Zheruzalɛmu kulo li wo nɔɔrɔ nivomɔ we
60
«Yìri Zheruzalɛmu, yìri ma da ɲí,bani ma wo kpɛɛngɛ kʼa nɔ,
Tɛhɛnɛ Baa Kilɛ wo nɔɔrɔ wʼa ɲí ma na.
2 Li wii, nibiige kʼa ɲiŋɛ ki tɔ,
nibiicogoŋɔ kʼa fiiye yatii shɛɛn pu tɔ.
Ga Tɛhɛnɛ Baa Kilɛ wo kpɛɛngɛ ki na ba ɲí ma mu.
Wu nɔɔrɔ wu na ba digi ma na.
3 Fiiye yatii shɛɛn pu na ba ɲaari na ma
mu wo kpɛɛngɛ ki na.
Saannaa pu na ba ɲaari na ma
mu wo ɲimuguŋɔ ki wo kpɛɛngɛ ki na.
4 «Ma ɲuŋɔ ki yirige, mʼa wii ma mahama pu bɛɛri ni.
Pu bɛɛri pʼa binnɛɛ, na ma ma mu.
Ma jalaa pʼa nɔni na yìri taliige ni.
Pʼa ma poro pushaa pu le pu kabanuyo yi ni na ma.
5 Ma ba lee ɲa, ma ɲaha ki na ba ɲí,
ma zɔ wu na ɲi fundanga na,
bani naafuu wu na ba doroo suumɔ lɔhɔ ki na, na ma ma mu.
Fiiye yatii shɛɛn pu wo naafuu wu na ba ba ma mu.
6 Ɲɔhɔyɔ niɲɛhɛyɛ na ba ma fiige ki bɛɛri tɔ,
Majan ni Efa wo ɲɔhɔyɔ kashɔyɔ yi kunni,
yee bɛɛri na ba na yìri Seba ni.
Yi na ba ba ni sanni ni nudanga yawurire ni,
yi na ba Tɛhɛnɛ Baa Kilɛ wo masɔŋɔ ki kaa jo caaga.
7 Kedari wo dubyagbaya ni sikagbaya yi na ba binnɛ ma yíri.
Nebayɔti wo dubyapee pu na ba yaha ma wo labye wu mɛgɛ na.
Pu na ba bye saraya nizogoyo nɛ wo saraya yi tawologo ki ni.
Nɛ na ba sɔɔ yee na.
Nɛ na ba nɔɔrɔ taha na puga nɔɔrɔ wogo ki na.
8 Jɔgɔ yɛ pu wa yìri mɛ fugba wu ni ba ɲahaya ɲɛ-ɛ wɛ,
ba gbegbe shazhɛɛrɛ ɲɛ-ɛ wɛ, temu ya se ti tashɔnyɔ ni ge?
9 Suumɔ lɔhɔ niŋɛ takpiiye yi sipyii pu wa nɛ pye pu tadaŋa.
Tarisisi wo kɔɔgbɔyɔ yʼa toro ɲahagbaa li na, na ma ni ma jalaa pu ni,
na yìri taliige fiiye yi ni, pu ni pu sanni we ni pu warifyɛn we.
Pu na ba pɛɛŋɛ taha Tɛhɛnɛ Baa Kilɛ, ma Kilɛ wu na,
Izirayɛli wo fɛfɛɛrɛ wo we,
wee wemu wʼa nɔɔrɔ taha ma na ge.
10 «Fiiye yatii wo sipyii pʼa da ba ma maha maha kasɔrɔyɔ yi yereŋɛ.
Yee fiiye ye wo saannaa pu na ba labye pyi ma mu.
Nɛ luu lʼa bi yìri ma tàan fo xuuni, a nɛ ma kpɔn.
Ga nimɛ, na saama pu wuu na nʼa da ba ɲuŋɔ ɲaari ma na.
11 Ma kulo li kuɲɔgɔɔ ki na ba mugi yaha tuun bɛɛri ni,
ki wa da ga dɔ caŋa ni kelee piige wɛ,
kɔnhɔ pʼi jé ni fiiye yatii wu wo naafuu wu ni ma fɛni,
ni pu saannaa pu bɛ, na pu tahala tahala puyɛ na.
12 «Bani shi wemu ni saanra temu ya sɔɔ
na kapyeŋɛɛ pyi ma mu wɛ, pee na gyɛɛgi,
wee shi wu na ba gyɛɛgi na wu xɔ fɛɛfɛɛ.
