Kilɛ wo sipyii pu niguribawuu na foro bulooro ti ni
35
Siwaga ke ni waga ɲiŋɛ ke, yee yi funŋɔ taan!Kacaaga ki funŋɔ taan xuuni, kʼi fyɛɛnrɛ nizaara pye!
2 Ki sii fyɛɛnrɛ pye fo xuuni, kʼi da sirani,
kʼi da xhɔnhɔni, kʼi da fundanga sipyaa waa!
Liban wo faaboboŋɔ ki wo nɔɔrɔ wu na ba gan ki mu.
Karimɛli wo faaboboŋɔ ki wo saana le
ni Sarɔn wo fadaaŋa ko wo saana li na ba gan ki mu.
Pu na ba Tɛhɛnɛ Baa Kilɛ wo nɔɔrɔ wu ɲa,
pu na ba wèe wo Kilɛ wu wo saana li ɲa.
3 Keye yemu fanha kʼa xɔ ge, yi fanha le yee ni.
Nugunyɔ yemu yʼa jɛlɛ ge, yʼi lowaa le yee ni.a
4 Piimu wo jaalaa pʼa yìri yìri ge,
yʼi pee pye: «Yi yatɛnyɛ yi waha, yi ganha bu fya wɛ.
Yee wo Kilɛ wu we, wʼa da ba yee wo goo wu wolo,
na yee pɛɛn pu wo kakuuŋɔɔ ki foo tɔ pu mu.
Wuyɛ pyaa kʼa ma di ba yi shɔ.»
5 Wee tuun wu ni fyɛnmɛɛ ɲìi na ba mugi,
ɲudunnɔɔ na ganha na nuri.
6 Losiyaya fɛɛ ma ganha na sirani ba kaafalaa ɲɛ wɛ.
Boboo na ganha na fundanga sipyaa waa.
Can na, lɔhɔyɔ na ba jɛnri voro, na fuu siwaga ki ni.
Duyo na ba fuu kacaaga ki ni.b
7 Ɲiŋɛ ki gbagbafugo ki na ba ɲɛri na pye canga,
waga fiige ki ma ɲɛri lobulowegee fiige.
Ɲabunnɔɔ pʼa shuun xuu wemu ni ge,
fa ɲɔ waha ni paŋmo na ba fin wee xuu wu ni.
8 Kogbɔɔ la na ba doro fiige ki ni,
pu na ba lee koo li pyi na: «Fɛfɛɛrɛ koo».
Sipya wemu bɛɛri wu ɲɛ wu ɲɛ fɛɛfɛɛ wɛ ge,
weefɔɔ da ba já doro wà wɛ.
Kilɛ wo sipyii pu yɛ mu lʼa yaha.
Piimu pʼa doroo lee koo li ni ge,
wee wa shishiin da ga biin wɛ, ali wu pye nahanaha bɛ.
9 Cɛnri da ba bye wà wɛ,
sige yacoŋɔ ka shishiin da ba ɲaa lee koo li na wɛ.
Sipya da ga saha wà ni kee yacoŋɔ ka shi ni wɛ.
Kilɛ ya piimu ɲuŋɔ wolo ge,
pee pu da ba doroo lee koo li ni.
10 Tɛhɛnɛ Baa Kilɛ ya piimu ɲuŋɔ wolo ge,
mu pee da ba guri ba lee pagana li na.
Pu na ba jé Siyɔn ni ni fundanga sipyaa ni.
Fundanga nixhɔbaaga na ba dɔ pu ɲuyɔ ni.
Fundangbɔhɔ na ba pu ɲuŋɔ círi.
Ɲatanhaŋa ni shiinnɛ li na ba xhɔ.