Izirayɛli nagoo pu wo kapyegee niguuŋɔɔ kee
59
Ahayi dɛ, Tɛhɛnɛ Baa Kilɛ wo keŋɛ ki ya ta gberefo wu yee ɲuŋɔ wolo kanha wɛ.
Wu ɲuwegee ki bɛ ya ta gbere
fo wu logo kanha wɛ.
2 Ga yee wo tiibaara ti tʼa yee waa laha yi Kilɛ wu na.
Yee wo jurumu wʼa wu pye wʼa wu ɲaha ki ŋmɔhɔ yee na,
na bye wu ya gbara wu logo yee ɲɔ na wɛ.
3 Bani yee keye yʼa nɔrɔgɔ shishan na.
Yee kabɛhɛɛ kʼa nɔrɔgɔ katiibaagaa na.
Yee ɲɔyɔ yi wa kafinɛyɛ yu, yee ɲilee ki wa joguumɔ yu.
4 Wa shishiin ya wu sipyiɲii yiri kayuu na tifire kaa na wɛ.
Wa shishiin ya wu sipyiɲii jaagi can keree na wɛ.
Pu ma pu jomɔ pu nɔhɔ teŋɛ laaya na, na kafinɛyɛ cere.
Ma kuumɔ laa lɔ, na kakuunɔ se.
5 Matɔn cɛrɛɛ na pu ma guri, na kee ciri,
na bolofaangaa shin.
Wa bu lee cɛrɛ la xa, wufɔɔ na xhu.
Lee cɛrɛ la bu ja, matɔn na foro li ni.
6 Bolofaangaa kii pʼa zhin ge, kee ya já pye fàya wɛ,
kii ya já pye fatɔŋɔ bɛ wɛ, bɔɔngɔɔ ki ɲɛ ki fɛni.
Pu keye yʼa ɲi kapyeguuŋɔɔ na.
7 Kakuuŋɔɔ fɛni pʼa fe,
pu tɔrɔ dʼa wɛri jaagi baa fɔɔ shishan tawoŋɔ ni.
Kakuuŋɔɔ ki ɲɛ pu funzhakeree.
Kakara ni bɔɔngɔ pʼa yirige pu kodoronɔ nia.
8 Pu ya ɲaɲiŋɛ koo li cɛ wɛ.
Tiimɛ pa shishiin ɲɛ pu kodoronɔ ni wɛ.
Konahaya ni pʼa ɲaari.
Sipya bɛɛri wʼa pu kozhɛɛ lɔ ge, weefɔɔ ya ɲaɲiŋɛ taa wɛ.
Kilɛ wo sipyii pʼa yere pu jurumu wu na
9 Lee wuu na tiimɛ pu sanha ya lii wèe na.
Ɲuwuuro ti caŋa ya lii wèe na.
Wèe bi daa jo wù na kpɛɛngɛ ɲa, ga a piige di dɛrɛ pa.
Wèe bi daa jo wù na caŋa ki ɲa, ga na dɛrɛ na ɲaari nibiige ni.
10 Wèe wa daala daala kasɔrɔgɔ cɛ fɛni ba fyɛnmɛɛ ɲɛ wɛ.
Wèe wa daala daala ba ɲìi baa fɛɛ ɲɛ wɛ.
Wèe wa guruŋɔ cafugo na, ma na giin piige kʼa wɔ.
Wèe wa cuuŋɔ, ga na ɲɛ ba xuu ɲɛ wɛ.
11 Wèe wa guuri ba yacoŋɔb ɲɛ wɛ.
Wèe wa zhiin ba gbegbe shazhigaa ɲɛ wɛ.
Wèe bi tiimɛ pu ɲaha wii, ga yaaga bɛ wɛ!
Wèe bi ɲuwuuro ti ɲaha wii, ga a ti sanha di lii wèe na.
12 Wèe saliya kyɛɛgɛrɛ tʼa pɛlɛ ye ma ɲaha tàan.
Wèe jurumu wu wa wèe sɛɛrɛɛ wèe fɛni.
Wèe saliya kyɛɛgɛrɛ tʼa tara yaha wù na.
Wèe ya wu tiibaara ti cɛ.