13 «Liban fiige ki nɔɔrɔ wu na ba ba ma mu:
wu sipɛrɛ tiire te, ni wu ɔrimi tiire te, ni wu buwi tiire ti bɛɛri.
Tee tiire te bɛɛri na ba daga ɲafɛ taha nɛ fɛfɛɛrɛ xuu wu na.
Lee tahagana li na nʼa da ba nɔɔrɔ taha
na tatɛɛngɛ ki na.
14 Piimu pʼa bi ɲaa woni ma na ge,
pee wo jalaa pu na ba leele ma fɛɛ ni.
Piimu bɛɛri pʼa ma fanha ge,
pee na ba nuguro sinni ma fɛɛ ni.
Pu na ba ma mɛgɛ yiri na:
«Tɛhɛnɛ Baa Kilɛ wo kulo le,
Izirayɛli wo Fɛfɛɛrɛ wo wu wo Siyɔn we».a
15 «Sipyiire tʼa bi kadugo le ma ni, na ma kɔ,
wa bi se ma yíri wɛ.
Ga nɛ na ba ɲuyirige da ma mu fo gbee,
na ma pye segee ki bɛɛri wo fundanga ki kaɲuŋɔ.
16 Ma na ba shi wu bɛɛri wo nujirimɛ pu gbuu,
na wu saannaa pu wo jireb li ŋmari.
Lee na ma da ba li cɛ na nɛ wu ɲɛ Tɛhɛnɛ Baa Kilɛ we,
ma Shɔvɔɔ we ni ma Ɲuŋɔ wolovɔɔ we,
Yakuba wo Sefɛɛrɛ ti bɛɛri fɔɔ we.
17 Nɛ na ba sanni kan ma mu daɲaa tɔɔrɔ wege ni,
na warifyɛn kan ma mu toowɔ wege ni,
na daɲaa tɔɔrɔ kan ma mu tiire wege ni,
na toowɔ kan ma mu faakagereye yi wege ni.
Nɛ na ba ɲaɲiŋɛ pye ma kasɛɛgɛ pyevɔɔ,
na tiimɛ pye ma ɲuŋɔfɔɔ.
18 Wa da ba fanhaɲɛhɛŋɛ keree kaa nuri nige ma fiige ki ni wɛ.
Kakara ni bɔɔngɔ keree da ba nuri nige
ma kodɛhɛŋɛɛ ki na wɛ.
Ma na ba ma maha maha kasɔrɔyɔ yi mɛgɛ yiri na
‹Ɲuwuuro› na ma kuɲɔgɔɔ ki mɛgɛ yiri na ‹Masɔŋɔ›.
19 Caŋa ke wa da ba bye nige ma mu kpɛɛngɛ caŋa ni wɛ.
Yeŋɛ losuu wʼa da ba bye nige ma mu kpɛɛngɛ piige ni wɛ.
Tɛhɛnɛ Baa Kilɛ wu da ba bye ma kpɛɛngɛ gbee.
Ma Kilɛ wu na ba bye ma wo nɔɔrɔ we. c
20 Mu wo caŋa ki wa da ga do ɲa wɛ,
ma wo yeŋɛ losuu lʼi wa da ga xhɔ ɲa wɛ.
Bani Tɛhɛnɛ Baa Kilɛ na ba bye ma mu kpɛɛngɛ tuun bɛɛri ni.
Ma wo yamɛsuu li na ba xhɔ.
21 «Ma sipyii pu bɛɛri na ba bye tiimɛfɛɛ.
Fiige ki kafɛɛrɛ na ba bye pu wuuro fo gbee.
Maalaa piimu nɛ nɔri ge, pee pu wa.
Nɛ wo keŋɛ fɛ pu ɲɛ pii, kɔnhɔ di na wo nɔɔrɔ wu shɛ.
22 Pu bɛɛri wo gbawege nifɛnhɛfɛnhɛnɛ li na ba
sipyii kabofɔnɔ nigi se.
Pu bɛɛri wo baraga baa fɔɔ wu na ba bye
shi baraga wo.
Kee keree kii faduun ba nɔ,
nɛ Tɛhɛnɛ Baa Kilɛ na ba kee pye tɔvuyo na na ki ɲɔ fa.