Suun wemu kʼa lʼa dan Kilɛ ni ge
58
A Tɛhɛnɛ Baa Kilɛ di jo:«Sipile wá ma fanha ɲuŋɔ kana li bɛɛri na,
ma ganha bu cari mayɛ na wɛ!
Ma mujuu li wá ba maga mɛɛ ɲɛ wɛ,
mʼa na sipyii pu wo saliya kyɛgɛrɛ ti shɛ pu na,
mʼa Yakuba wo tirige shɛɛn pu wo jurumu wu jo pu mu.
2 Ɲiga bɛɛri pu wa na nɛ shaa.
Pu funŋɔ ki wa pʼi nɛ wo kodorogoo ki cɛ,
ba shi wa ɲɛ mɛ wɛ, wemu ya tiimɛ koo ɲaari,
wʼi sanha wu Kilɛ wu wo tiimɛ pu yaha wɛ ge.
Kiiri wemu wʼa tii ge, wee pʼa zhaa nɛ mu.
Pu funŋɔ ki wa pʼi Kilɛ tɛɛŋɛ.
3 «Pʼa nɛ pyi na: ‹Ɲaha wèe wo suun wʼi ɲɔgi,
na ta mu jate di ya nɔni wu na-ɛ wɛ?
Wèe bu wùyɛ tirige, na ta mu di ya lee ɲaa wɛ,
lee kaɲuu wa lekɛ wɛ?›
Na ta yee di bu suun le caŋa kemu,
lemu lʼa yee tàan ge, yee ma ganha na lee pyi,
na yi fanha digi yi kapyebyii pu na.
4 Yee bu suun le, yee ma ganha na nakaara pyi,
na yoyo kɔɔn, na kagurupyaa niguuŋɔɔ leni yiyɛ ni.
Yee ya yaa na suun wu leni legana lemu na,
kɔnhɔ yee mujuu lʼi logo fugba wu ni ge,
yee ya suun wu leni lee legana li na niɲaa wɛ.
5 Sipya bu wuyɛ tirige caŋa kemu, na wu ɲuŋɔ sogi
ba wahagaan ɲɛ wɛ, na sinnɛ bɔrɔgɔ ɲuŋɔ ni shɔɔnrɔ ni,
ta lee yee wa byi suun we?
Ta wee suun wu tuugo kʼa dan nɛ ni?
Ta lee suun legana le li wa
Tɛhɛnɛ Baa Kilɛ wo ɲidaan wuu le?
6 «Suun legana lemu lʼa dan nɛ ni ge,
lee li wa mɛ: ‹Na tiibaara ti wo shɔnhɔyɔ yi kɔn,
na fanha ki wo zhuloo pu sanha laha sipyiire ti na,
na ɲaa fɛɛ pu wo ɲaa wu yereŋɛ,
na bulooro ti tuuyo yi bɛɛri yereŋɛ.
7 Na kuugo fɛɛ kaan yi yaligee ni.
Ɲaa fɛɛ piimu pu ɲɛ tashɔngɔ baa ge, na pee kemɛɛ
na leŋɛɛ yi piyɛyɛ ni, na fàya kaan fafunmɔ fɛɛ pu mu.
Yʼi ganha ba laraa yi cebooloo ɲaha na wɛ.
8 Lee bu bye, ma wo kpɛɛngɛ ki na ba fòro
ba ɲimuguŋɔ ɲɛ wɛ, mʼa juuŋɔ taapile ni.
Ma wo tiimɛ pu na ma ɲaha co,
Tɛhɛnɛ Baa Kilɛ wo nɔɔrɔ wu na daha ma fɛni,
na ma ɲuŋɔ sigee.
9 Ma ba yire pye, Tɛhɛnɛ Baa Kilɛ na ma ɲɔ shɔ.
Ma ba mɛkaaga wá wu mu, wu na ma pye: ‹Di we!›
Ma bu toɲɔ keree ki bɛɛri yaha fɛɛfɛɛ,
na sipyii pu wo jaagi wu yereŋɛ,
na kafilakuumɔ wu ɲɔ yereŋɛ,
10 yalige ke kʼa dan ma ni ge, ma ba xuugo fɔɔ kaan kee ni,
na ɲaa fɛɛ pu funŋɔ ɲiŋɛɛ,
ma wo kpɛɛngɛ ki na ba fòro nibiige ki ni.
Ma wo nibiige ki na ba ɲɛri ba cafugo ɲɛ wɛ.
11 Tɛhɛnɛ Baa Kilɛ na ba ma ɲaha co tuun bɛɛri ni.
Wu na ba ɲɔlige kaan ma mu ali lɔhɔ baa ɲiŋɛ bɛ na,
na baraga le ma ni.
Ma na ba bye ba loyɔa ɲɛ wɛ,
lɔhɔ ya leni wemu ni tuun bɛɛri ni ge.
Ma na ba bye ba lobulowii ɲɛ wɛ,
lemu lɔhɔ ya guu wɛ ge.
12 Ma sipyii pu na ba katahaya yi yereŋɛvonɔ yereŋɛ.
Pu na ba guri kasɔrɔyɔ yereŋɛ pulɛyɛ yi wo ɲidahaa ki na.
Pu na ba ma mɛgɛ yiri na: ‹Kapahaya tɔvɔɔ,
wemu wʼa korogoo ki yari kɔnhɔ fiige kʼi ja tiin ge.›»
Cadɛɛngɛ kemu kʼa dan Kilɛ ni ge
13 A Tɛhɛnɛ Baa Kilɛ di jo:
«Ma bu mayɛ co
cadɛɛngɛ ki wo katanhaŋaa ki bye tàan,
ma bu mayɛ pyaa ki wo laɲɔ keree ki yereŋɛ
kee caŋa ki na, kee kemu kʼa yaha nɛ yahama ni ge,
ma ba cadɛɛngɛ ki pyi ‹fundanga caŋa›,
ma ba cadɛɛngɛ ki wii Tɛhɛnɛ Baa Kilɛ wo
fɛfɛɛrɛ caŋa, na pɛɛŋɛ tɛri ki na,
ma bu zhe mayɛ pyaa ki wo ɲidaan keree ni,
na mayɛ pyaa ki wo laɲɔ keree ki yaha,
na ɲuŋɔ baa jomɔ pu ɲɔ yaha kee caŋa ki na,
14 wee tuun wu ni ma fundanga ki kaɲuŋɔ na ba bye
Tɛhɛnɛ Baa Kilɛ ni.
Nɛ na ba ma durugo faaboboyo yi ɲidegee ki ni,
na ma pye se tavɔɔ.
Nɛ na ba ma ɲɔ shaa ma sefɛlɛ Yakuba wo cɛn wu ni.»
Tɛhɛnɛ Baa Kilɛ wo ɲɔ ki kʼa jo mu.