13 Wèe ya Tɛhɛnɛ Baa Kilɛ ɲɔmɛɛ she,
na foro wu kaa tàan,
na wùyɛ sanha liigi Tɛhɛnɛ Baa Kilɛ na.
Tuun bɛɛri ni wèe ya fanhara jomɔ ni nʼa she jomɔ jo.
Lemu li ɲɛ wèe funyɔ ni ge, lemu wèe ya gɔɔn wù funyɔ ni ge,
yee bɛɛri ɲɛ kafinnɛyɛ
14 Lee wuu na tiimɛ pʼa kadugo le wèe ni,
a tifire ti sanha di lii wèe na.
Can wʼa kuruŋɔ pinnɛrɛ kpɛɛngɛ ki na.
Tiimɛ pu ya ta tajege ta wɛ.
15 Tifire tʼa piin,
sipya wemu wʼa laraga kɔɔn kakuuŋɔɔ na ge,
weefɔɔ na pʼa dun.
Kilɛ na ba yogo jo wu sipyii pu kaa na
Ba Tɛhɛnɛ Baa Kilɛ ya li ɲa na can ya yu nige-e wɛ,
a lee di bye li ya taan wu ni wɛ.
16 A wu li ɲa na shɛn nigin bɛ ɲɛ wà wɛ,
a lee di wu fo xuuni na jo shɛn nigin bɛ ya ta
di susuro tɛgɛ wɛ.
Wee tuun wu ni, a wuyɛ pyaa wo keŋɛ kʼi wu tɛgɛ,
a wu tiimɛ pʼi wu tɔhɔ.c
17 Wʼa tiimɛ pu le wuyɛ na ba tɔɔrɔ fadeŋɛ ɲɛ wɛ,
na ɲuwuuro ti tɔ ba tɔɔrɔ ɲudoŋɔ ɲɛ wɛ,
na wu loyire li goo wolo fàya yi le ba fadebire ɲɛ wɛ,
na wu kafugo ki le na pye wu fadegbɔhɔ.d
18 Wu na ba sipyii pu bɛɛri saraa
na yaa ni pu kapyegee ki ni.
Piimu pʼa dunni ni wu ni ge,
wu loyire niguunɔ li na ba bye pee wuu.
Wu pɛɛn pu ni lemu ya yaa ge,
wu na ba lee pye pu na.
Piimu pʼa yìri fo taliiye yi ni ge,
pee bɛ ni saraa wemu wʼa yaa ge,
wu na ba wee kan pu mu.
19 Lee funŋɔ ni, na co caŋatomɔ pu na,
fo na shɛ nɔ Kilɛ-nɔhɔ ki na,
sipyiire ti bɛɛri na ba fyagi Tɛhɛnɛ Baa Kilɛ wo mɛgɛ ki na,
na fyagi wu nɔɔrɔ wu na.
Bani wu na ba ba ba lofomɔ ɲɛ wɛ,
Tɛhɛnɛ Baa Kilɛ yɛpyaa wo
kafɛɛgɛ kʼa pemu ŋmunuŋɔ ge.e
20 «Wuyɛ pyaa ki na ba Siyɔn ɲuŋɔ wolo.
Yakuba wo sipyii piimu ba daajeŋɛ jo
pu saliya kyɛɛgɛrɛ ti na,
wu na ba pee ɲuŋɔ wolo.»
Tɛhɛnɛ Baa Kilɛ wʼa jo mu.f
21 A Tɛhɛnɛ Baa Kilɛ di jo: «Nɛ wi ge, kariɲɛɛgɛ ɲɔmɛɛ lemu nʼa da ba lɔ nɛ ni pu tɛ ni ge, lee li wa mɛ: Nɛ Munaa le li wa ma na, ni na jomɔ pemu nɛ le ma ɲɔ ki ni ge, yee wa da ba lii ma ɲɔ ki na wɛ, yʼi wa da ba lii ma nagoo pu wo ɲɔ ki na wɛ, yʼi wa da ba lii pee bɛ wo nagoo pu bɛ wo ɲɔ ki na wɛ, na co nimɛ na fo gbee.» Tɛhɛnɛ Baa Kilɛ wʼa jo mu.