛ yee wo tahaa kee.
Yee wa kee kaan, na yi wo saraya niwoyo yi woni ki na.
Nɛ na já loɲinɛ ta dii kii keree kii bɛɛri ni wɛ?
7 Faaboboyo yemu yʼa tɔnnɔ ge,
yee fugba ni yee wa yi yasinniyɛ yi shaanc,
yee fugba ni bɛ yee wa duri na saraya wo.
8 Yee wa yi yapɛrɛɛ ki tɛri gburaya ye ni gbeetiriye yi na.
Yee ya ŋmɔhɔ nɛ na, na yi fàya yi wolo,
na dugi yi yasinniyɛ yi na, na yi yasinniyɛ yi kadaa li pɛlɛ,
na piitiilee ta, na ganha na gari ni pee ni.
Pee wo tasinnɛgɛ ki kaa lʼa dan yi ni, a yʼi ganha na pu wii.
9 Yee wa se Molɔkid yìri ni sìnmɛ ni,
na yi nudanga sìnmɛ pu ɲɛhɛŋi.
Yee wa yi tudunmɔɔ pu tunni na se fo taliige ni,
na pu pyi pu na diri na se fo xuu kulo ni.
10 Yee ya ɲaari fo na kanha, ga yee di ya ta jo wɛ na:
«Le wa yaaga ɲɔgi wɛ!»
A yee di dɛrɛ fanha ta sanha,
lee lʼa yee pye yee ya ganha cɛ wɛ.
11 Wee tuun wu ni jɔgɔ na yi bi fyagi wɛ?
Jɔgɔ wu bi funbɛɛrɛ leŋɛɛ yi ni, a yʼi na nɔhɔ yaha,
na bye yi funŋɔ ya to na na wɛ, yi wa yi funŋɔ sha ni na kaa ni-i wɛ?
Nɛ cari nayɛ na fo cadɔɔngɔ na ge, lee na gɛ?
Go lee lʼa nɛ ɲiifyaara pye ti ɲɛ nige yee ni wɛ.
12 Ayiwa, nʼa da ba yee wo tiimɛ pe
ni yee wo kapyegee ki yeege kpɛɛngɛ na.
Kee di wa da ba yaaga ɲɔ yi na wɛ.
13 Yi ba ba sipyaa ɲɔ kɔn na waa tuun wemu ni,
yasunyɔ yemu yʼa faari yaha yiyɛ mu ge,
yʼi yee yiri, yee di ba yi shɔ!
Kafɛɛgɛ na ba yi bɛɛri lɔ.
Kafɛɛrɛ li da ba gari ni yi ni.
Ga sipya wemu wʼa pa lara nɛ fɛɛ ni ge,
weefɔɔ na ba fiige ki ta na pye wu cɛn.
Nɛ faaboboŋɔ fɛfɛɛrɛ wogo ki na ba bye wu wogo.
Kilɛ na ba ɲuŋɔ ɲaari wu sipyii pu na
14 Tɛhɛnɛ Baa Kilɛ na ba yu na:
«Yi koo gbɛri, yi koo gbɛri, yi koo yàa,
sipya na já guruŋɔ yaaga kemu bɛɛri na ge,
yi yee bɛɛri lɔ laha na sipyii pu koo li ni!»
15 Bani wemu wʼa tiin fugba liilii wu ni
gbee wo saanra koo li na, wu mɛgɛ kʼi ɲɛ fɛɛfɛɛ ge,
yemu wee ya jo ge, yee yi wa mɛ:
«Nɛ nidɛɛngɛ ki wa fugba lii lii wu ni, fɛfɛɛrɛ xuu wu ni,
ga na ɲɛ ni kanhama fɛɛ pu ni,
piimu pʼa puyɛ tirige ge, ni pee bɛ.
Piimu pʼa puyɛ tirige ge, kɔnhɔ di pee yirige,
di kanhama fɛɛ pu bɛ yirige.
16 Nɛ da ba jaagi pyi gbee wɛ,
nɛ da ba luu yirige yaha gbee wɛ.
Lee bɛ wɛ munahaa kii nɛ yàa ge,
kee fanha na ba xhɔ, kʼa gyɛɛgi laha na ɲaha tàan.»
17 «Pu ɲɛgbɔɔ li wuu na
nɛ luu ya yìri Izirayɛli nagoo pu tàan, na pu kpɔn.
Na wo loyire li funŋɔ ni nɛ nayɛ ŋmɔhɔ pu na.
Ga a pu sanha di ɲuŋɔ nari,
na ganha na se pu ɲidaan tɛgɛ ni.
18 Nɛ pu torogana li cɛ,
ga lee bɛ na, nʼa da ba pu cuuŋɔ.
Nɛ na ba pu ɲaha co, na loɲinɛ turi pu na,
pu ni pu sipyii piimu bɛɛri pu wa ni funyaŋa ki ni ge.
19 Nɛ na ba masɔŋɔ yoyo le pu ɲɔyɔ ni na:
‹Ɲaɲiŋɛ ni ɲaɲiŋɛ!›
Piimu pʼa lii ge, ni piimu pʼa tɛɛŋɛ ge,
pee bɛɛri na ba kee ta.»
Tɛhɛnɛ Baa Kilɛ wʼa jo mu. «Nɛ na ba pu cuuŋɔ!»e
20 Ga sipyikuuŋɔ ɲɛ ba suumɔ lɔhɔ ɲɛ wɛ
kemu kʼa dinni ge.
Ki ya já tiin tanugo ni wɛ.
Ki ma ɲɔrɔyɔ ni yakokaya yirige.
21 «Sipyikuuŋɔ kunni wa da ga ɲaɲiŋɛ ta bada wɛ!»
Tɛhɛnɛ Baa Kilɛ wʼa jo mu.